Suleqqilerput: kinguaattoortoqalaaginnarpoq
Aalborgimi Grønlandshavnimi suliamik unitsitsigallarneq qaangiuppoq, quersuarni sulisartut assartugalerisullu suleqqilerput
Aalborgimi Grønlandshavnimi quersuarni sulisartut assartugalerisullu marlunngornermi ullaakkut suliamik unitsitsigallarnertik taamaatillugu ullumikkut suleqqilerniarlutik aalajangerput.
Taama Royal Arctic Line ilisimatitsivoq.
Tamatuma kingunerani quersuarni terminalinilu nassiussanik isumaginnittoqaqqilerpoq, taamatuttaarlu nassiussanik containerinillu usingiarneq usilersornerlu ingerlateqqinneqalerlutik.
- Sulineq ulluni marlunni uninngatinneqarpoq, tamannalu Royal Arctic Linep angalanissamut pilersaarutaanut sunniuteqalaaminerpoq. Naatsorsuutigaarput ”Nuka Arctica” (angalaneq 1215) ullup unnuallu ataatsip marlulluunniit akornanni kinguaattooruteqarluni silalu apeqqutaatillugu Nuummut tikissasoq. Sinerissap sinnerani ullup unnuallu ataatsip missaanik kinguaattoortoqarnissaa aamma ilimagineqarsinnaavoq, RAL allappoq, suliamillu unitsitsigallarnerup kinguneranik umiarsuaatileqatigiiffiup sullitaanut akornutit pilersimasut ajuusaarutigalugit.
Læs "Fortsat arbejdsnedlæggelse i Aalborg"
Læs "Arbejdsnedlæggelse i Aalborg"
RAL-imi attaveqarnermut pisortaq Jakob Strøm Sermitsiaq.AG-mut siusinnerusukkut nassuiaavoq suliamik unitsitsineq isumaqatigiinniarnernik ingerlanneqartunik qanimullu iserfigerusunngisaminik pissuteqartoq.