Takornarianik sullissisut Miamimi neriupput
Kalaallit Nunaanni takornarianik sullissisartut qulingiluat nunarsuarmi umiarsuarnik takornariartitsisarnermi nittarsaassisarfiit annersaanni Cruose Shipping Miami-mi sapaatip akunnerani uani peqataapput. Nittarsaassineq umiarsuit takornariartaassuit ornittagaasa nunarsuarmi annersaanni marsip 16-ianiit 19-ianut ingerlanneqarpoq.
Kalaallit peqataasuisa ilaat Pitsi Høegh qaqortumeersoq ukiut pingajussaa tulleriisiinnarlugit Miamimiippoq. Kisianni tamatumuuna ukiunit siuliinit allaaneruvoq, Pitsi Høegh oqarpoq.
- Umiarsuarnik takornariaqarneq Qaqortoq Tourist Service-imut aningaasarsiorfittut pingaarnerpaanngorsimavoq. Umiarsuarnit takornariartaassuarnit taamak amerlatigisunik tikinneqartarsimanngikkutta ingerlaannarsinnaasimassanngikkaluarpugut, Pitsi Kalaallit Nunaanni Takornariaqarnikkut Inuussutissarsiornermullu Siunnersuisoqatigiinnut (GTE) oqarpoq, nangillunilu:
- Qaammatit takornariaqarfiusussat tulliuttut pissangalluta naalaarpagut. Siullertut aningaasaqarnikkut ajornartorsiorfiuvoq, taannalu umiarsuarnik takornariaqarnermut annertuumik eqquisimavoq. Aappaattut uniarsuarnik takornariatarnermi akitsuut ukiumut siulianut sanilliullugu ilaasumut ataatsimut akitsuut 17 procentimik - tassa 524 kronenik - qaffassimavoq. Annilaanngatigaarput akisuallaalernerput peqqutigalugu umiarsuaatileqatigiiffissuit Kalaallit Nunaat ornikkumajunnaarsinnaammassuk, Pitsi Høegh nassuiaavoq.
Taamaatinnartoq
Ernumanerlu tunngavissaqarsinnaavoq, taamak GTE-mi suliniutinut attaveqarnermullu pisortaasoq Anders la Cour Vahl, GTE-meersoq, erseqqissaavoq.
- Umiarsuaatileqatigiit ataatsit taamatut qaffaateqarneranik peqquteqartumik Kalaallit Nunaannukarumajunnaarsimasut nalunngilagut. Umiarsuaatileqatigiillu taakku ukiorpaaluit ingerlaneranni tikeraartarsimagaluarpaatigut, Anders la Cour Vahl oqarpoq.
Nangillunilu oqarpoq merikamiut takornariartaassuat angisoo ataaseq aasap ingerlanerani Qaqortumut tikittartut ilaat nalinginnaasumik akitsuutaannarnut 1 millioner kronenik akiliuteqartartoq.
Taassuma qaavatigut allatigut isertitaqartarpoq, tamakkulu kalaallit suliffeqarfiisa tammajuitsussatigut, angallassinertigut allatigullu umiarsualivinnut oqartussaasunit angallassinermilli ingerlatseqatigiinnit kiffartuussinikkut tunniussanit iluanaarutaat.
Cruise Shipping Miami-mi umiarsuarnik takornariartarnerup iluani ingerlanneqarnerpaat kingulliit sammineqartarput, taamaalillutillu kalaallit nunaanni takornariaqarnermik sullissisut imminnut nittarsaannissaannut periarfissittarlugillu USA-mi Europamilu umiarsuaatileqatigiinnik isumaqatigiissusiornissamut periarfissiisartoq sisamanngornermi naammassivoq.