Suliffissat Nunatsinnit annissorpavut

Nuup avataani takornariartitsinermik inuussutissarsiortut Air Greenlandip Nuummut missinnaasarnerminik ajornartorsiutaanik annertuumik eqqugaapput.

 Tamanna takornariartitsinermik inuussutissarsiortunut susoqarneranik ilisimanninngitsunut annertuumik ilungersunartorsiortitsivoq. Tamanna eqimattanut nunatsinniittunut, eqimattanullu nunatsinnukartunut tunngavoq, taakkumi Kalaallit Nunaannut feeriarlutik angalanissaminnut pilersaarutimik ingerlanneqarsinnaanera naluaat, timmisartummi tikinnissaa, uninnarnissaa uternissaaluunniit ilisimanngilaat.

Tamanna aamma nunatsinni angallannermut eqquivoq, timmisartormi Danmarkimeersoq tikissinnaanngikkaangat angalanissamummi pilersaarutit allanngortarput.

- Tikeraartussarpassuit angalanissamut pilersaarutaat allanngortarput, Kalaallillu Nunaanni angallassinerup tutsuiginassusaanut tamanna akisusarpoq, angalatitseqatigiiffinnullu nunatsinnut takornarianik angallassisunut aningaasatigut nanertuutaasarpoq.

- Taamaammallu Air Greenlandip Nuummut missinnaanngikkaangamik Kangerlussuup miffissanngortinnissaanik periuseqalernissaat neriuutigaarput.

Taama Jørgen Larsen, Albatros Arctic Circlemi Kangerlussuarmiittumi pisortaq oqarpoq.

Tamanna piffinni namminersortunut Nuullu avataani najugaqartunut annertuumik sunniuteqassaaq, Air Greenlandilli Nuumminngaanniit angallassinissamut taarsiullugu Kangerlussuarmit timmisartuussinissanut timmisartunik Dash8-nik angallassinissaa pisariaqassaaq.

- Taamattaaq timmisartunnut assartukkanik tunniussisarneq illoqarfinnut nunaqarfinnullu Nuup avataaniittunut annertuumik ajornartorsiutaalerpoq, usimmi sivisuumik uninngasalersarmata, taanna oqarpoq.

Unnuisarnerit pillugit Air Greenlandimik isumaqatigiissuteqarput?

- Ajoraluartumik naamik. Air Greenland qanoq iliornissaq pillugu inaarutaasumik aalajangerunanngilaq. Kangerlussuarli silap ajornerani miffissanngussagaluarpat pitsaassaqaaq. Tamatumalumi aamma kalaallit suliffiisa akileraarutitigullu isertitat nunatsinnit annillugit Danmarkimut nuunneqannginnissaat kingunerissavaa. Ilaasunik sullissineq Air Greenlandip Danmarkimut inissittagaa, nunatsinni annaasarparput, ingammillu maani Kangerlussuarmi taamaalillunilu Qeqqata Kommuniani. Nunatsinni suliffiit pitsaasut akileraarutinullu akiliutit nunatta avataanut inissinneqarnerat ajoraluartumik nunatsinni politikimi initunngilaq.

Ilaasut ingerlaqqissinnaanngitsut sullinneqarsinnaapput

Kangerlussuup timmisartup Kalaallit Nunaannukartup taamaatiinnarnerani ilaasussat kujammukartussat unnuinissaat naammassisinnaavaa? Siumut utimullu ingerlanermi ilaasunut 305-inut inissaqarpoq – tassa unnuinerit 610?

– Kangerlussuup timmisartuussinernut atorneqartarnera tamakkerlugu unnuinerit ilaasullu ingerlaqqissinnaanngitsut tamaasa sullinneqarsinnaajuaannarnikuupput. Ulluni ataasiakkaanni timersortarfik ilannguttariaqartarsimavarput, ataatsimulli isigalugu tamatigut iluatsittarpoq. Ilaasut ingerlaqqissinnaasannginneranni amerlanertigut Nuuk ajornartorsiutaasarpoq. Nunattali sinneranut timmisartuussinerit ingerlanneqarsinnaajuaannartarput. Kangerlussuup Atlantikoq qulaallugu miffissatut allatut akuerineqarnerani soorunami ingerlaqqissinnaajunnaarallartut sullissinnaavagut, Jørgen Larsen oqarpoq.

Kangerlussuarmut toqqaannartumik timmisartortarneq ulloq 17. marts allartippoq, tamannalu nunaqarfimmut isumalerujussuuvoq. Takornariat ingerlaarfinnik aqqusaartunik iluaquteqartarput. Tamatumalu aamma takornariat Kangerlussuarmiittussat Ilulissaniittussallu ingerlaarfinnik iluaquteqartarnerannik kinguneqarpoq. Taakkuli aamma Nuup tikinneqarsinnaanerata pitsaannginneranik suli eqqugaasarput, tamannami nunarput tamakkerlugu taamaatitsiinnarnernik paasiuminaatsinneqartunik kinguneqartarpoq.

- Missinnaasannginneq aamma Ilulissanut aqqummut sunniuteqartarpoq. Nuup miffigineqarsinnaasannginnera aamma hotelimik ingerlatsinitsinnut eqquisarpoq.

- Ataatsimulli isigalugu Kangerlussuarmi takornariartitsinermik inuussutissarsiorneq ingerlalluarneruvoq, tammajuitsussarsiorlutillu piniariartartut marsip 17-iata kingorna toqqaannartumik attaveqalerneq nuannaarutigisorujussuugaat paasivara. Piffissakilliortarpulli, piffissarmi piniarfissaq sivikillineqarpoq. Nalinginnaasumik ukiuunerani piniarneq februaarimi aallartittarpoq. Maannalu isertitassat taakku amigaatigaat. Taamaammallu aqqut toqqaannartoq allanngortikkusuttorujussuuarput, taamaalilluni aappaagu februaarip 15-ani aallartilluni, tassa qaammat ataaseq sioqqullugu. Tamanna aamma hotelimik ingerlatsinitsinnut iluaqutaassaaq, Jørgen Larsen oqarpoq.

Umiarsuarnimmi ukioq manna takornariartussat? Suli umiarsuarnik takornariartaatinik amerlasuunik ilaasunik, inuttaminnik usilersortussanillu tikittussaqarpisi?

- 2024-mut sanilliullugu ikilerialaarput. Ukioq manna umiarsuit takornariartaatit 40-t sinnerlugit maani ilaasuminnik taarsiinissaat ilimagalugulu pilersaarutigaarput. Suliffeqarfitsinni periarfissaq taanna nuannaarutigisorujussuullugulu iluarisimaarparput, Jørgen Larsen oqarpoq.

Arctic Circle Businessip ingerlataminnik Visit Greenlandimut, attaveqarnermut naalakkersuisumut, takornariartitsinermut naalakkersuisumut kiisalu Air Greenlandimut sinnerlutik oqaloqatiginnilluarnissaa kissaatigaat.

- Manna kommunimut inuiaqatigiinnullu isertitanut attuumavoq. Inuiaqatigiit isertitassanut periarfissaminnik atuilluarnissaat pingaaruteqartorujussuuvoq, uagullu suliffeqarfitsinnik nutaamik ineriartortitseqqinnissamut sinaakkutit pigaavut. Tamanna immikkoortunut tamanut atuuppoq, Jørgen Larsen oqarpoq.