SQAPK-ip Naalakkersuisut pakatsissutigigai

Aalisarnermut inatsisip ukiumi nutaamiit atuutilersinneqarneratigut Pisassiissutit Niuerutigineqarsinnaasut Nammineq Pigisat (PNNP) aqutsiveqarfik 47-mi umiatsiaararsortunut annertuumik kiffaanngissuseqalersitsillutillu paggatassiissutinik aalisarnermut naleqqiullugu patajaannerulersitsissasut, Aalisarnermut Piniarnermullu Naalakkersuisuugallartup Kim Kielsenip (S) siornatigut oqaatigisareerpaa.

Tamatuma saniatigut aalisartoq pisassiissutinik niuerutigineqarsinnaasunik nammineq pigisaqartoq, angallammik imaluunniit atortunik nutaanik pisinissaminut atugassaminik pissarsiniaruni, pisassiissutiminiit qularnaveeqqummik pissarsisinnaasoq, Kim Kielsenip oqaatiginikuuaa.

Kisiannili umiatsiaararsortunut PNNP-mik aaqqissuussinermut nuussimasunut aningaasanik taarsigassarsisitsinissamut qulakkeerinnittumik Grønlandsbanki suli aalajangersagaqanngitsoq, aningaaserivillu sinerissap qanittuani PNNP atorlugu aalisarnermut aningaasaliissappat, tunngaviusumik piumasaqaatit aalajangersimasut naammassineqaqqaartariaqartut, aningaaseriviup pisortaata tullia paasissutissiivoq.

Grønlandsbankip taamatut oqariartuuteqarnera Sinerissap Qanittuani Aalisartut Piniartullu Kattuffiannit, SQAPK-mit tupaallaatigineqarpoq, PNNP-mullu ikaarsaartitsinermut atatillugu umiatsiaararsortut Naalakkersuisuniit uukapaatinneqarsimasutut misigisimasut, kattuffimmiit oqaatigineqarpoq. 

Taarsigassarsinissaq qulakkeerneqanngitsoq

Grønlandsbankimi pisortap tullia John Jakobsen naapertorlugu umiatsiaararsortunut PNNP-mut ikaarsaarsimasunut aningaasanik taarsigassarsisitsinissamut qulakkeerinnittumik Grønlandsbanki suli aalajangersagaqanngilaq.

Aalisarnermut inatsimmut ilanngunneqartussat nalunaarutit pingasut, tassa PNNP pillugu nalunaarut, aalisarnissamut akuersissutit pisassiissutillu pillugit nalunaarut kiisalu aalisarnerup teknikkikkut aaqqissuussaaneranik nalunaarut tusarniaassutigineqarnerat naammassisimalerpoq, taakkulu martsip apriilillu aallaqqaataani atuutilissapput. Nalunaarutit taakku atuutilerpata umiatsiaararsortut taarsigassarsisinnaanerannut iluaqutaanersut Grønlandsbankenip suli oqaaseqarfiginngikkaluaraa, aningaaserivik sinerissap qanittuani PNNP atorlugu aalisarnermut aningaasaliissappat, tunngaviusumik piumasaqaatit aalajangersimasut naammassineqaqqaartariaqartut, pisortap tullia ilisimatitsivoq.

- Nalunaarutit inaarutaasumik nalunaarutigineqartut misissornissaannut piffissaqalerutta, uumassusilerituullu innersuutaat pisassiissutigineqartunut qanoq naapertuutsiginersut takusinnaalerutsigu, aningaasaliisinnaanermut periarfissat pillugit suliaqassaagut.

- Kisiannili qaleralinniarluni aalisarnermi piujuaannartsinissap qulakkeerneqarnissaa, aalisarnerullu aningaasatigut imminut akilersinnaasumik ingerlanneqarnissaa pingaaruteqarluinnartoq, siusinnerusukkut oqaatiginikuuarput. Tunngaviusumik piumasaqaatit taakku naammassineqarsinnaappata soorunami Grønlandsbanki aalisarnermut aningaasaliisinnaavoq. Tassungali tunngatillugu maannakkut sukumiinerusumik oqaaseqarnissaq siusippallaarpoq, John Jakobsen oqarpoq.

Naluneqanngitsutulli 2025-mut sinerissap qanittuani qaleralittassiissutit uumassusilerituut innersuutaannut sanilliullugit qaffasinnerujussuupput, taamaattumillu umiatsiaararsortut PNNP-mut ikaarsaarsimasut assersuutigalugu angallammik atortussanillu nutaanik pisinissamut pisassiissutit niuerutigineqarsinnaasut nammineq pigisat atorlugit aningaaserivimmit taarsigassarsiffigisinnaanissaat, Grønlandsbanki naapertorlugu maannakkorpiaq tamakkiisumik qulakkeerneqarsinnaanngilaq.

Uukapaatinneqartutut misigisimasut

Grønlandsbankip taamatut oqariartuuteqarnera SQAPK-mi pisortap Erik Langep pakatsissutigaa.

- Aalisarnermut inatsisissap akuersissutigineqarnissaa sioqqullugu ilisimatinneqarpugut umiatsiaararsortut PNNP-mik aaqqissuussinermut nuukkumasut Grønlandsbankimit taarsigassarsisinnaanerat ajornannginnerulissasoq, maannali ajoraluartumik tamanna ilumoortuunngitsoq paasinarsivoq.

- Kisiannili aalisarnermut inatsisip nutaap akuersissutigineqarnissaa peqqissaarussaanngitsumik nukingiullugu suliarineqarnikuummat, tamatumalu kingunerisaanik qulaajagassat pingaarutillit arlallit qulaajaaffgineqarnikuunngimmata, Grønlandsbankip taamatut nalunaaruteqarnera tupaallaatigivallaanngilara.

- Taamaattumik ilaasortagut PNNP atorlugu aalisalersimasut, uukapaatinneqarlutik aningaasatigut isumannaatsumik qulakkeerinniffiunngitsumut ikaarsaartinneqarsimasut isumaqarpugut, taanna oqarpoq.

Ilisimatuut isornartorsiuisut

Ilisimatuut ilisimatusarnermik suliniummi ilaatigut inuussutissarsiornermi piujuaannartitsinermik ineriartortitsinermik suliaqarfiusumi, Future Arctic Lives-imi, FAL-imi, suliaqartut aalisarnermut inatsissap tusarniutigineqarneranut atatillugu siorna januarimi Aalisarnermut Piniarnermullu Naalakkersuisoqarfimmut akissuteqarput.

Aalisarnermut inatsisissaq taamatut isikkoqartillugu atuutilersinneqassappat, tamanna inuiaqatigiinnut kalaallinut minnerunngitsumillu aqutsiveqarfik 47-mi ilaqutariinnut aalisartukkormiunut piniartukkormiunullu annertuumik kingunerluuteqarnissaa aarlerinartoqartoq, ilisimatuut akissuteqarnerminni ilaatigut oqaatigaat.

Aammali aalisarnermut inatsisissap atuutilersinneqarneratigut inuiaqatigiinnut sunniutaasinnaasut assigiinngitsut naliliiffigineqaratillu misissorneqarsimanngitsut, aalisakkallu assigiinngitsut aalisapilunneqarnissaannut aarlerinartoqartoq, ilisimatuut ilaatigut erseqqissaatigaat. Kiisalu umiatsiaararsortut taakkulu ilaqutaasa aningaasatigut isertitaasa ajorseriarnissaat, allaallu ilaasa inuussutissarsiutiminnik annaasaqarnissaat aarlerinartoqartoq, tusarniaanermut akissummi ilaatigut atuarneqarsinnaavoq. Taamaattumik aqutsiveqarfimmi 47-mi umiatsiaararsortunut PNNP-mik atuutilersitsinissaq inatsisissatut siunnersuutimit peerneqartariaqartoq, taarsiullugulu allanik suliniuteqartoqartariaqartoq ilisimatuut ilaatigut inassutigaat.

Taamatulli isornartorsiuneq Kim Kielsenip ilumuunnginnerarpaa, ilisimatuullu taamatut oqariartuuteqarnerat aalisarnermut inatsimmut maanna atuuttumut qunusaarinermik ingerlatsisut, taanna isumaqarpoq.