Sulisitsisut: Nunarput Finlandimi nersualaarneqarluarpoq
Siunissami nunat avannarliit suleqatigiinneranni Kalaallit Nunaat pisuussutaalu pingaarutilimmik inissisimasinnaasut, Sulisitsisuni pisortaq nunat avannarliit siuttuisa ataatsimeereerneranni oqarpoq.
Jacob Nitter Sørensen, Air Greenlandip pisortaanera, Naalakkersuisut Siulittaasuat Jens-Frederik Nielsen (D) kiisalu Sulisitsisuni pisortaq Christian Keldsen ataatsinngornermi nunat avannarliit ministeriisa Finlandimi ataatsimiinneranni peqataapput.
Assi: Grønlands Erhverv
Inuussutissarsiortut sulisitsisullu peqatigiiffiat Sulisitsisut nunat avannarliit ministeriisa naalagaaffillu siuttuisa Finlandimi ataasinngornermi ataatsimiinneranni peqataapput.
Kalaallit Nunaat Savalimmiullu tassunga atatillugu siullermeerlutik qaaqquneqarput, Naalakkersuisullu Siulittaasuata Jens-Frederik Nielsenip (D) saniatigut aamma Sulisitsisut kiisalu Air Greenlandimi pisortaaneq Jacob Nitter Sørensen peqataapput.
Sulisitsisuni pisortap Christian Keldsenip ataatsimiinnermi nunat avannarliit nunatsinni aatsitassarsiornermi akuunerunerat tamanut illuatungeriinnut iluaqutaasinnaanera saqqummiuppaa.
Oqariartuut tigulluarneqartoq
Ilaatigut aatsitassanit pingaarutilinnit Europap mingutsitsinngitsumik digitalimullu ikaarsaarnerminni pisariaqartitaanit 34-nit Kalaallit Nunaata 25-t pigigai erseqqissaatigaa:
- Europap Skandinaviallu suliffissuaqarnikkut siuarsimasuunertik suliffissuarnillu nukittuunik amerlasuunik peqarnertik ilisarnaatigaat, aatsitassarsiornerli akuiaanerlu annertuumik pigineqanngillat taamaalillutillu mineralinik aatsitassanillu arlalinnik pigisaqanngillat, taakkulu ilaatigut suliffissuaqarnermi piusumi ilaatigullu mingutsitsinngitsumut ikaarsaarnermi pisariaqartinneqarput. Skandinaviap teknologimi mingutsitsinngitsumi nukittuumik inissisimanini ilisarnaatigaa.
- Kinamik pinngitsuuisinnaajunnaarneq aarlerinarpoq, Europamilu piffiit amerlasuut gasimik Ruslandimeersumik pinngitsuuisinnaanngillat. Aaqqiissutinik allanik nassaarniartoqartariaqarpoq, Christian Keldsen Sermitsiamut nassuiaavoq, imalu nangippoq:
- Aatsitassat Kalaallit Nunaanneersut atorneqalissappata, naalagaaffiit arlaatigut akuunissaat pisariaqartussaavoq, tamannaluuna Kinap nukittuffigisorujussuugaa. Oqariartuuterpullu anngulluarlutigu isumaqarpunga.
Kalaallit Nunaat eqqaamasiuk
Skandinaviap nukittorsarnissaminik allanillu isumalluuteqannginnissaminik oqariartornermini Kalaallit Nunaannik peqataatitsinissaminik eqqaamanninnissaa, Sulisitsisut oqariartuutiminni siunertarigaat, Christian Keldsen oqarpoq:
- Pinngortitamik pisuussutilimmik pisariaqartitaannik uagut peqarnerput eqqaamassavaat.
- Isumalluuterpassuarnik pigisaqarnermut inuit ilisimaaraat, ilaasali naatsorsuutigisaminnit annertunermik peqarnerput paasivaat, Christian Keldsen oqarpoq.
Kalaallit Nunaanni Sulisitsisut siullermeerlutik nunanit avannarlernit allanit inuussutissarsiornermi nuimasut allat peqatigalugit peqataanerat, pisortap pitsaasorujussuusoq ilanngullugu oqaatigaa:
- Tamannalu iluarisimaartupilussuuarput. Kalaallit Nunaannik akuerinninneruvoq, maannalu aaqqissutit pillugit oqaluuserinninnermi peqataavugut, unammilligassallu ilaanni, Skandinaviap oqaluuserisaani aaqqiissutinut ilaanitsinnik oqaloqataasinnaalerpugut.
- Politikikkullu aalajangiisartut inuiaqatigiinni aaqqissutit ilaannut namminersorlutik inuussutissarsiortunik qitiutitsinerat pitsaasuuvoq, Christian Keldsen oqarpoq.
