Sulisitsisut Fasttrack atorlugu aaqqissuussamut atatillugu Naalakkersuisunut isumaqataanngitsut
Kalaallit Nunaanni Sulisitsisut nunanit allaneersunik sulisussarsiortarnissamik aaqqissuussap ajunngitsuunera nassuerutigaat. Oqaatigaluguli aaqqissuussaq siunertarineqartutut suli atuutilersimanngitsoq.
Nunanit allaneersunik sulisussarsiortarnissamik aaqqissuussaq siorna septembarip qaammataanili atuutilereeraluartoq, sulisussanik Kalaallit Nunaannukartitsisarnissamut utaqqisarneq suli sivisuallaaqaaq.
Kalaallit Nunaanni Sulisitsisut naalakkersuisut aaqqissuussamik illersuillutik oqaaseqareersut taamatut oqaaseqarput.
- Nunanit EU-meersunit sulisussarsiornermi suliat suliarineqartarnerat suli qaammammik ataatsimik sivisussuseqartarput, nunarsuulli sinneraniit sulisussarsiornermi sulit qaammatit pingasut-tallimat ingerlanneqartarlutik, Kalaallit Nunaanni Sulisitsisut pisortaat Christian Keldsen nalunaaruteqarluni allappoq.
Taamatut nalunaaruteqarput, Naalakkersuisut nittartakkamikkut aaqqissuussamik illersuillutik oqaaseqareersut. Kalaallit Nunaanni sulisitsisut marluk nunanit allaneersunik suliussarsiortarnissamik aaqqissuussap arriippallaamik ingerlanneqarnerarlugu isornartorsiuinerat pillugu aviisimi Sermitsiami ilanngutassiarineqarmat Naalakkersuisut akissuteqarlutik illersuisimapputereersut.
- Kissaatigisat eqquutsinneqanngitsut
Naalakkersuisut tamatumunnga atatillugu allapput:
- Sivisuumik utaqqisoqartarnera suliffeqarfiit pakatsissutigigaat Naalakkersuisut paasisinnaalluarpaat, kisianni aamma maannamuugallartoq misilittakkat takutippaat fasttrack atorlugu aaqqissuussineq siunertarisat malillugit ingerlasoq.
Kalaallilli Nunaanni Sulisitsisut tamatumunnga isumaqataanngillat. Kattuffimmit oqaatigineqarpoq, aaqqissuussaq sulisitsisut kissaataannik eqquutitsinngittoq:
- Aaqqissuussaq atuutsinneqalersimasoq sulisitsisut nunanit allaneersunik sulisussarsiortarnissamik kissaataannik eqquutitsinngilluinnarpoq, naatsorsuutigineqarsimavormi sulisitsisut sulisussarsiornerannik Danmarkimi oqartussat suliaqarneranni sulisussat suliassamik aallartitsiniassammata sulisussat maanga nunamukartinneqartarnissaat. Sulisoriniagaq itigartinneqassappat, sulisitsisup pisussaaffigaa, sulisup pineqartup piaarnerpaamik nunagisaanut utertinneqarnissaa, Christian Keldsen allappoq.
Nunanut allamiunut inatsit allanngortinneqartariaqartoq
Naalakkersuisut ilisimatitsissutigaat, inuit nunamut tikinnerminni ingerlaannaq sulisalernissaannik aaqqissuussisoqassappat nunanut allamiunut inatsit allanngortinneqartariasssasoq. Naalakkersuisut tamanna pillugu Danmarkimi oqartussat oqaloqatigingaat oqaatigineqarluni.
Christian Keldsenip sulisussaaleqineq innersuussutigalugu oqaatigaa, suliap suliarineqarnera arriippallaartoq:
- Inatsit allanngortinneqartariaqassappat, Kalaallit Nunaanni Sulisitsisuniit Naalakkersuisunut sakkortunerpaamik kaammatuutigineqarpoq, inatsit piaarnerpaamik allanngortinniarlugu Naalakkersuisut oqaloqateqarnerminni eqeersimaarnerusariaqartut. Sulisitsisut sulisussaaleqinerat pinartuuvoq maannakkullu iliuuseqarfigineqartariaqarluni, taanna allappoq.