Sulisitsisut: Suliassavut suli ilisimanngilavut

Nunarsuarmi tamarmi inuussutissarsiortut, illersornissamik suliaqartut suliassaannut atatillugu aaqqiissutissanik qanoq neqeroorsinnaanerminnik, Illersornissamut ministereqarfiup atortussanik pisiniarnermut allaffianut oqaluttuarnissaminnut ukioq manna periarfissinneqaqqipput. 

Illersornissamik suliaqartut suliassat pillugit ulloqartitsineri aggustip 20-anni 21-annilu Københavnip eqqaani Ballerup Idrætsbymi imaluunniit Super Arenami ingerlanneqarput. Ullut taakku Illersornissamut ministeeriaqarfiup atortussanik pisiortornermullu Aqutsisoqarfianit – FMI-mit aaqqissuunneqarput.

Suliffeqarfinnut ulloqartitsinerit, inuussutissarsiortut illersornissamut tunisassiaminnik nittarsaassisarneri, ingammik soqutigineqarnerulerput ministeriunerup Mette Frederiksenip ukioq manna siusinnerusukkut illersornissamut pisortamut ima oqarnerata kingorna: Pisigitsi, pisigitsi, pisigitsi.

Suliffeqarfiit Nunatsinneersut arlallit aamma Sulisitsisut peqataapput. Suliffeqarfiit Nunatsinneersut uku peqataaniarlutik nalunaarsimapput: Air Greenland, Deres Auto, Arctic Law Greenland, Evergreen Aviation, Kingo Greenland, Masik aamma Nuna Law.

Kalaallit suliffeqarfii illersornissamut oqartussat ukioq manna illersornissamut atortussanik nittarsaassinermi qanoq pissarsiaqarsimanerannik Sulisitsisuni pisortaq Christian Keldsen aperineqarami ima akivoq:

- Suliassanut aalajangersimasunut tunngasut neqeroorutigineqartussat suli amigaataagamik. Taamaattumik suliassat suunersut qanorlu annertutiginersut ilisimanngilavut, taamaattumik suut naammassisinnaanerlugit suullu naatsorsuutigisinnaanerlugit eqqarsaatiginerusariaqarpavut, ingammik assartuinermi sanaartornermilu suliariumannittussarsiuussinernut atatillugu.

Christian Keldsen ukioq manna siornatigornit saaffigineqarnerusimavoq, amerlanertigullu suleqatigiinneq aamma Nunatsinni inuussutissarsiortut kikkut saaffigineqassanersut pillugit saaffigineqartarluni.

- Taamaattumik suliassanut neqeroorutigineqarsinnaasunut Kalaallit suliffeqarfiisa suleqataanissaat naatsorsuutigaara, oqarpoq.

Christian Keldsenip suliassanut neqeroorutigineqarsinnaasunut tunngasunik saqqummersitsinerni kalaallit suliffeqarfiutaat soqutiginnittunut avataaniittunut attaveqalersinniarlugit piffissarujussuaq atortarpaa.

Sulisitsisut ukiut pingajussaannik peqataapput, ukioq mannalu siornatigornit allaanerulluinnartoq takusinnaavaa.

- Kalaallit Nunaanni iluatsitsilluarumagaanni suliffeqarfinnik najukkamiittunik suleqateqartoqartariaqartoq paasinarsigami. Kalaallit inuussutissarsiortut piginnaaneri ilumut akuerineqartut misigisimavara. Tamakkua ersarissarnissaat ilungersunarsimaqaaq, isumaqarpungali tamatumunnga atatillugu tamanna pingaarnertut suliassarigipput, Christian Keldsen Sermitsiamut oqarpoq.

DALO Industry Days 13-issaannik 2025-mi aaqqissuunneqarpoq.

FMI-mit naatsorsuutigineqartutut, ullut marluk ingerlaneranni, suliffeqarfiit 700-ngajaat nunanit assigiinngitsunit 27-t missaanneersut peqataasunut qaaqqusanullu 12.000-ingajannut atortunik saqqummersitsillutillu nittarsaassipput.

DALO Industry Days Skandinaviami illersornissamut saqqummersitsisarnerit annersaraat aamma suliffeqarfinnut, oqartussanut, nunanit tamalaanit aallartitanut sakkutooqarnermilu oqartussanut naapittarfiulluni pingaarutilik.