Takornarialerinikkut iluanaarutit misissueqqissaarnermi qulaajarneqassapput
Takornarialerinerup aningaasarsiornikkut sutigut nunamut iluaqutaalerumaarnissaa, suliffeqarfiit takornarialerinermut inuiaqatigiinnullu attuumassuteqartut arfineq-pingasuusut ataatsimoorlutik misissoqqissaarniarpaat.
Takornariartitsinerup ineriartornissaa pillugu ilimagisat pinnagit paasisat pisariaqarluinnarput, takornariartitsinermik inuussutissarsiortut, innuttaasut aamma oqartussat, Kalaallit Nunaanni takornariartitsinermut atajuartussamut sinaakkusiisoqarpat piareersimaniassammata.
Air Greenland, KAIR, Grønlandsbanken, Grønlandsbankenimi Inuussutissarsiornermut Aningaasaateqarfik, Nalik Ventures, AECO aamma SIKUKI, suleqataallutik takornarialerineq pillugu misissueqqissaarnermut peqataaniartut, Visit Greenland tusagassiuutinut nalunaarummi paasititsivoq, taannalu ukiortaami piareernissaa naatsorsuutigineqarpoq.
- Takornariaqarnerup pitsaanerusup imminullu nappassinnaanerusup anguniarnerani paasissutissat pisariaqartut takornarialerinerup iluani inuit, avatangiisit aningaasarsiornerullu eqqarsaatigalugit isikkivinnik qulaajaassutaasussat pingaaruteqaqaat. Misissueqqissaarnikkut matumuuna peqatigiilluta kissaatigaarput takornarialerinerup inuiaqatigiit aningaasarsiorneranni iluanaarutaasussanut kisitsisitigut najoqqutassat pissarsiarinissaat, ilaatigut takornarialerinerup ineriartortinnissaanut attaveqaqatigiittarnitsinni paaseqatigiissinnaanerujumalluta, ilaatigullu takornarialerinikkut
aningaasarsiornerup siunissami sunniuteqarnissaanut nutaanik anguniagassikkumalluta,” Visit Greenlandip pisortaa, Anne Nivíka Grødem, tusagassiuutinut nalunaarummi oqaaseqarpoq.
Kikkut tamarmik tunniussaqarsinnaapput
Minnerunngitsumik mittarfissuit nunanut allanut atassuteqalersitsisussat takornarissanillu amerleriarujussuartitsisussat, aammalu takornarialerineq pillugu pilersaarut nutaassaq eqqarsaatigalugit, misissueqqissaarnermik aallartitsisoqarpoq.
Aasap ingerlanerani paasissutissarpassuarnik katersuisoqareerpoq.
Inuiaqatigiit aningaasaqarneranik misissueqqissaarneq Rambøllimit suliarineqarpoq. Taamaattumik tamatuminnga soqutiginnittut paasissutissanik naleqquttunik ilanngussaqarnissaminnik kissaateqartut kaammattorneqarput misissueqqissaartarfik Rambøll misisissueqqissaarnerup suliarineqarnerani suleqatigineqartoq attavigeqqullugu: mge@ramboll.com-imut mailerluni imaluunniit +45 5161 2249-imut sianerluni.