Sisimiuni sanaartornermik sulialik sinneqartooruteqartoq

Suliffeqarfik sanaartornermik suliaqartoq B.J. Entreprise A/S Sisimiuniittoq ingerlalluarpoq. Ingerlatseqatigiiffiup 2023/24-mi ukiumoortumik naatsorsuutit akileraareernermi 3,29 millionit koruuninik angusaqarfiusut tunniuteqqammerpai, taamatuttaarlu suliffeqarfimmi iluatsittumik kinguaariit nikipput.

Ukiumut angusat ukiut siuliinut sanillillugit pitsaanerungaatsiarput – taamatuttaarlu ilimagisamiit pitsaanerungaatsiarlutik. 1 millionimiit 2 millionit koruuninik sinneqartooruteqarnissaq naatsorsuutigineqarsimavoq. Angusarissaarnermi B.J. Entreprisep nammineq aningaasaatai, maajip 31-ani 28 millionit koruunit missaanniittut, patajaannerulerput.

– Taamaammat siunissami patajaatsumik inissisimagatta ukiumi naatsorsuiffiusumi 2024/25-mi assingusumik sinneqartooruteqaqqissalluta naatsorsuutigaarput, pisortaq Jeppe Rosenlund Mortensen, kinguaariit nikinnerisa kingorna kisimi B.J. Entreprisemi piginnittuulersoq, oqarpoq. – Ukiumi angusat siullertut ingerlatseqatigiiffiup suliaqarnerulerneranik kiisalu pingaarnertut piginnaasatsinnik, tassa suliniutinik aqutsilluarnermik, peqquteqarput.

Qarasaasiatigut atortut aningaasaliinissamullu pilersaarutit nutaat

– Sanaartornermik suliniutit tamaasa nakkutigeqqissaarlugillu pilersaarutit naapertorlugit ingerlasoqanngikkaangat iliuuseqarsinnaaniassagatta pisuussutinut pingaarutilinnut ilaatigut qarasaasiatigut atortunut, aningaasaliinissamut pilersaarutinut suliniutinillu aqutsinernut nutaanut annertuumik aningaasaliivugut.

– Suliarujussuummat akisussaaffimma ilai aqutsisunnut suliakkiutigisariaqartarnikuuakka, iluatsimmalli siunissaq pitsaasutut isigaarput.

– Sanaartornermik suliaqartut allat assigalugit ukiuni kingullermi coronaqarnerata kingorna Ukrainemilu sorsuttoqarnerata kingunerisaanik atortussanut assartuinermullu aningaasartuutit qaffannerinik sunnerneqarpugut, taamaammat neqeroorusiornermiit, isumaqatigiissusiornermiit sanaartornerup naammassinissaanut suna tamaat peqqissaarullugu suliarisariaqartarparput.

– Kukkunissamut inissaqanngilaq. Kukkunerit tamarmik angusanut sunniuteqartarput, Jeppe Mortensen naqissusiivoq.

Sulisut tutsuiginartut

– B.J. Entreprise 100-t missaanniittunik sulisoqarpoq, taamaammat suliassatsinnik suliaqartussat eqqortut sulilersinnissaat aamma annertuumik ukkatarinikuuarput. Sanasut najugaqavissut arlallit sulisoralugillu Danmarkimeersunik Litauenimeersunillu sulisoqarpugut. Ingerlalluarpoq, sulisullu sulilluarneri pillugit qutsaviginissaanut pissutissaqarluarpugut.

B.J. Entreprise suliffeqarfittut angillunilu tamatigoortuugami Sisimiuni inuussutissarsiornerup siuarsarnerani pingaarutilimmik inissisimavoq.

Suliffeqarfik maanna illoqarfimmi sanaartukkanik arlalinnik suliaqarpoq. Ilaatigut napparsimmaviup allineqarneranik, Pisiffiup niuertarfissaanik nutaamik sananermik, ilinniartut inaannik nutaanik sanaartornermik, Sømandshjemip allineranik ATV-llu aqqutissaannik Kangerlussuarmukartumik suliaqarpoq.

Aallussat arlallit 

B.J. entreprise sanaartornermi suliniutit annertuut saniatigut ujarattarfimmik, utaqqiisaarutaasumik inissianik attartortitsinermik, betonngiliorfimmik, betonngi atorlugu sanaartuutissanik, qaartiterinermik kiisalu saviminernik saffiugassianillu ilaatigut aalisariutinit isatikkaneersunik atoqqiisarfimmik ingerlataqarpoq.

B.J. Entreprise Bent Pedersenimiit John Eliassenimiillu Sisimiuni 1983-imi novembarip aallaqqaataani tunngavilerneqarpoq. B tassaavoq Bent, J-ilu tassaavoq John. Bent Pedersen 1991-imi toqukkut qimagummat John Eliassenip suliffeqarfik tamaat ingerlatarilerpaa. Suliffeqarfik nunatsinni sanaartornermi ingerlalluarlunilu ingerlanerliortarsimavoq nunatta kitaata sineriaani arlalinnik sanaartugaqarpoq. Piffissap ilaani Kangerlussuarmi Nuummilu immikkoortortaqartarsimavoq, maannali Sisimiuni aallussani ukkatarai.

Kinguaariit nikinneratigut John Eliassenip ingerlatseqatigiiffimmi piginneqataassutini kingulliit Jeppe Rosenkilde Mortensenimut, maanna kisimi piginnittuulersumut, tunivai. John Eliassenili B.J. Entreprisep siulersuisuini, Søren Lennert Mortensenip siulersuisuuffigisaani, suli ilaasortaagami univinngilaq.