Sulisussat piginnaanillit aalajaatsullu amigaatigineqartut
Suliffeqarfippassuit ingammik akunnittarfinnik neriniartarfinnillu ingerlatsisut sulisussarsiniartarnertik ajornartorsiutigaat. Caféni Nuummiittuni sulisut tamangajammik Filippinerineersuupput. Sulisut inuttassarsiukkavut nunaqavissunit qinnuteqarfigineqarneq ajorput, neriniartarfiutilik oqarpoq
Peqqissaasoq ulloq unnuarlu paaqqinniffimmut Sungiusarfik Aaqamut, Pinngortitaleriffimmut immami miluumasunut uumassusilerisoq, GUX Nuummi ilinniartitsisoq, Tele-Postimi ingeniøri, Royal Greenlandimi eqqiaasunut qullersaq, politiit angallataannut Sisak III-mut aquttoq imaluunniit Nalunaarasuartaateqarnermi Aqutsisuni inatsisileritooq. Kommuneqarfik Sermersuumi atorfiit inuttassarsiukkat allattorsimaffiat takeqaaq. Sermitsiaq.AG-ip internetikkut atorfinnik inuttassarsiuussisarfiani inuttassarsiorneqartut maanna 98-iupput tamannalu qaqutigoortuunngilaq. Suliffeqarfiit amerlasuut sulisussaminnik piginnaanilinnik aalajaatsunillu amigaateqartorujussuupput. Tamanna Sermersooq Business Councilip inuussutissarsiornermut misissueqqissaarnerani tamanut saqqummiunneqaqqammersumi uppernarsarneqarpoq, taanna Paamiuni, Tasiilami, Ittoqqortoormiini aamma Nuummi suliffeqarfinnik ingerlataqartunillu apersuinernik tunngaveqarluni suliaavoq.
Aviisi Sermitsiaq taama allaaserisaqarpoq.
Misissueqqissaarnermi paasisat naapertorlugit ilungersunartorsiorfigineqaqisoq tassaavoq sulisussanik piukkunnartunik amigaateqarneq. Suliffeqarfiit sulisunik piukkunnartunik amigaateqarnerup kinguneranik ingerlatamik ilaannik matusisariaqarsimanerannik aamma assersuutissaqarpoq.
– Akissuteqartut 73,3 procentiisa piginnaanilinnik/sulileriaannarnik sulisussarsisinnaaneq ajornarluinnarnerarpaat imaluunniit ajornakusoortorujussuunerarlugu. Suliffissaaleqisoqanngingajattoq aamma paasineqarpoq. Nalinginnaasumik nunaqavissunik sulisussarsisinnaanermit avataaneersunik sulisussarsisinnaaneq ajornannginnerorpasippoq, tamatumanili sulilersussanut suliffeqarfittut ajunngitsorsiassanik neqerooruteqarsinnaaneq killeqarluni. Tamakku saniatigut killiliisut ilagaat nunani tamalaani siuariartortoqarnera, taamaalilluni Nunarput nunanut qanigisatsinniittunut, sulisussanik aamma amigaateqartunut, unammillernermini pilerinannginnerusarmat. Nunatsinni sulisartut aamma sulisut nunanit allanit atorfinitsinneqartartut sulisartut niuerfigigaat, misissueqqissaarnermit nalunaarusiami allassimavoq.
Tamanna pillugu aviisimi Sermitsiami paasisaqarnerugit. Uani ataani linki aqqutigalugu aviisimut isissutissarsigit: