Suliffeqarfiit ileqqorissaarnermut malittarisassaqarnissaat akuerinngilaat
Namminersornerullutik oqartussat suliffiutaanni direktørit siulersuisunilu ilaasortat ileqqorissaarnikkut malittarisassaliuunneqarnissaannik Demokraatit siunnersuutaat naalakkersuisut itigartitsissutigaat
Siunnersuut sapaatip akunnerani uani Inatsisartuni suliarineqarmat erserpoq, naalakkersuisut nalunaarusiaq »Anbefalinger for god selskabsledelse i Grønland« 2004-imeersoq naammattutut isigigaat.
– Tassani siulersuisut qullersaqarfiillu suliassaat akisussaaffilu allaserineqarsimapput, taaneqarsimallunilu ileqqorissaarneq akisussaassuseqarluarnerlu suliffeqarfiit aqutsisuisa akisussaaffigigaat.
Demokraatit siulittaasuat, inatsisartuni ilaasortaq Per Berthelsen Sermitsiaq Inuussutinut oqarpoq, »pissutsit eqqumiitsorpassuit takusartakkagut« pissutigalugit suliffeqarfiit ileqqorissaarneq pillugu malittarisassaqarnissaat siunnersuutigisimagitsik.
– Namminersornerullutik oqartussat suliffiutaanni qullersat allaffissuarmilu atorfillit qulliit ileqqorissaarnerulersariaqarlutillu perorsarsimanerlerusariaqartut eqqarsaatigalugit taamatut siunnersuuteqarpugut, partiip siulittaasua oqarpoq.
Sermitsiaq Inussutini annerusumik atuagassaqarpoq.