KL

DK

Sisimiuni pisiniarfissaq nutaaq: Aappaagu juullikkunni ammassaaq

Sisimiuni illoqarfiup ilua ineriartorpoq. Sisimiut maanna sanaartorfigineqartut saavani nutaamik pisiniarfiliortoqarpoq. Sanaartugaq 1.900 m² missaanik annertutigisoq aappaagu oktobarip aallaqqaataani piariissangatinneqartoq juullip qaammataani ammarnissaa naartorsuutigaat.

J.M.E Invest ApS-imi pisortaaneq, Michaela Eliassen aamma Sisimiuni Pisiffimmi tuniniaanermut pisortaq Gert Kristoffersen.
Tôrtia Reimer-Johansen
Journalist
Offentliggjort

Sisimiuni illoqarfiup qeqqani sanaartortoqaleruttorpoq, sanaartorneqartorlu suussanersoq innuttaasut paaserusussajunnarsivaat.

Pisiniarfiussaaq, taama J.M.E Invest ApS-imi pisortap, Michaela Eliassenip Pisiffik suleqatigalugu paasissutissiissutigaa.

Pisiffiup tamanna Sisimiuni pisiniarfiutiminik nukittorsaalluni ingerlatsinissamut periusissiami ilaanerarpaa. Pisiffiup nassuiaatai naapertorlugit pisiniarfik nutaaq pisinianut tikeraanullu pisiniartarfiulluassaaq.

- Pisiffiup tulluusimaarutigaa juullimi aappaagu niuffannerup nalaani pisiniarfik nutaaq ammassammagu. Pisiniarfik nutaaq alutornartoq illoqarfiup qeqqaniissaaq, napparsimaviup eqqannguaniilluni 1.900 kvadratmeterinillu angissuseqassalluni. Sanaartugaq pisiniarfinnik pissanganartunik initaqassaaq, tassani pisinianut periarfissaqarluassalluni, Pisiffik allappoq.

Maanna sanaartorneqartoq naammassiguni imatut isikkoqassaaq.

Inimi allermi AKIKI pisiniarfik nutaaliaasoq quersuarlu inissisimassapput, qalianilu Torrak Fashion inissisimassalluni, taamatuttaarlu neriniartarfik inunnut 80-nut issiavissalik iserfigineqarsinnaassalluni, Pisiffik nassuiaavoq.

- Neriniartarfiup ulloq naallugu nerisassanik illinnartunik sassaalliuteqartassaaq, tassani innuttaasut takornarissallu tuaviortumik nerinissamut eqqissilluniluunniit nuannisarluni nerinissaminnut periarfissaqassallutik.

Nunaqavissut danskillu suliniuteqartut

Sanaartorneq ingerlatseqatigiiffimmit J.M.E. Invest ApS-imit, Sisimiuni inissianik attartortitseqatigiiffittut pilersinneqarsimasumit, suliarineqarpoq.

J.M.E Invest ApS-imi Michaela Eliassen pisortaanertut atorfeqarpoq, J.M.E Invest ApS Sisimiuni pilersinneqaqqammerpoq, pingaarnertullu attartortitsinermik suliaqarluni. J.M.E. tassaalluni piginnittut John aamma Michaela Eliassenip atii.

Sanaartornermut akisussaanerpaaq tassaavoq B.J. Entreprise A/S, illussanik titartaasartoq ingeniørilu tassaavoq Sweco Danmark A/S, Silkeborg.

erhverv butikshus b.j. entreprise a/s sisimiut inuussutissarsiutit pisiffik samfund j.m.e invest aps

ATORFIIT Se alle jobs

Powered by Labrador CMS