Suliffeqarfiit Grønlandsbanken naammaginngilluinnaraat
Suliffeqarfiit mikisut arlallit ataatsimiinneq tunuliaqutigalugu atsiornernik 16-inik katersisimapput, taanna Grønlandsbankenimut saaffiginnissutaavoq. Attaveqatigiinnerlunnermut tunngasuusoq, pisortap tullersortaa isumaqarpoq.
Sisimiuni inuussutissarsiornikkut ineriartornissaq Grønlandsbankenip akornusersorpaa.
Suliffeqarfeeqqat arlallit qanittukkut ataatsimiillutik Grønlandsbankenip sullissinera pillugu oqallittut taama oqariartuuteqarput. Suliffeqarfiit atsiornernik 16-inik katersisimasut, Grønlandsbankenimut arlalinnik isornartorsiuteqartut kinaassutsiminnik isertuusserusupput.
Aningaaseriviup inuussutissarsiornermut pisortaanik unammilligassat assigiit atorneqartut paasineqarnerisa kingorna, ataatsimiinneq Sisimiuni Sømandshjemimi pisoq, suliffeqarfiit iluminni oqaloqatigiinnerannik tunngaveqarpoq.
Qasungavallaartut akuersaarpallaartullu
Suliffeqarfiit minnerit tapersersorneqaratik ataatsimut misigisimanerat ilaatigut ataatsimiinnermi paasinarsivoq.
Aammattaaq Grønlandsbanken pisariaqartinneqartumik akiligassarsititserusuttanngitsoq isumaqarput, taakku assersuutigalugu suliffeqarfiit ineriartortut attanneqarneranut atorneqarsinnaapput. Tamannali Grønlandsbankenimi pisortap tullersortaata John Jakobsenip ilumuunnginnerarpaa.
- Isumaqarpunga ilumuunngitsoq, taakku suliat malittarisassavut maleqqissaarlugit ingerlanneqartarnerat pissutigalugu. Kisianni atuisup siornatigut inuussutissarsiornermut pisortaasimasup oqaloqatigiuminarneruneranik misigisimanera pillugu oqaaseqarfigisinnaanngilara. Taanna nalulluinnarpara, taanna oqarpoq.
Inuussutissarsiornermut pisortaq sukanganerusinnaava – tamannalu malugineqarsinnaalluni?
- Immaqa taamatut misigineqarsinnaavoq, naak tamakkiisumik piviusuunngikkaluartoq. Kisianni itigartitsissuteqannginnermi suliat amerlanerit aningaaseriviup iluani allami oqaluusereqqaarneqartarput.
Suliffeqarfiillu arlallit siumoortumik nalunaarfigineqaqqaaratik akiligassarsisinnaassusaannik annikillisitsisoqarneranik imaluunniit matuneqartarnerat misigisiimavaat. Suliffeqarfiittaaq aningaaseriviup nikaginnilluni aamma pisut ilaanni sioorasaarerpalaartumik nipeqarluni sullittaraat misigisimapput.
Suliffeqarfiit inuussutissarsiornermut pisortaasimasoq, taassumalu siunnersuinera maqaasinarnerarneqartillugu – suliffeqarfiit oqarnerat naapertorlugu – pisortaasimasoq pitsaavallaartarsimasoq maanna inuussutissarsiornermut pisortamit akissutigineqartarpoq.
Aningaasaliissuteqarnissamut qinnuteqaatit siunnersuinertaqanngitsumik itigartinneqaannartarnerat tunngavissaqanngitsoq, atsiortut isumaqarput.
Suliffeqarfinnik ineriartortitsiniarunik suliffeqarfiit illuutiminnik, biiliminnik imaluunniit nalilinnik allanik tunisinissaminnut siunnersorneqartarlutik ilisimatitsipput.
Attaveqatigiinneq amigartoq
Sisimiuni inuussutissarsiornerup ineriartortinneqarnissaanik Grønlandsbankenip aporfilersuinera pillugu isornartorsiuineq, pisortap tullersortaata ilumuunnginnerarpaa.
Aningaaserivik pisassaminut peqataasartoq, taanna isumaqarpoq. Pisortap tulliata ima paasivaa, attaveqaqatigiinnermi paatsooqatigiittoqartarsimasoq.
- Paatsooqatigiittoqartarsimasinnaavoq. Kalaaliunngitsumik siunnersuisartoqarpugut. Oqaatigisinnaanngilara taanna ajornartorsiutaasoq, kisianni ilaatigooriarluni oqaatsitigut paatsooqatigiittoqartarpoq. Tamannali utoqqatsissutissaanngilaq, taanna oqarpoq.
Atuisut arlallit ilisimatinneqaratik akiligassarsisinnaanerat millisinneqarsimasoq imaluunniit matuneqarsimasoq misigisimavaat. Grønlandsbankenimi periuseq taanna nalinginnaasuua?
- Atuisoq oqaloqatigeqqaartinnagu taamaattoqarneq ajorpoq.
Taamaattoqarsimasinnaanngila?
- Naagga, taamaattoqarsinnaanngilaq. Oqaloqatigiissutigeqqaarneqartarpoq.
Isornartorsiuineq tunngavigalugu suliffeqarfiit ataasiakkaat misigisimasaannik oqaloqatigineqarnissaat eqqarsaatigineqartoq, John Jakobsen nassuiaavoq. Aningaaseriviup suut allanngortittariaqarnerai imaluunniit nassuiarluarsinnaanerai paasiniarlugu taamaaliortoqassaaq.
Isornartorsiuineq sunniuteqarpoq
Grønlandsbankenip akiligassarsitinneqarnissamut pisariaqartitsinermut taarsiullugu atuisuni assersuutigalugu illuminnik tunisinissaannut siunnersuisarnera nalinginnaasuunersoq apeqqutigaarput, tamanna ataasiakkaaraluni nalilersorneqartartoq pisortap tulliata oqaatigaa.
- Suliniutinik nammineq aningaasaliissuteqarnerunissamik pisariaqartitsisunik suliniuteqartoqarsinnaasarpoq. Pigisallu nalillit tuniniarneqarnissaat periarfissaasinnaasarpoq.
Atuisut anneruniarfigineqarnermik pisullu ilaanni sioorasaarinertut nipilimmik sullinneqartarnermik misigisaqarnerannut tunngatillugu, John Jakobsen akissuteqarpoq, anneruniarnermik misigineqartoq attuumassuteqanngitsumik naliliinerusartoq. Kisianni aningaaseriviup sullitanut sioorasaarisimasinnaanera ilumuunngilluinnarnerarpaa.
- Sioorasaarineq ajorpugut. Tamanna periuserinngilarput.
Suliffeqarfiit arlallit aningaaserivimmut allamut nuunniarlutik isumaliutigalugu ilisimatitsipput. Tamanna sunniuteqarpa?
- Soorunami. Inuit aningaaserivitsinnik naammagisimaarinninngikkaangata sunniuteqartuaannarput. Taamaammallu maanna ataasiakkaat naapikkusuppavut, misigisaallu tusaarusullugit, arlaannik eqqunngitsoqarsimappat allanngortitsiniassagatta imaluunniit aalajangiinitsinnut tunngaviusut nassuiaaniassagatta.