Svane: Naammagittarneq killeqarpoq
Borgmester Jess Svanep aalisarnermut, piniarnermut nunalerinermullu naalakkersuisumut Ane Hansenimut ammasumik allagai taamak nipeqarput
- Naammagittaannartoqarsinnaajunnaarpoq!
Taamak aallarniuteqarput Qaasuitsup Kommuniani borgmester Jess Svanep aalisarnermut, piniarnermut nunalerinermullu naalakkersuisumut Ane Hansenimut ammasumik allagai.
Allaaserisamini sammivaa qaleralittassat novembarimi decembarimilu qaleralittassiissutit ilaasa septembarimut nuunneqarnissaannut siunnersuut pillugu. Allagaq tamakkiisoq ilanngupparput:
"Qeqertarsuup tunuani umiatsiaararsorluni qaleralinnianut paggatassiissutaanikuusut qaammat Juli naalluanngittoq unitsinneqarput, pisassiissutaasut nungummata."
Kisitseqqissaareernerup kingorna takuneqarsinnaasimavoq 94 tons suli sinneruttut. Taakkulu unitsitsereernerup kingorna qaammat sinnilaarlugu qaagiuttorlu tunniunneqarput. Taakkulu aamma ullut pingasut-sisamat qaangiutiinnartut unitsinneqarput, nungummata.
Politikkikkut Qaasuitsup Kommuuniata tungaaniit Naalakkersuisullu susassaqartup akunnitsinni oqaloqatigiinnerit assigiinngittut aallaavigalugit aqutsivinnut Upernavik, Uummannaq aammalu Qeqertarsuup tunuani umiatsiaararsortunut katillugit 900 tons ukiup qaammataanut kingullernut tunniunneqarput.
Politikkikkut Qaasuitsup Kommuuniata tungaaniit Naalakkersuisullu susassaqartup akunnitsinni oqaloqatigiinnerit assigiinngittut aallaavigalugit aqutsivinnut Upernavik, Uummannaq aammalu Qeqertarsuup tunuani umiatsiaararsortunut katillugit 900 tons ukiup qaammataanut kingullernut tunniunneqarput.
Iliuuseqartoqarnissaa piumasaraa
Ullorli manna tikippaa susoqarani akissuteqarfigineqarataluunniit.
Taamaammat piaarnerpaamik Aalisarnermut Piniarnermullu Naalakkersuisup saaffiginnissutigisartakkagut qiviartariaqarai iliuuseqarlunilu piumasaraarput.
Ilungersortumik tamanna saaffiginninnerummat suusupaginagu iliuuseqartoqarnissaa naatsorsuutigilluinnarparput.
Aalisartunuinnaanngittoq aammali nunami sulisunut iliuuseqartoqarnissaa pingaaruteqarluinnartoq oqaatiginngittoorusunngilarput. Assersuutigalugu umiatsiaarasorluni qaleralinniarnerup uninnerani nunaqarfimmi Saqqami inuit qulit angerlartinneqarput, Siumut-borgmesteri allappoq.