Naalakkersuisoqatigiilersut ineqarneq pillugu
politikkissaat, aamma attaveqaasersuutit aningaasaqarnerlu pillugu
politikkissaat Sisimiuni inuussutissarsiornermik suliaqartut pissanngatigaat.
Naalakkersuisoqatigiilersut aatsaat taama siammasitsigisut tallimanngornermi
ulloqeqqanngitsiartoq saqqummiunneqarput.
Naalakkersuisoqatigiilersut ineqarneq pillugu
politikkissaat, aamma attaveqaasersuutit aningaasaqarnerlu pillugu
politikkissaat Sisimiuni inuussutissarsiornermik suliaqartut pissanngatigaat.
Naalakkersuisoqatigiilersut aatsaat taama siammasitsigisut tallimanngornermi
ulloqeqqanngitsiartoq saqqummiunneqarput.
Taakkua inuussutissarsiornerup iluani
erseqqissumik sinaakkusiornissaat inuussutissarsiortut neriuutigaat,
piffissarmi ungasinnerusoq eqqarsatigalugu pilersaarusiorsinnaarusupput.
Naasunnguaq Beck Arcrtic Circle Businessimi februaarimi
pisortanngorpoq. Taassuma naalakkersuisunngorlaat Qeqqata Kommuniani
inuussutissarsiortunut iluaqutissanik nassataqarnissaat neriuutigaa.
Naalakkersuisunngortut partiit sisamaasut, aatsaallu
taama siammasitsigisut qanoq isumaqarfigaagit?
-Soorunami nalunngisatsitut politikkikkut
isumaqatigiinngittaraluartut, kisianni innuttaasunut akisussaaffeqarnertik
annertunerutillugu taamatut suleqatigiinnerat assorujussuaq nuannarivara.
Tassami takutikkamikku isumaqatigiissummi tassani atsiukkaminni inunnut
sullissinertik takutikkamikku. Innuttaasut tusarnaarneqarput. Takutillugu
ataatsimoorlutik.
Naalakkersuisunngorlaat ukiuni sisamani tulliuttuni qanoq
naatsorsuuteqarfigaagit?
- Inuussutissarsiorneq eqqarsaatigigaanni pisortat
pitsaasumik sinaakkusersuinissaat, malitassaqartitsinissaat suliffeqarfinnut,
aallarnisaanermik isumassarsianillu pitsaasunik ikorfartuinissaat
naatsorsuuteqarfigaakka.
Inuussutissarsiortummi tungaaninngaanniit sunik
kissaateqarfigaagit?
- Imminut pilersornerup annertusarnissaa, taavalu
suliffeqarfiit namminersortut pikkoriffigisaminnik aallussilluarnissaminnut
kiffaanngissuseqarluassagunik aamma tapersersorluarneqarnisaat pisariaqarpoq.
Aamma aningaasatigut, tapiiffigineqarnerup tungaatigut.
Siunissamut pilersaarusiornissaq pisariaqarpoq
Lars Løvendahl Brøndumip Sisimiuni immikkoortortaqarfiani ulluinnarni
pisortaavoq, taassuma saniatigut Sulisitsisut Sisimiuni immikkoortortaqarfianni
siulittaasuulluni. Naalakkersuisoqatigiilersut piffissaq ungasinnerusoq
eqqarsaatigalugu inuuussutissarsiornerup iluani pilersaaruteqarnissaat taassuma
neriuutigaa.
Naalakkersuisunngortut partiit sisamaasut, aatsaallu
taama siammasitsigisut qanoq isumaqarfigaagit?
- Katitigaanerat soqutiginarpoq, siammasissorujussuuppummi.
Immaqa ilaanneeriarluni isumaqatigiinniartarnissaat unammillernalaartassaaq.
Kisianni piffissami matumani ataatsimoornissaq pisariaqarpoq. Partiillu
politikkii qimaamillugit ataatsimoorluni qaangerniagaqaqatigiinnissamik imminut
oqarfigigeqatigiinnissaq pisariaqarpoq.
Naalakkersuisunngorlaat ukiuni sisamani tulliuttuni qanoq
naatsorsuuteqarfigaagit?
- Ineqarneq pillugu politikki tamakkiisumik
politikkiliornissartik eqqumaffigissagaat naatsorsuutigaara. Ineqarfippassuimmi
aserfallatsaalineqarsimanngimmata iliuuseqartoqartariaqarpoq. Aamma
sanaartornerup iluani attaveqaasersuutillu eqqarsaatigalugit piffissaq ungasinnerusoq
eqqarsaatigalugu pilersaarusiortoqartariaqarpoq. Taamaaliornikkut
inuussutissarsiortut piffissaq ungasinnerusoq eqqarsaatigalugu aamma
pilersaarusiorsinnaalissapput.
Inuussutissarsiortummi tungaaninngaanniit sunik
kissaateqarfigaagit?
- Savimilerinermik Ilinniarfik nuunneqassanersoq paaserusunnarpoq.
Nuunneqassappat sorpassuarnik malitseqassasoq nalunngilarput. Taava ukiuni
tullerni suliassaqarluassaagut. Maannakkut ulappuppugut, ulappunnerpullu
sutigut tamatigut maani sunniuteqarluarpoq. Taamaaginnarnissaa
kissaatigeqaarput. Ineriartorneq taanna killormut saaqqissappat inuit aamma
tammakaaqqissapput. Ulappuseqqikkuttalu sulisinnaasut inerisarnissaat aamma
aallaqqaataaniit ineriartorteqqittariaqassavarput.
