Siulersuisut soraarsinneqassapput - aningaasat sipaarneqassapput
Naalakkersuisut inuussutissarsiornermik ilinniarfinnik ilinniarnertuunngorniarfinnut assingusumik inissiinissamik pilersaarutaat, inuussutissarsiorluni ilinniarfinni siulersuisut akissarsiaanut aningaasartuutinik atorunnaarsitsissaaq.
Inuussutissarsiortunngorniarluni ilinniarfinni aaqqissuusseqqinneq ukiut aqqaneq-marluk matuma siorna atuutilersimasoq atorunnaarsinneqassaaq, tamannalu inuussutissarsiornermik ilinniarfinni siulersuisunut ilaasortat akissarsiatik annaassavaat.
Naalakkersuisut inatsisissatut siunnersuut tusarniaassutigeqqammerpaat, tassanilu allassimavoq KTI-miinnaq siulersuisunut akissarsiat minnerpaamik 120.000 koruuninik sipaarneqarsinnaasut. Aammattaaq angalanermut, nerisassanut unnuisarnermullu aningaasartuutit ukiumut 150.000 koruunit missaanniittut sipaarneqassapput.
Siulersuisut ajornartorsiutaasut
Atuarfiit sinneri 250.000 koruunit missaannik sipaarutaassapput, taamaalillunilu inatsisissatut siunnersuut katillugit 500.000 koruunit sinnerlugit sipaaruteqartitsissaaq.
Aammattaaq inuussutissarsiornermik ilinniarfiisa siulersuisuinik piukkunnaatilinnik, attaveqaqatigiilluartunik nukissalinnillu qulakkeerinninnissaq ajornakusoortarsimaqaaq.
- ...Misilittagakippallaarneq, sinniisussaaleqineq pisariaqartunillu piginnaasaqarneq pissutigalugit ilinniarfiup ingerlanneqarneranut akisussaaffiup pingaarnerup isumaginissaa ajornakusoorluinnarpoq, kiisalu suliffissaqartitsisut pisariaqartitaanik ilinniakkanillu aalajangersimasunik piumasaqarneq pillugu periusissiamik oqallinnissamut periarfissaq, kiisalu ilinniakkat pioreersut nutarterneqarnissaat pisariaqartoq, tusarniaanermut allakkani allassimavoq.
Apersuinerit
Aaqqissuusseqqinnerup ukiunik aqqaneq-marlunnik pisoqaassusillip nalilersorneqarnerani, siunnersuisarfiup Implementip siulersuisut, siulersuisunut ilaasortat, pisortat, pisortaaneq ilinniarfinnilu pisortat apersorsimavai, ilinniarfinnilu pisortat eqimattat aalajangersimasut apersorsimallugit.
Oqaloqatigiinnerni taakkunani paasinarsivoq "atuagarsorluni ilinniarfinni siulersuisut pisortallu ilinniartitaanermut politikkimut atassuteqarnissaq kissaatigigaat, aammalu siunnersuutit sammiviillu politikkikkut anguniarneqartut qaffasissusaannut naapertuunnersut ilisimanagu periusissiornissaq, anguniagassiornissaq inernernillu pilersaarusiornissaq nukissanik atuinartuusoq."
Aamma atuaruk: Aaqqissuusseqqinneq ukiuni aqqaneq-marlunni ingerlanneqartoq unitsinneqassaaq