Suliffiit 15-it ataatsimeersuaqataassasut
Aatsitassarsiorfiit pillugit ukioq manna ataatsimeersuarmi PDAC-mi nunanit tamalaanit peqataaffigineqartussami suliffeqarfiit 15-it peqataassapput, taannalu ukiut tamaasa Canadami illoqarfissuarmi Toronto-mi ingerlanneqartarpoq, Sulisitsisut Peqatigiiffiat nalunaarpoq.
Annonse
Ataatsimeersuarneq ukioq manna 7.-10- marts ingerlanneqassaaq, saqqummersitsisut 1.000-it missaat 20.000-init ornigarneqarnissartik naatsorsuutigalugu, soorlu aatsitassarsioqatigiiffinnit, aningaasaliisartunit suliffeqarfinnillu kiffartuussisunit pisunit.
Suliffiit pillugit mappersagaq tuluttooq Peqatigiiffiup suliarisimavaa, Kalaallit Nunaanni suliffeqarfiit 70-it ilisaritinneqarlutik, aatsitassarsiornermik aatsitassanillu ujarlernermik suliaqarnissamik piareersimasut. Mappersagaq ataatsimeersuarnermi saqqummiunneqassaaq, tamatumalu kingorna internet-imi quppernermi www.businesscatalog.gl-imi takuneqarsinnaassalluni.