Aalborg
Sulisut 145-t akornanni kalaallit pingasut sulisorineqartut
Danmarkimi Royal Arctic Linemi kalaallillu suliffeqarfiiini allani kalaallinik sulisoqarpiannginnera Siumumit Doris Jakobsenimit tupigusuutigineqarpoq
Folketingimi Siumut tunuliaqutaralugu ilaasortaq Doris Jakobsen Aalborgimiippoq sapaatip akunnerani kingullermi.
Kalaallit suliffissaaleqisut ilaatigut naapippai.
- Aammattaaq uagut inuiattut nammineq pigisarput Royal Arctic Logistic takuniarpara. Suliffeqarfik kusanartoq ingerlalluartorlu, 145-nik missaannik sulisoqarpoq. Taakkunannga kalaallit pingasuinnaat suleqataapput. Aap, atuakkat takkorliunngilat. Ilumut uagut nammineq suliffiutitsinni kalaallit pingasuinnaat sulipput, tusagassiutinut nalunaarummi Doris Jakobsen allappoq.
Suliffeqarfimmi kalaallit pingasuinnaat sulinerat Doris Jakobsenimit naammaginartinneqanngilaq.
Doris: Kalaallit sulisorineqarlik
Politikkerip Aalborgimiinnerata nalaani Danmarkimi Naalakkersuisut 4 million koruunit kalaallit pitsaanerusumik maani inuiaqatigiinni peqataalernissaannut atugassat, soorlu Doris Jakobsenimit isumaqatiginninniaqataaneratigut aningaasat pillugit inatsisissamut isummersoqataasoq –inatsit atorneqarsinnaasunngortippaat.
- Suleqataaffigerusuppara, uagut ataatsimoorluta Royal Arctic Logistic-imik piginnittuusugut kalaallinik amerlanerujussuarnik Aalborgimi sulisorineqalernissaa sulissutigilissagutsigu. Royal Greenlandimi aamma Aalborgimiippoq, tassa marlorsuarnik angisuunillu suliffeqarfiuteqarpugut, suliffissanik aaqqissuussisinnasunik aammalu kalaallinik ilinniartuuteqarsinnaasunik.
Periarfissat
- Anguniartariaqarparput suliffiit ilaasa kalaallinit tiguneqarnissaat, taamaasilluni atorfiit ilaasa kalaallinit tiguneqarnissaat sulissutigisinnaavarput, saniatigullu ilinniarfissanik sungiusarfissanik pilersitsisinnaavugut, kalaallit atorfinnikkusuttut pisariaqartippassuk, tamannami suliffeqarfiutitta CSR-mik suliniutitut ingerlalluarsinnaavaat, Doris Jakobsen oqarpoq.
Aningaasat pitsaasumik atorneqarnissaat pingaartippaa.
- Taama isiornitsigut Danmarkimi suliffiutigut ilinniarfittut atorsinnaavagut, - iluatsillugulu siunissami ilinniarsimasunik sulisoralugillu pisariaqartiligassatsinnillu piareersarfiusinnaapput. Periarfissat nammineq pigisavut atorluarniartigit, tassami tamanna pissusissamisoorpoq. Aammami innuttaaqativut Aalbormi illoqarfinnilu allani najugaqartut, - taama isumaliortarput, Doris Jakobsen oqarpoq.