Sulinermi ajutoortoqannginnissaa anguniarlugu Sullivinnik Nakkutilliisoqarfik iliuuseqalerpoq
Sulinermi ajutooreernermi kingorna inuit sisamat ukioq manna toqukkut qimagupput, taamaattumik sulinermi ajutoortoqannginnissaa anguniarlugu Sullivinnik Nakkutilliisoqarfik iliuuseqarniarpoq.
Sanaartornermi suliaqartut quersuarni suliaqartut sisamat sulitillutik ajutooreernerminni toqukkut qimagupput, ataaserlu sulitilluni ajoqquserujussuarluni.
Sullivimmi avatangiisit pillugit inatsisit suliffeqarfinnit malinneqarnersut Sullivinnik Nakkutilliisoqarfik suliffeqarfinnik nakkutilliinerulissasoq, Sullivinnik Nakkutilliisoqarfik Sermitsiaq.AG-mut allappoq.
Sulitilluni ajutoortoqannginnissaa anguniarlugu suliffeqarfiit anginerusut qanimut suleqatigineqartariaqartut Sullivinnik Nakkutilliisoqarfik neriuuteqarpoq.
- Suliffeqarfinni sulisut isumannaatsumik sulinissaat sulisitsisunit qulakkeerneqartartussaavoq. Aamma sulinermi ajutoortoqannginnissaa qulakkeerneqartartussaavoq, Kalaallit Nunaanni immikkoortortaqarfimmi pisortaq Casper Kronow oqarpoq.
Apersorneqarnissamut piffissaqanngitsoq
Atortut isumannaatsumik eqqortumillu atorneqarnissaat suliffeqarfiit sulisuminnut aamma ilinniartitsisartussaapput. Atortut eqqortut atorneqartarnissaat sulisullu atortunik suliaqarnissamut aamma pisinnaasaqarluarnissaat sulisitsisunit isumannaarneqartartussaasoq, Sullivinnik Nakkutilliisoqarfik ilisimatitsivoq.
Piumasaqaatit taakku suliffeqarfinnit malinneqarnersut Sullivinnik Nakkutilliisoqarfiup nakkutigisarpaa.
Sullivinnik Nakkutilliisoqarfiup Kalaallit Nunaanni immikkoortortaqarfiani pisortap apersorneqarnissaa Sermitsiaq.AG-mit qaammat ataaseq ujartornikuugaluarpaa kinguneqanngitsumik. Folketingimut qinersisoqartussaanera pissutigalugu oqaaseqarsinnaanatik Sullivinnik Nakkutilliisoqarfik nalunaarpoq.
Aaqqissuisoqarfiup apeqqutissaralui:
Nuummi suliffeqarfinni sulitillutik ajooreernerisa kingorna Sullivinnik Nakkutilliisoqarfiup suna akisussaaffigaa
Sullivinnik Nakkutilliisoqarfimmi sulisut ikippallaarmata suliassat kivinneqarsinnaanngillat
Sullivinnik Nakkutilliisoqarfimmi sulisut amerlanerusimasuuppata ajutoornerit ilaat pinngitsoortinneqarsimasinnaagaluarnersut
Piffissap sivikitsup iluani sulitillutik ajutooreernermi kingorna toqukkut qimaguttunut tunngatillugu suut ajoqqutaanerisa kingunerisaannik taama pisoqarsimanersoq Sullivinnik Nakkutilliisoqarfik itisiliisinnaanersoq aamma paaserusunneqaraluarpoq
Sullivinnik Nakkutilliisoqarfik Sermitsiaq.AG-mut tusagassiutinut nalunaaruteqarpoq. Sullivinnik Nakkutilliisoqarfik sulisumik ataatsimik atorfinititsisimasoq ilisimatitsissutigineqarpoq. Kalaallit Nunaanni nakkutilliisoqarnerulernissaa siunnertarineqarpoq.
Nakkaasoqannginnissaanik suliniutit
Kalaallit Nunaanni Sullivinnik Nakkutilliisoqarfik qassinik sulisoqarnersoq ilisimatitsissutigineqanngilaq. Aamma sanaartornerit amerliartortillugit Sullivinnik Nakkutilliisoqarfimmi sulisut piginnaasaat qanoq ineriartortinneqarsimanersut ilisimatitsissutigineqarnani.
Suliffeqarfinnilli misissuisalernerunissaq siunnertarineqartoq Sullivinnik Nakkutilliisoqarfik paasissutissiivoq
- Sulinermi avatangiisit pitsanngorsarnissaat siunnertariuarparput. Sullivinni nakkaasinnaasut qanoq pinaveersaartinneqarsinnaanersut maanna suliniuteqaleruttorpugut. Tamakku pinaveersaartinniarlugit suliffeqarfiit suleqatigineqassapput, ilisimatitsissutigineqarpoq.