Suliffeqarfiit pisortaqarfiini arnartaasut aningaasarsiutaalluaqaat

Suliffeqarfiit pisortaqarfittaani makkorpalaarneq suliffeqarfimmut iluanaarutaasarpoq. Misissuinerimmi nutaat malillugit arnat pisortaagaangata suliffeqarfiup aningaasarsiorneranut iluaqutaasartoq paasineqarsimammat, taama atuagassiaq Lederne allaaserisaqarpoq.

- Suliffeqarfinni suliffeqarfissuarniluunniit arnanik pisortaqaraangata iluanaarutaasarneri malunnarsimaqaat, tassa sunaluunniit misissuinerni taputartuunneqaraluarunik tamatigut arnat iluanaarutaasarput.

Taama Nina Smith, Aarhus Universitetimi professoriusoq atuagassiamut oqaluttuarpoq.

Taassuma Danmarkimi suliffeqarfiit annerit 2300-t pisortaqarnerat aningaasaqarniarnerallu 2005-imi misissuiffigereerlugit inerneri paatsuugassaanngillat:
Suliffeqarfik arnamik pisortaqaraangat angummik pisortalimmiit agguaqatigiisillugu 4 procentinik isertitaqarnerusartoq paasisimammagu.

Nunat tamat akornanni misissuinerit aamma taamatut takussutissiipput. Taamattoqarnerami arnat angutinit allaanerusumik aqutseriaaseqarnerat peqqutaasimavoq, Nina Smith oqarpoq.

- Misissuinerimmi malillugit arnat angutinit sivisunermik suliffeqarfimmiittarput piffissarlu sivisunerusoq atorlugu piareersartarlutik.

- Taamaammat aliangiisarnerit pitsaanerungajuttarput, arnammi periarfissaasinnaasut amerlanerit saqqummiuteqaartarmatigit, taama professori unnersiorpoq.

Vibeke Skytte, atuagassiami Lederne-mi immikkoortortaqarfimmi ningiuusup arnat aqutsisuugaangata suliffeqarfiup angusarissaarneranik kinguneqarajunnera aamma qularinngilaa:
- Aqutsisoq tamatigoortuugaangat aqutsilluartarpoq, taassumami suliamut ataatsimut sullisseriaasissat assigiinngitsut takusinnaasarmagit. Aamma suliffeqarfiit arnartaqanngitsuni aqutseriaaseq ataasiinnaangajuttarpoq eqarlunilu, Vibeke Skytte taama oqarpoq, nangillunilu:
- Aamma suliffeqarfiit peqatigiiaanik aqutsisullit tunuliaqutallillu taamatorluinnaq atugaqartarput.

Atuagassiaq Lederne malillugu danskit suliffeqarfissuini pisortat 13 procentiinnai arnaapput.