Takornarialerisut Disko Linemut unammillertut

Qeqertarsuup Tunuani, Nunatta Qeqqani Kujataanilu imaatigut ilaasunik angallassinermut nassatanillu assartuinermut piffissami 2020-miit 2030-p tungaanut atuuttussamik Namminersorlutik Oqartussat Disko Line A/S-ilu kiffartuussinermut isumaqatigiissuteqarput – taannalu katillugit 270 millioner kroninik aningaasartaqarpoq.Qeqertarsuup Tunuani ilaasunik angallassinissamut kiffartuussinermut isumaqatigiissutit ukiut tallimat qaangiuppata nutaamik suliariumannittussarsiuunneqalerpata, Qeqertarsuup Tunuani takornarialerisut arlaqartut qinnuteqassallutik, taamaalillutillu Disko Linemut unammillissallutik, maanna nalunaarutigaat.

Ilulissat Excursions piareersartoq 

Ilulissani takornariartitsivik takornarialerisunit quligiluanit pigineqartoq Ilulissat Excursions ApS, Qeqertarsuup Tunuani ilaasunik nassatanillu assartuinermut suliariumannittussarsiuussisoqalerpat qinnuteqarumaartoq, suliffeqarfiup pisortaa aamma takornariartitsivimmik Local Guide-mik piginneqataasoq Jan Cortsen oqarpoq.

Ilulissat Excursions pisortaniit tapiissutinik pineq ajoraluarluni ilaasunik angallassineq nassatanillu assartuineq maannakkut annertuumik ingerlakkaa, tassungalu atatillugu kommunit, Peqqinnissaqarfik, qatserisartoqarfiit, Kalaallit Nunaani Politiit, suliffeqarfiillu assigiinngitsut sullinneqartut, taassuma oqaatigaa.

- Ilaasunik angallassinerup tungaatigut misilittagaqarlualereerpugut, taamaattumik Qeqertarsuup Tunuani ilaasunik nassatanillu angallassinermut isumaqatigiissutit ukiut tallimat qaangiuppata suliarinnittussarsiuunneqalerpata Ilulissat Excursions qinnuteqartunut ilaassaaq.

- Kiffartuussinissamut isumaqatigiissutit aningaasarpassuarnik naleqarput, taakkulu sulinitsinnut annertuumik oqilisaataassapput siunissamilu ineriartortitseqqinnissatsinnut tunngaviliisuussallutik, Jan Cortsen oqarpoq.

Ilulissat Excursionsip takornarialerineq pingaarnertut ingerlataraa, kisiannili ilaasunik angallassinermi nassatanillu assartuinermi suliassat amerliartortut, taassuma erseqqissaatigaa.

Angallatit anginerusut 

Ilulissat Excursionsimik piginnittut katillugit 20-it tungaannut angallataateqarput, taakkunanngalu Targa 37-it 12 meterit missaannik takitigisut maannakkut anginersaagallarput. Ukiunili tulliuttuni angallatinik anginerusunik pisaarnissaq siunertaasoq, Jan Cortsen oqarpoq.

- Nunaqavissut ilaasunik angallassinermik suliaqartut ineriartortuaannartariaqarput, taamaattumik sullissineq pitsaanerpaaq qulakkeerneqassappat angallatinik anginerusunik pisariaqartitsivugut.

- Qeqertarsuup Tunuani nunaqavissut ilaasunik angallassinermik suliaqartut arlaqarput, suliffeqarfissuarnullu nunanit allanit pigineqartunut unammillersinnaassagutta kattussuunnissaq pisariaqarpoq, taanna oqarpoq.

Qeqertarsuup Tunuani imaatigut ilaasunik angallassineq piffissami 15. majimiit 15. novemberimut ingerlasarpoq.

Piareersimasut 

2020-mi Qeqertarsuup Tunuani ilaasunik angallassinermi kiffartuussinermut isumaqatigiissutit nutaat atuutilersinneqarnerannut atatillugu nunaqavissut takornarialerinerup sanitigut ilaasunik angallassinermik suliaqartut, Naalakkersuisuniit isiginngitsuusaarneqarsimasut, Qasigiannguit Tourism & Charter-imik piginnittoq Aannguaq Jerimiassen oqarpoq.

- Qeqertarsuup Tunuani ilaasunik angallassinermik misilittagallit amerliartorput, taamaattumik akisussaaffimmik anginerusumik tigusinissatsinnut piareersimavugut, taanna oqarpoq.

Qasigiannguit Tourism & Charter marlunnik sukkasuulianik angallataateqartoq Ilulissat, Qasigiannguit, Aasiaat, nunaqarfiillu akornanni ilaasunik angallassisarpoq.

- Tapiissutinik pineq ajoraluarluta imminut akilersinnaasumik ingerlavugut. Unammilleqatigiinneq peqqinnartuuvoq, kisiannili pissutsit maannakkutut itsillugit Disko Linemut unammillersinnaanngilluinnarpugut. Unammillersinnaassaguttalu suliffeqarfiit taamatut suliaqartut kattussuunneqarnissaat avaqqunneqarsinnaanngilaq, Aannguaq Jerimiassen oqarpoq.

Taanna Arctic Guidetut Adventure Guidetullu ilinniagaqarpoq, kiisalu ilaasunik angallassisinnaanermut takornarissanillu misigisassarsiortitsilluni piniartitsinermut allagartaqarluni.

Ilaasunik angallassinermut nassatanillu assartuinermut tulliani suliarinnittussarsiuussisoqalerpat Disko Line neqerooruteqassanersoq oqaatigissallugu maannakkut siusippallaartoq, Disko Linemi Commercial Director Noélle Simoud siusinnerusukkut Sermitsiamut oqarpoq.