Sisimiuni inuussutissarsiortut: Tunngaviusumik isumaqatigiissut amerlanerusunik periarfissaqalersitsivoq
Kangerlussuup siunissaata qulakkeerneqarnera, Arctic Circle Businessimi pisortap Juliane Henningsenip nuannaarutigaa. - Ineriartortitseqqinnissamut amerlanerusunik periarfissiivoq, taanna oqarpoq.
Naalakkersuisut aamma Danmarkimi illersornissamut ministeriaqarfiup akornanni tunngaviusumik isumaqatigiissusiortoqarnerata kingorna, Kangerlussuup siunissaa ullumi pingasunngornermi qulakkeerneqarpoq.
Qeqqata Kommuniani inuussutissarsiortunut Arctic Circle Businessimi pisortap, Juliane Henningsenip, isumaqatigiissut tupaallaataanngitsumik nuannaarutigaa.
Periarfissaqartoq
- Qeqqata Kommuniani Kangerlussuaq takornariaqarnermi qitiulluinnarpoq, tassanilu aamma suliffeqarfinnik namminersortunik allanik peqarpoq. Tunngaviusumik isumaqatigiissut qularnanngitsumik amerlanerusunik periarfissiivoq, ilaatigut takornariaqarnermut, tassanilu suliarpassuit ingerlanneqarput, taanna Sermitsiaq.AG-mut oqarpoq.
Tunngaviusumik isumaqatigiissut aamma sulianik allanik aallarnisaanissamut tunngaviliisoq, taanna erseqqissaavoq.
- Kangerlussuup aamma Sisimiut akornanni aqqut sanaartorneqassappat, Kangerlussuarmiit Kangerlussuarmullu timmisartortoqarsinnaanissaa pingaaruteqarluinnarpoq. Talittarfittaassallu sanaartorneqarnissaata erseqqissarneqarnissaa piaartumik pisariaqarpoq, naak Naalakkersuisunit aningaasartalerneqareeraluartoq. Talittarfiup sanaartorneqarnissaata erseqqissaavigineqarnissaanut tunngatillugu maanna politikkikkut iliuuseqartoqartariaqarpoq, Juliane Henningsen oqarpoq.
Annertuumik suliassaqartoq
Suliassat piviusunngortinneqassapput, taanna oqarpoq.
- Suliassat piviusunngortinneqarnissaat tunngaviusumik isumaqatigiissummi soqutiginaqutaapput. Kisianni apeqqutit arlaqartut suli akineqartariaqarput, soorlu Sisimiuni innuttaasut qanoq ilillutik Nuummukaqqaaratik nunanut allanut angalasarsinnaanissaat, aammalu mittarfiit tallineqareerlutik atulerpata angalanermi pissutsit qanoq isikkoqassanersut, Julian Henningsen oqarpoq.