SIUNNERSUUT ALLANNGORTINNEQARTOQ
Takornarianut akitsuut qaffarujussuarneqassaaq
Naalakkersuisut maanna siunnersuutigaat takornarianut unnuinissamut akitsuut 30 koruuniussasoq. Tamanna siunnersuutip pineqartup ukioq manna siusinnerusukkut tusarniaassutigineqarneranit 10 koruuninik qaffasinneruvoq. Allannguut alla tassaavoq innuttaasut Nunatsinni najugaqartut akitsuummik akiliisussaajunnaarnissaat.
Naalakkersuisut siunnersuutigaat unnuinissamut ataatsimut akitsuut 30 koruuniussasoq. Unnuinissanut akitsuusiisarneq nunanit allanit illoqarfinnit annerusunit, takornariarfigineqarluartartunit ilisimaneqareerpoq.
Assi: Leiff Josefsen
Unnuisarnissamut akitsuut 20 koruuninit 30 koruuninut qaffanniarlugu Naalakkersuisut aalajangerput. Tassa siunnersuutigineqaqqartumut sanilliullugu 50 procentimik qaffasinnerusumik.
Tamanna siunnersuutip inaarutaasumik Inatsisartunut ingerlateqqinneqartup, ukiakkut ataatsimiinnermi oqaluuserisassatut akuerineqartup takutippaa.
Siunnersuut ukioq manna siusinnerusukkut tusarniaassutigineqarmat akitsuut 20 koruuniugaluarpoq, maannali inummut ataatsimut unnuinermut ataatsimut 30 koruuninngorlugu allanngortinneqarsimavoq. Allannguut pingaarutilik alla tassaavoq angalasut nunani allani najugaqartut kisimik akitsuuserneqartarnissaat, Nunatsinnili najugaqartut akitsuuserneqassanatik.
- Nunaqavissut unnuisarnerisa ilaatinneqannginnissaat unnuisitsisartunut allaffissornikkut suliakkersuutaassasoq, Naalakkersuisut siunnersuummi nassuerutigaat, tamatumunngalu atatillugu innersuussutigineqarluni akunnittarfiit pisummillu angalaartunut unnuisarfiit akitsuummik nalunaarsuisarnerminni sumi najugaqarnermut uppernarsaatinik naatsorsuinerminni aqutsisariaqalernerat.
Tamatuma akerlianik inuit 18-it inorlugit ukiullit ilaatinneqannginnissaannik aalajangersagaq peerneqarsimavoq.
Kommunit ikiorserneqassasut
Akitsuut 2026-mi tamakkiisumik atuutilersinneqarpat, nunap karsianut isertitassatut naatsorsuutigineqartut 6 millionit koruunit sinnilaarlugit amerlassuseqarnissaat naatsorsuutigineqarpoq. Tamatumani siunertarineqarluni aningaasat kommuninut ingerlateqqinneqartarnissaat – naatsorsuutigineqartutut 300.000 koruunit missaanniittussat:
- Kommunit takornariartitsinermik najukkami aamma nunap immikkoortuani ineriartortitsinissaannut tapersersorneqarnissaat akitsuusiinermi siunertarineqarpoq. Taamaattumik akitsuummit isertitat kommuninut agguaanneqartassapput, allaffissornermut nakkutilliinermullu Nunatta karsianut taarsiissuteqarneq ilanngunnagu, aningaasaqarnermut naalakkersuisoq Erik Jensen (S) Inatsisartunut allakkamini taama allappoq.
Unnuisitsinermut akitsuut 2024-mut aningaasanut inatsisissamut Inuit Ataqatigiinnit, Siumumit, Naleqqamit aamma Atassummit isumaqatigiissutigineqartutut siunnersuutigineqarpoq.
Akitsuutit qanoq amerlassuseqarnissaannut atatillugu Nunarput nunanut allanut sanilliullugu qanoq inissisimassanersoq takussutissami ataaniittumi takuneqarsinnaavoq:
Unnuisitsinermut
akitsuut qanoq angissuseqassanersoq Inatsisartunit aalajangerneqassaaq,
pilersaarutit naapertorlugit siunnersuut septembarip 24-anni
siullermeerneqassaaq.
