Sulisitsisut ataatsimiititaliaanni siulittaasoq: Namminersorlutik Oqartussat naapertuilluanngitsuupput
Unnuap ingerlanerani Royal Greenland innuttaasunik peqataatitsinani Namminersorlutik Oqartussanit pingaarutilimmik naggataagullu aningaasatigut ikiorserneqariataarpoq.
Ukiualuit matuma siorna Namminersorlutik Oqartussat ingerlatseqatigiiffiutaat Royal Greenland 3000 tonsinik qaleralittassiissuteqarpoq, aalisakkallu tamakkerlugit aalisakkerivinnut, ilaatigut Paamiuniittumut Qasigiannguaniittumullu, tunineqartarnissaat piumasaqaatigineqarpoq.
2024-mut pisassiissutit arlallit qanittukkut Naalakkersuisut saqqummiuppaat, tassanilu Royal Greenlandip tamakkiisumik tunisisarnissaminik piumasaqaat 25 procentimut appartissimagaa paasinarsivoq, tamannalu Sulisitsisuni aalisarnermut ataatsimiititaliami siulittaasup Henrik Lethip tupigusuutigaa.
Allanngueriasaartoqarneq
- Namminersorlutik Oqartussat qaleralittassiissutit pillugit piumasaqaatinik allanngortitserujussuarput, aalisarnermik inuussutissarsiuteqartut tusarniaaviginagit. Royal Greenlandimut piumasaqaatit nutaat aatsaat allagaatitigut paasisimavavut, Henrik Leth oqarpoq.
Suliassaqarnermut tunngavilersuutip aalajangiisuujunnaariasaarnera tupigusuutigaa.
- Tunisinissamut pisussaaffiup allanngortinneqarneratigut Royal Greenland 40 millionit koruunit missaannik immikkut isertitaqarsinnaasoq naatsorsuutigaara, Sulisitsisut Ataatsimiititaliaanni siulittaasoq oqarpoq. Aalisakkanik Danmarkimut nunarsuarmullu tunisinissaminngarnit tunisassiorfinnut nunatsinneersunut tulaassineq aalisarnermik ingerlatseqatigiiffinnut akisunerusoq nassuiaataavoq.
Royal Greenland ajornartorsiortoq
Royal Greenlandip pisortaanera Susanne Arfelt Rajamand juulli sioqqullugu nalunaarpoq ingerlatseqatigiiffik isertitaqarniarnermigut unammilligassaqartoq, ukiumullu 100 millionit koruunit missaannik isertitaqarnissamik naatsorsuuteqarnertik eqquutsinneqarsinnaanngitsoq.
- Ullumikkutut isikkoqartillugu, ukiup naaliivinnerani ukiumut angusat pitsaasut ilungersorluta anguniarsarigaluarpavut, pisortaq decembarip ulluisa 18-ianni Sermitsiaq.AG-mut oqarpoq.
(Aamma atuaruk:) Link
Periuseq isornartorsiorneqartoq
Tuniseqqusinnginnerup sakkukillisinneqarneranut Namminersorlutik Oqartussat suliffeqarfiutaata aningaasatigut ajornartorsiornera pissutaanersoq Henrik Lethip naluaa.
- Namminersorlutilli Oqartussat ammasumik periaaseqannginnerat isornartorsiorneqarsinnaavoq. Aalisarnermimi ingerlatseqatigiiffiit allat tamarmik nunani tamalaani niuerfinni akit tatineqarnerannit unammilligassaqartinneqartarput. Tamanna naapertuilluanngitsuliornertut ippoq, Sulisitsisut Ataatsimiititaliaanni siulittaasoq oqarpoq.