KAIR NALUNAARPOQ
Sivisuumik biilit inissiisarfimmiititsineq akeqassaaq
Kalaallit Airports maanna nalunaarpoq Nuummi mittarfimmi biilit inissiisarfiini akunnernik pingasunit sivisunerusumik biilinik uninngatitsineq akitsuuteqalissasoq.
Annonse
Nuummi mittarfeqarfik nutaaq ukioq manna ammarpat taxat kisimik biilit inissiisarfimmiisinnerinut akitsuuserneqassanngillat.
Innuttaasut biilitik akunnerit pingasut sinnerlugit biilit inissiisarfianniititsinerminni aamma akiliuteqartassapput. Kalaallit Airports (KAIR) Facebookimi taama ilisimatitsivoq.
Biilinik inissiisarfimmiisitsinermi akit ima isikkoqarput:
Akunnerit pingasut siulliit akeqanngilaq, akunnerit pingajuanniit ullormut akeqartitsisoqalissaaq.
Ullunut 1-5-inut ullormut akigitinneqarpoq 45,00 DKK
Ullunut 6-10-nut ullormut akigitinneqarpoq 35,00 DKK
Ullunut 11-niit siumut ullormut akigitinneqarpoq 25,00 DKK
Video atorlugu nakkutiginninneq aamma innaallagiamik immersuisarfiit
KAIR-ip erseqqissarpaa biilit uninngaviat tamakkiisumik naammassippat aatsaat akigitinneqartut atuutilissasut.
KAIR-ip neqeroorutigaa piffissami sivisunerusumi biilit inissiisarfianiitsitsineq atuisunut arlalinnik periarfissaqartitsissasoq.
Biilit inissiisarfiat video atorlugu nakkutigineqassaaq, biilit innaallagiamik immersuisarfimmik atuisinnaassapput, aputaajaasoqartuassaaq biilit tikikkuminartuutinniarlugit, biilillu inissinnerini ajornaatsumik isumannaatsumillu digitalikkut sullissisoqassalluni.
Taxat timmisartoqarfiup eqqaani uninngasut 10 koruunimik akitsuuserneqartassasut februarimi saqqummereernikuuvoq.
Biilinut ingerlaarfiit angallattut akunnattuunnginnissaannut iluaqutaassapput
KAIR nassuiaavoq biilit ingerlaarfii immikkoortitikkat qulakkeerissasut angalasussat ajornaatsumik pitsaasumillu mittarfiliartarnissaannik:
- Terminalip saavani sumiiffinni nutaani, isertarfiup pingaarnerup eqqaani angallattunik ulapputtoqarani mittarfimmut aammalu mittarfimmiit assartuussisarneq nutaamik pitsaassuseqalissaaq. Terminalip saavani biilinut nutaanik inissiisarfeqalernerani mittarfimmut aammalu mittarfimmiit angallanneq tamarmik assigiissaarnerujussuanngortussaavoq. Ilaasutut matup saavanut aaneqarnissat aggiunneqarnissallu ajornannginnerujussuanngortoq misigissavat. Terminalip saavani uniffissaq saarleq Kiss & Fly-nut, uniffissat qiterliit marluk taxanut aammalu silarleq bussinut uteqattaartussanut, atugassanngortinneqassapput. Mittarfimmukarnissaq mittarfimmiillu aallarnissaq aatsaat taama ajornanngitsigilissaaq, KAIR allappoq.
KAIR allappoq biilinut inissiisarfik septembarip qiteqqunnerata missaani tamakkiisumik pilersinneqassasoq.
