SULISITSISUT: Royal Arctic Line sullitanut tusaaniassaaq
Kalaallit Nunaata avammut nioqqutigisartagai immikkut soqutiginaatilittut nalilerneqarsinnaagunanngillat, Sulisitsisut pisortaat, Christian Keldsen, oqarpoq, taassumalu Royal Arctic Linep Aalborg Havnimik atuiunnaarniarluni aalajangersimanera politikkimik tunngaveqarsimassasoq ernummatigaa.
Royal Arctic Linep pisortallu Verner Hammekenip Aalborg Havnip qimanneqarnissaanik taarsiullugulu Aarhus Havnimik ukioq manna juunimiit atuilernissamik oqaatigisaat – taamaalillutillu qalerualinnik avammut nioqquteqartut angisuut arlallit inassuteqaataannik malinnginnikkumannginnerat Sulisitsisuni (GE) pisortaq, Christian Keldsenip, eqqumiigaa. Polar Seafoodip aamma Iceberg Seafoodip ingerlaarfinni Aalborg Havnip attatiinnarnissaanik Royal Arctic Linemut kimigiisissutaat immikkut soqutigisaatutut isumaqarfiginngilluinnarpaa.
– Kalaallit Nunaannit avammut nioqquteqarneq immikkut soqutigisaasutut oqaatigineqarsinnaanngilaq. Royal Arctic Linep pingaarnersut suliassai tassaapput ilaatigut Kalaallit Nunaata pilersorneqarnera, ilaatigut avammut nioqquteqartartut sinnerlugit assartuussineq, kisermaassinissamik akuersissutip nassatareqqaarsimasaatut assartugassaatiminnik namminneerlutik avammut assartuisinnaanngitsut, Kalaallit Nunaannut tamarmiusumut umiarsuaatileqatigiiffimmi ingerlatat pitsaanerpaaffissaaniitilerniarlugit.
Avammut tunisat ataatsimoortumik tapiissutinit amerlanerusut
Sulisitsisut naapertorlugit aalisarnermi inuit 3.000-it missaanniittut suliffeqarput, taakkualu tamarmik immikkut marlunnik pingasunilluunniit ilaqutaqarpata, taava inuit 10.000-it sinneqartut Kalaallit Nunaata avammut nioqquteqariaasianit sukumiisumit unammillersinnaalluartumillu toqqaannartumik kalluarneqarsimassapput.
– Taamaattumik immikkut soqutigisaanngilaq, kisiannili inuiaqatigiinni pingaaruteqarluinnartuulluni oqariartaatsillu eqqaaneqartup ”Kalaallit Nunaanni innuttaasut tamarmik” ilagalugu. Aalisakkanik, raajanik allanillu avammut nioqquteqarneq aamma nunani tunisassiat tamarmiusut nalingisa ima annertutigisumik ilagivaat (1/3-ip missaanniilluni) immikkut soqutigisatut oqaatigineqarsinnaanani, kisiannili Royal Arctic Linemut suliassat qitiulluinnartut ilagalugu. Avammut nioqqutigineqartartut nalimikkut ataatsimoortumik tapiissutinit amerlanerupput, taamaattumillu tunngaviullutik inuiaqatigiit najukkatta inissisimaffigisaat, Christian Keldsen oqarpoq, taassumalu Royal Arctic Line kaammattorpaa Aalborg Havn ingerlaarfinnut suli ilaatinneqaqqullugu.
Oqaluttuaq tamaat Sermitsiami sapaatip-akunnerani matumani saqqummersumi atuaruk, ugguuna pisiarisinnaavat: