KL

DK

Aallarnisaasoq inunnullu innarluutilinnut siunnersorti: 

Suliffeqarneq inissaqartitsisoq pilersissiuk

-Inoqarpoq innarluutilinnik suliffeqarnermut appakaanniarnerminnik ajornakusoortitsisunik, taama qallunaaq aallarnisaasoq inunnullu innarluutilinnut siunnersorti, Jacob Nossell Sulisitsisuni suliffeqarneq innarluuteqarnerlu pillugit saqqummiussereerluni oqarpoq

Oqalugiartartoq, aallarnissaasoq inunnullu innarluutilinnut siunnersorti Jacob Nossell Nuummeeqqammerpoq, tassanilu ilaatigut suliffeqarneq inissaqartitsisoq pillugu Sulisitsisunut oqalugiarpoq.
Oline Inuusuttoq Olsen
Offentliggjort

Kalaallit Nunarput sulisussanik amigaateqarpoq. Ajornartorsiut tamanna Sulisitsisut misissueqqissaartitsinerannit Naalakkersuisullu suliffeqarneq pillugu 2023-mi nassuiaataanni erseqqissarneqarpoq. Tamannalu ungasinnerusoq isigalugu tunisassiorsinnaassutsimut kalluaallunilu Kalaallit Nunatta aningaasaqarnikkut inissisimaneranik ilungersunartorsiortitsissaaq.

PISARTAGAQARTUNUT

Allaaserisaq una Nutaarsiassaqartitsivimmi aviisit naqitat ilaanni allaaserisaavoq.

Allaaserisat pisartagaqartunit siunissami taamaallaat atuarneqarsinnaajumaassapput.

Atuarluarna.

Qallunaaq aallarnisaasoq inunnullu innarluutilinnut siunnersorti Jacob Nossell Inuillu Innarluutillit oqaaseqartartuat Anja Hynne Nielsen Nuummeeqqammerput, tassanilu suliffeqarneq innarluuteqarnerlu pillugit Sulisitsisunut qanoq ililluni suliffeqarnermik inissaqartitsisumik pilersitsisoqarsinnaanera pillugu saqqummiipput.

- Siullertut ukiut arlallit qaangiuppallaanngitsoq maannakkorpiarli sulisussanik amigaateqartoqarpoq. Kalaallit Nunatsinni Danmarkimisulli inuit innarluutillit suliffeqarluni inuunermut appakaanniarneq ajornartittaraat nalunngilarput, Jacob Nossell oqarpoq.

Naak sulisussanik amigaateqartoqaraluartoq, inuillu innarluutillit, inuit innarluutillit pillugit isumaqatigiissummi artikel 27-mi naapertorlugu allat assigalugit sulinissamut suliffeqarnissamullu piginnaatitaaffeqaraluartut, taamaattoq inuit innarluutillit suliffeqarnermut appakaanniartarneq ajornartorsiutigisarpaat.

- Sulisussanik amigaateqaraanni isumalluutit suut piginerlugit allatut ajornartumik qissimigaarneqartariaqarpoq, taamatuttaarlu inuit innarluutillit suliffeqarnermut appakaakkusukkaluarput, Jacob Nossell oqarpoq.

Kikkut tamarmik piffissap ingerlanerani innarluuteqalertarput

Jacob Nossellip nammineq suliffeqarfiutini Nossell og Co ingerlappaa, pingasunillu tamarmik innarluuteqartunik sulisoqarluni, taakku NGO-nut, suliniaqatigiiffinnut suliffeqarfinnullu innarluutillit pillugit siunnersuillutillu oqalugiartarput. 2022-mi Jacob Nossell CP Danmarkimi, nuna tamakkerlugu Cerebral paresillit (naartuunerminni meeraaraanerminniluunniit qaratsamikkut ajoquteqalersimasut) peqatigiiffianni siulittaasup tulliatut qinerneqarpoq.

- Innarluuteqarluni suliffeqarfiuteqartoqarsinnaavoq, taamaaliornissami sumut pikkoriffeqarnerup paasinissaa tunngaviuvoq. Innarluuteqarneq pillugu siunnersuineq attaveqarnerlu inuussutigaarput. Matumani sulisuma tamarmik innarluuteqartuunerat akornutaanani iluaqutaavoq. Taakku innarluutaat siunnersuinitsinnik immikkuullarissumik paasititsisinnaavoq – taamaalillutalu allanut sanilliulluta tamanna iluaqutigaarput, Jacob Nossell oqarpoq.

- Innarluutillit eqimattatut ikippallaartut isumaqartoqarpoq, eqqunngilarli, kikkulluunniimmi piffissap ingerlanerani innarluuteqalersinnaapput, taamaammallu suliffeqarfiit suliffiillu namminneq eqqorneqannginnerminni piareersarlutik maanna aallartittariaqarput, Jacob Nossell oqarpoq.

Utoqqalineq piginnaasallu apparnerat

Kalaallit Nunaanni suliffeqartut aamma utoqqaliartorput, Aningaasaqarnermullu Siunnersuisooqatigiit utoqqalinermi soraarninngorsinnaanermut ukiut qaffanneqarnissaat, taamaalillutalu sivisunerusumik suliffeqarluta inuunissarput kaammattuutigaat. Tamatuma suliffeqarnerup akuutitsisuunissaa, inunnullu annikinnermik piginnaasaqartunut akuliuffigiuminarnerulernissaa pisariaqartippaa, Jacob Nossell isumaqarpoq.

- Utoqqaaneruleriartorpugut, tamatumalu soorlu illit uangalu sivisunerusumik sulisartutut inuunissarput nassatarissavaa. Tamatumattaaq uagut allallu innarluuteqalerlutaluunniit arlaatigut nappaateqalernerput aamma nassatarissavaa. Inuit qeersaanngoreersut suliffeqartiinnassagutsigit, taava suliffeqarneq akuutitsinerusoq aamma oqaluuserisariaqarparput, Jacob Nossell oqarpoq.

Inuit innarluutillit namminneq aalajangiinissamut pisinnaatitaaffeqartut, inuillu innarluutillit tamarmik sulisussaannginnerat, inuillu innarluutillit ikorfartorneqarnissamik ikiorneqarnissamillu siusinaartumillu soraarnerussutisiaqarnissamik pisariaqartitsisut, soorunami tamarmik ikiorneqassasut, taanna erseqqissaavoq.

- Siusinaartumik soraarnerussutisiaqarnissamik pisariaqartitsisut soorunami pissasut, sulerusuttullu suliffeqarnermut appakaannissamut ikorfartorneqassasut oqariartuutigaara.

Tunngaviusumik pisinnaatitaaffiit naammassineqassapput

- Eqqortumik ikiuinissaq inunnullu innarluutilinnut sulerusuttunut ikorfartuinissaq qulakkeerniarlugu tunngaviusumik pisinnaatitaaffiit naammassineqassapput, Jacob Nossell oqarpoq. Suliffeqarfiit sulisussaminnik innarluuteqareersunik innarluuteqalersunilluunniit atorfinitsitsillutillu tigumminniinnarniarnerat ajornartorsiutitaqarsinnaasoq taassuma nassuiaatigaa. Ikorfartuinermik aaqqissuussinerit, ilisimasat paasissutissallu amigaataasinnaapput, minnerunngitsumillu suliffeqarnermi inunnik innarluutilinnut isummat.

- Suliffeqarfiit arlaannit ilisimasanik paasissutissanillu pissarsisariaqarput, matumanilu ilisimasanik avitsisarnerup aallunnera, soorlu ikorfartuinermik aaqqissuussinerit, flexjobit suiffeqarnermilu inunnut innarluutillit pillugit isummanik allannguinissaq pingaaruteqarpoq, Jacob Nossell oqarpoq.

Inunnik assigiinngisitsinaveersaarnissamut ornikkuminassutsimullu aningaasaliisoqarli

Jacob Nosselip Nuummut tikinnermini issiavimmi kaassuartakkamiittunut illoqarfimmi angalaarsinnaanerup illunullu iserniarsinnaanerup qanoq ajornakusoortiginera malugaa.

inuussutissarsiutit erhverv

ATORFIIT Se alle jobs

Powered by Labrador CMS