Siumut Qoorngumi-isumaqatigiissummujt isumaqataanngilaq

Qoorngumi-isumaqatigiissummut Siumut atsiornianngilluinnarpoq!

Tusagassiutitigut nalunaarummi, Siumup politikikkut oqaaseqartartuanit Karl Lyberthimit aamma aatsitassat pillugit oqaaseqartartuanit Kim Kielsenimit atsiorneqarsimasumit, oqariartuut paatsoorneqarsinnaanngilluinnarpoq.

Taamatut erseqqitsigisumik oqariartuuteqarput, Demokraatit siulittaasuata Jens B. Frederiksenip tallimanngormat Siumumit pasilliinerata kingorna, tassaasumik Siumut tusagassiutinik ikiorteqarluni apeqqusiinerarlugu naalakkersuisooqatigiit iluminni Qoorngumi-isumaqatigiissut aamma uranimut akuersaanngilluinnartumik politikeqarnerup tapersersorneqarnera avissaartuusutaanerarmassuk.

Demokraatit oqariartuutertik nammineq aallartippoq Palle Christiansenip danskit radioanni aallakaatiassiami peqataaneratigut. Tassuuna IA-mi politikerit nuimasut allaat paasivaat Palle Christiansenip oqariartuutaatigut Qoorngumi-isumaqatigiissutip qularnartoqartinneqarnera. IA-mi ilaasortat arlallit allaat Palle Christiansen pisuutippaat urani pillugu apeqqummut pisariaqanngitsumik assigiinngitsunik isummertaqattaarnerarlugu.

Taamaattoqarnerata Jens B. Frederiksen tuaviinnaq toortaatippaa tugassiutitigullu nalunaarpoq imatut:

- Siumumit kukkusumik oqaatigineqarpoq piaanngilluinnarnissap taamaatinneqarnissaa amerlanerussuteqarfigineqartoq. Taamaattoqanngilaq. Siumumit maannakkut atorunnaarsinniarneqarpoq, naak avatangiisinut aamma peqqinnissamut sunniuteqarnissaasa misissorneqarnissaat suli uagut amigaatigippiut. Tamanna Demokraatit peqataaffiginianngilluinnarpaat. Uanga Siumut inakkusuppara Qoorngumi-isumaqatigiissummut atsioqqullugit, tamaalilluta qulakkiissavarput piaaqqusivinnginneq atorunnaarsinneqassagaluarpat tamatuma peqqinnissamut aamma avatangiisinut akornutaanngitsumik pinissaa, Jens B. Frederiksen allappoq.

Taamatut oqariartuut kiisalu minnerunngitsumik inassuteqaat Siumumit ingerlaannartumik oqaaseqarfigineqarpoq.

- Nunatta aningaasaqarniarnera iluarsiniarlugu periarfissat piusut, tamatumani apeqqutaatinnagu pisuussutit uumasuunersut uumaatsuunersulluunniit atortariaqarpavut nangaaginnarneq qimallugu, tamakkulu uagutsinnut pisuussutinngortillugit aamma kinguaassatsinnut. Soorunami atuineq suna tamaat tikillugu isumanaatsumik aamma mianersortumik sakkortuumik piumasaqaatitaqarluni ingerlanneqassaaq, Karl Lyberth aamma Kim Kielsen allapput.

- Hr. Jens B. Frederiksen uagut immitsinnut pisinnaatippugut una tusagassiutitigut nalunaarut aqqutigalugu illit oqaaseqaatit utertissallugu! Oqaaserisatit paasiuminaatsut illit nassuiartariaqarpatit, tassami augut tamatta radioaviisimik tusarnartugut tamatta siulittaasutut tullerpit Hr. Palle Christiansenip oqaaserisai paatsoorneqarsinnaanngitsut tusarpavut. Imami erseqqitsigisumik oqarpoq allaat Naalakkersuisut Siulittaasuat nassuertariaqarluni Inuit Ataqatigiit aamma Demokraatit piaanermi uranip akuutinneqarneranut tunngatillugu assigiinngitsorujussuarnik isumaqartut, Karl Lyberth aamma Kim Kielsen allapput.

Siumumit ilanngullugu oqaatigineqarpoq partii aalajangersimasoq upernaaru ataatsimiinnissamut FM2011-p aappassaaneerneqarnissaanut atatillugu imaattumik saqqummiussiniarnertik "Aalajangiiffigisassanngorlugu siunnersuut Naalakkersuisut pisussaatinneqarput piaarnerpaamik sulissutigissagaat Kalaallit Nunaanni aatsitassat piiarneqarsinnaasutut akuersissutigineqarsimasut suulluunniit tamarmik annerpaamik uranimik 0,1 %-imik akoqarsinnaaneranik atuutilertitsinissaminnut."

Karl Lyberth aamma Kim Kielsen malillugit siunnersuut EU-mi killissarititaasutut naligitinneqartunut naapertuuppoq.