Suleqatigiilernermi killilersugaanngitsumik niueqatigiinneq qulakkeerneqassaaq
Islandimi ministeriunerup Katrín Jakobsdóttirip Nuummi tikeraarnerani Múte B. Egede aamma ministeriuneq isumaqatigiipput nunat suleqatigiinnerat annertusassallugu. Suleqatigiissutissat ilagaat niueqatigiinneq, killilersugaanngitsumillu niueqatigiissinnaanermut isumaqatigiissut nunanit marluusunit kissaatigineqarpoq.
Islandimiut ministeriunerata Katrín Jakobsdóttirip nunatsinni ulluni marlunni tikeraareernerani naalakkersuisut siulittaasuat tikeraartorlu tusagassiortunik katersortitsinermi ilisimatitsissutigaat nunat marluk sutigut suleqatigiinnerusinnaanerat.
Múte B. Egedep tusagassiortunik katersortitsinermini erseqqissarpaa suleqatigiinnissami tunngavissat ulluni kingullerni isumaqatigiissutigineqarsimasut, suleqatigiinnerullu itisilernissaa aatsaat maanna aallartittussanngortoq.
Nunarput Islandimiut ministeriunerannik kingullermik tikeraarneqarpoq 1998-imi. Maannalu tikeraartoqareernermi nunatsinnit naalakkersuisut Islandimut aamma tikeraassapput.
Akitsuusersugaanngitsunik niuerneq
Nuummi tikeraartoqarnerup nalaani sammisaq eqqartorneqartoq pingaaruteqarnernut ilaasoq tassaavoq nunat akornanni killilersugaanngitsumik niueqatigiinnissamut isumaqatigiissuteqsarnissaq. Nunatta Islandillu akornanni niueqatigiinneq ukiuni tallimani kingullerni 67 procentimik annertunerulersimavoq. Niuernerullu pitsaanerulernissaanut suliniuteqartoqartariaqarpoq, niueqatigiinnermi akitsuutit peerneqarsinnaasunngorlugit.
Suleqatigiissutigineqarsinnaasoq alla tassaavoq takornariaqarneq. Island takornariaqarnerup iluani 2010-mili siuariartungaatsiarpoq, takornariarfiulluartarlunilu. Ministeriunerup tusagassiortunik katersortitsinermi oqaatigaa, covid-19-ip tuniluunnerata nalaani nuna takornarialerinermik unitsitsisariaqarnermini takornariaqarnerup inerisarnissaanut periarfissanik misissuisinnaanermik periarfissinneqarsimasoq.
- Pinngortitap inuiaqatigiillu piujuaannarnissaat periusissatsinni pingaaruteqarluinnarput, Katrín Jakobsdóttir oqarpoq.
Ilisimatusarnerup ilinniartitaanerullu iluani ilisimasanik avitseqatigiissinnaaneq suleqatigiissinnaanerlu aamma periarfissaapput. Nunat naalakkersuisuisa tikkuarpaat nunat assigiissuteqangaatsiartut, pinngortitamiillu inuussuteqarneq kiisalu pinngortitami inuuneq nunat assigiissutaasa annersarigaat.
Nunarsuarmi nunani naammagisimaarinninnerpaaq
Silap pissusaata allanngoriartorneranut tunngatillugu suleqatigiissinnaaneq aamma tikinneqarpoq. Islandip ministeriunerata oqaatigaa Island silap pissusiata allanngoriartorneranut tunngatillugu annertuunik anguniagaqartoq, Kalaallit Nunaatalu Parisimi isumaqatigiissut tunngavigalugu silap pissusaata allanngoriartorneranut tunngatillugu anguniakkani maanna paasiniassavai.
Naalakkersuisut oqariartuuteqareerput Kalaallit Nunaata nunarsuarmit tamarmit aningaasaliisartunik tikeraarsaallutik, Nuuk Kangerlussuullu akornanni erngup nukiganik suliniuteqarnissamut aningaasaliinissamut periarfissiillutik.
Islandimiut ministeriunerat Ilimmarfimmi aamma pulaarsimavoq. Tassani naligiissitaaneq pillugu oqalugiarpoq. Global Gender Gap Index 2021 naapertorlugu Island arnat angutillu naligiissitaanerannut tunngatillugu nunarsuarmi siuttuuvoq. Akissarsiaqartitsinermi, erninermut tunngatillugu sulinngiffeqartitsinermi, siulersuisunilu ilaasortat suiaassuseqatigiiit naligiissinneri uuttuummi ilaatinneqarput.
Tassuuna aamma suleqatigiinneruneq ilikkagaqarnissamut periarfissaqarneruneq maluginiarparput, Múte B. Egede aamma Katrín Jakobsdóttir oqarput.