Royal Greenland
Suliffissuup tunineqarnera aamma Aleqap nuannaarutigaa
Royal Greenlandip Tysklandimi Wilhelmshaven-imi suliffissuarminik tunisinera Naalakkersuisut ilalerpaat, taamatut oqarpoq Naalakkersuisut siulittaasuat Aleqa Hammond
Naalakkersuisut siulittaasuata Aleqa Hammondip, Siumut, naammagisimaarluinnarpaa Royal Greenlandip Tysklandimi Wilhelmshaven-imi selskabip suliffissuani tuniniaanermut suliniutit ilanngullugit tunimmagu.
Suliffissuaq millionilinnik pingasunik kisitsisitalinnik tunineqarpoq Singapore-mi selskabinut marlunnut, Sahara Investmant Group Pte. Ltd-mut aamma Meridian Investment Group Pte. Ltd-mut.
Naalakkersuisut ´suliffissuup tuniniaavimmi maanna ajornartorsiortumi tunineqarnera ilalerpaat. Tunisineq Naalakkersuisut nalilerpaat periuseqarnermi alloriarnertut eqqortutut, selskabip nunarput atlantikullu avannaa annertunerusumik sammilerniassammagu´.
– Wilhelmhaven-imi suliffissuup tunineqarnera naammagisimaartorujussuuvara, matumuunalu Royal Greenland qutsavigaara nersualaarlugulu, Aleqa Hammond oqarpoq.
Atuaruk: "Royal Greenland nuannaarpoq: Tysklandimi suliffissuaq tunivaa"
Royal Greenland A/S-ip suliffissuarmik tunisinermigut Tysklandip avannaani sulisut 500 missaanniittut sulisoriunnaarpai. Tamatuma kinguneranik imaaneersunik tunisassiorfissuup tamatuma kingorna sulisui 1500-unngorput, Kalaallit Nunaanni 800-uullutik.
Wilhelmshaven-imi suliffissuup tunineqarnera siullerpaamik atorneqassaaq selskabip aningaasaqarnerata pitsanngorsarneranut, tamatumani ilanngullugu selskabip akiligassaasa ikiliserneqarnerannut, namminersorlutik oqartussat nalunaarput.