Taaguummik allannguilaartoqarnerani Inussuk Pituffimmi aallartinnissamut piareerpoq
Suliffeqarfiup nalunaarsorneqarnerani taaguutaani allannerliugaq minnerusoq iluarsineqassaaq, atortullu tamarmik naatsorsorneqarlutillu oktobarip tungaanut nalilersorneqassapput, tassani Pituffimmi kiffartuussinissamut isumaqatigiissut ilaatigut suliffeqarfimmit kalaallinit pigineqartumut tunniunneqassaaq.
Pituffik Space Basemi kiffartuussinissamut isumaqatigiissutip pissarsiarineqarnerani, ingerlatseqatigiiffiup Inuksuk A/S-ip januaarimi nalliuttorsiutigaa.
Inuksuk annerpaamik piginneqataassuteqartumi Permagreen Kalaallit Nunaat A/S-mit 51 procentinik piginneqataassuteqartumit aamma minnerusumik piginneqataassuteqartumi Vectrus Services Greenland ApS-imi 49 procentinik pigineqartumit pigineqarpoq. (taanna Amerikamiut ingerlatseqatigiiffiannit Vectrus Inc.-imit pigineqarpoq)
Ingerlatseqatigiiffik sakkutooqarfimmi peqqinnissamut tunngasunit sulianit bowlingertarfimmik ingerlatsinermut, biilileriffinnik aamma assartugalerinermik suliassanik kiffartuussissaaq.
- Suliassat pioreersut maanna pikkorissarfigissavavut. Ukiuni siullerni ilinniagassatta annertunissaat qularnanngilaq, Inuksuk-mi aamma Permagreenimi pisortaq, Jeppe Bloch Steffensen, Sermitsiaq.AG-mut taama oqarpoq.
Kisianni taaguutaa siullermik iluarsineqaqqaassaaq. Tassami Inuksuk Canadamiut inuit 'inussummut' taaguutigitimmassuk. CVR-imik nalunaarsuisarfimmi malittarisassat malillugit inissinneqaqqaartussaavoq, pisortaq oqaluttuarpoq.
Nuummi sulisut pingasut sakkutooqarfimmilu amerlanerusut
Pilersaarut malillugu aallaqqaammut Permagreenip Nuummi suliffeqarfiani sulisut pingasut sulisorineqassapput, taakku Pituffik pillugu Inussuup isumaqatigiissutaa Permagreenimi sulisut ilaannik suleqateqarluni isumagineqassaaq. Sulisoq siulleq inissippoq, maajillu aallartinneranit suliaqarnissamut piareerpoq.
Inussummi pisortap ataani Michelle Kielmann Jarl tulersortaalluni akisussaasussaq pineqarpoq.
Pituffik Space Basemi sulisunit nunaqavissut 20 procentit missaannik amerlassuseqartut annertuumik amerlineqarnissaat pilersaarutaavoq, Inussummilu sulisut nutaat anguniagaq anguniarlugu sulisussarsiornermik, pilerisaarinermik ilinniarnermillu suliniutinik pilersaarusiornermik ulapputeqarnissaannik tamanna isumaqarpoq.
- Sulisorilersinnaasatsinnut qanoq ersarinnerunissatsinnut periusissiortoqassaaq, assersuutigalugu inuit attaveqaqatigiittarfiisigut pilerisaarusiornikkut. Ilinniakkanut pilersaarusiortoqassaaq aamma Inussuup sulisitsisutsialattut anguniagai naleqartitaalu, Pituffimmi toqqissisimanartumik suliffinnik neqerooruteqarfiusut nalunaarutigissavavut.
Aaqqiagiinnginneq taamaatikkallartoq
Sinaakkutitut isumaqatigiissut kiffartuussinissamut isumaqatigiissummut tunngaviusoq, ukiuni 12-ni 28 milliardit koruuninik aningaasartaqarpoq, kisianni USA Pituffimmi annertuumik nutarterinissamik pilersaarusiortoq arlaleriarluni oqaatigineqartarpoq, taamaassappat kiffartuussineq malunnartumik annertusineqarsinnaavoq. Tamannali Jeppe Bloch Steffensenip maannamut uppernarsarsinnaanngilaa.
- Ullumikkut neqeroorutigisatsinnut ingerlatatsinnullu sulisut amerlanerungaassanngillat, immaqa piffissap ilaani nikerannginnerussallutik.
Inussuup kiffartuussinermut isumaqatigiissut oktobarimi tiguppagu, ukiuni arlalinni isumaqatigiissut pillugu aaqqiagiinnginneq, tassani 2014-imi Amerikamiut ingerlatseqatigiiffiannut Vectrus Servicesimit suliarineqalermat, danskit nunatsinnilu naalakkersuisui assut ugguarsimapput.
Taamanerniilli politikkikkut annertuumik aaqqiagiinnginneq 2020-p ingerlavoq, tassani Naalakkersuisut sinaakkutitut isumaqatigiissummik Amerikamiunut isumaqatigiissuteqarput, isumaqatigiissut kalaallinut uterteqqinneqassasoq.