Sulisut kattuffiata atlantikoq qulaallugu angallassisarnermi suliumajunnaartoqassasoq aarlerisaarutigigaa
Air Greenlandip mikanikerit timmisartulerisartut isumaqatigiissuteqarfiginngippagit, Kalaallit Nunaannut Kalaallillu Nunaanniit timmisartukkut angallassineq apriilip qulingiluaaniit matuneqassaaq, sulisut kattuffiannit Dansk Metalimit oqaatigineqarpoq.
Dansk Metalip Air Greenlandillu isumaqatiginninniarnerat unittoorsimavoq.
Illuatungeriit taakku mekanikerit timmisartulerisartut pillugit isumaqatigissami nutaami atugassarititaasut isumaqatigiinngissutigaat, taamaammallu Dansk Metalimit aarlerisaarutigineqarpoq apriliip qulingiluaaniit Air Greenlandimi suliumajunnaarniarlutik.
Dansk Metal tusagassiorfinnut nalunaaruteqarluni taamatut ilisimatitsissuteqarpoq.
Dansk Metal naapertorlugu Air Greenlandip akissuteqarluni mekanikerit timmisartulerisartut tamaasa apriilip aqqarnanit mattunniarpai. Sulisut kattuffiat naapertorlugu mattussisoqarpat Kalaallit Nunaanni assartuineq unitsinneqassaaq.
Dansk Metal naapertorlugu aaqqiagiinngissuteqarnermut pissutaavoq, sulisut kattuffiata akissarsianik appaasoqarnissaanut akuersaarusunnginnera:
Akissarsiat apparneqarniarnerat akuersaarusunngikkaat
- Ilaasortatta akissarsiaat illersorpavut. Taamaammat suliffeqarfiup aningaasaqarnera pitsaasuutillugu ilaasortat akissarsiaannik appaaniarneq akuersaarsinnaanngilluinnarparput. Sulisut naleaqartitseqataalernikuupput, tamannalu maannakkut malugisariaqarpaat. Air Greenlandi isumaqatiginninniarnermi nikerianngippat suliumajunnaarnissamut piareeqqavugut, Dansk Metalip kattuffiani allatsi isumaqatiginninniarnermilu pisortaq Keld Bækkelund oqarpoq.
Taassuma ilanngullugu oqaatigaa, sulisut kattuffiata nunap iluani angallassineq eqqorusunngikkaa:
- Kalaallit Nunaanni silaannakkut angallassineq eqqorusunngilarput, kalaallillu maanna eqqugaanerat ajuusaarutigilluinnarparput. Atlantikoq qulaallugu angallassisarnermi taamaallaat suliumajunnaarniarpugut, Keld Bækkelund oqarpoq.
Illuatungeriit naapeqatigeeqqinniarlutik oqaaseqarsimanngillat. Sermitsiaq.AG-mit Air Greenland suliaq pillugu oqaaseqartinniarneqarpoq.
Mekanerit marluk suliumajunnaarnissaannik aarlerisaarisoqartoq
Keld Bækkelundip Sermitsiaq.AG-mut itisiliilluni oqaatigaa, sulisut kattuffiannit aarlerisaarutigineqarsimasoq, mekanikertit marluk atlantikoq qulaallugu angallassisartumik timmisartorsuarmik Norsamik misissuisarlutillu aserfallatsaaliuisartut.
Apeqqut: Oqaatigaarsi Air Greenlandip innuttaasut suliami sallunaveeqqutitut tigusimagai. Atlantikoq qulaallugu angallassisarnermi suliumajunnaartitsinissamik oqarassi aamma ilissi sallunaveeqqutitut taakku tigunngilisigit?
- Taamatut isumaqanngilanga, atlantikoq qulaallugu allatigut periarfissaqartoqarnera pissutigalugu. Ilaasut Islandikkoorlutik timmisartumut allamut ilaasinnaapput. Danmarkip Kalaallillu Nunaata akornanni timmisartuussisarneq matunianngilarput.
- Når Air Greenlandip ilaasortatta sinneri Kalaallit Nunaanni sulisut timmisartunillu isumaginnittartut mattutissagunigit, nunap iluani angallassineq tamaat matusinnaavaat, Keld Bækkelund oqarpoq. Isumaqatiginninniartup oqaatigaa, mekanikerit timmisartulerisartut 70-it missaanniittut mattussinermit eqqorneqassasut.
Keld Bækkelundip ilanngullugu oqaatigaa, sulisut kattuffiannit oqaloqatigiittoqarnissaa neriuutigineqartoq aamma illuatungeriit Danmarkimi Isumaqatigiissitsiniartarfimmut aggersarneqarneqarnissaat naatsorsuutigineqartoq.
- Suliumajunnaarnissaq pisariaarutsillugu oqaloqatigiittoqarnissaa neriuutigaarput, Keld Bækkelund oqarpoq.