Takornariaqarneq: Piujuaannartitsinermik aallaavilimmik angalaffissatut Kalaallit Nunaat akuerisaasoq
Visit Greenland ilisimatitsivoq, atuakiorfissuup nunarsuarmi tusaamasap Lonely Planet-ip nunarput piujuaannartitsinermik aallaavilimmik angalaffissatut akuerisimagaa angalaffissaqqittullu pingajuattut toqqarlugu.
Australiamiut atuakkiorfiat, nunarsuarmi angalasarnermik immikkut aallussisoq "Lonely Planet" 1973-mi pilersinneqarnikuusoq, pilersinneqarneraniit ukiut 50-nngortorsiornerminut atatillugu angalaffissaqqissunik toqqartuilluni saqqummersitseqqammerpoq taaguutilimmik “Best in Travel 2024“. Tassani Kalaallit Nunarput immikkut saqqumilaartinneqarpoq nunarsuarmi nunat tamalaat akornanni piujuaannartitsinermik tunngavilimmik angalaffissaqqissutut, taamak oqaluttuarpoq takornarialeriffik Visit Greenland.
- Lonely Planetip 50-nngortorsiorneranut atatillugu nunarsuarmi sumiiffiit 50-it angalaffissatut immikkut piukkunnartutut toqqagarneqarput saqqummersitami tassani, tassa nunatut tikinneqartariaqartutut nunarput taamaalilluni ilaavoq.
Taamatut akuerisaanerup malitsigisaanik Kalaallit Nunaat imminut pisussaaffilerpoq takornariaqarneq piujuaannartitsinermik aallaavilik nunatsinni ingerlanneqassaasoq, aammalu angalasut periarfissinneqassasut pinngortitaq kusanartoq allanngortinneqanngitsorlu nunatsinni misigisassaasoq neqerorutigisinnaassallugu.
”Best in Travel”-mi 2024-mi angalaffissatut piukkunnarluinnartutut toqqakkat 25. oktober 2023 saqqummiunneqarput aammalu nunarsuarmi kanalit assigiinngitsut atorlugit siammarterneqartussaalluni.
Sassuma arnaa
Visit Greenland-imit oqaluttuarineqarpoq Lonely Planetsip nunatsinnik immikkut ukkatarinninnera nersornaataannaassanngitsoq, tassami angalasarnermi misigisassat immikkuullarissut pisussaaffigineqarput, tamannalu nunatsinni tamatsinnut iluaqutissiissasoq. Tassani pineqarpoq sassuma arnaanik oqaluttuaq, taannalu oqaluttuatoqaatsitsinni piujuaannartitsinermik aallaavilimmik oqaluttuarneruvoq pisoqqanerpaaq – pisussaaffillu taanna taaguuteqartinneqarpoq Sassuma Arnaa nersorniarniarlugu.
- Angalasarnerit kulturitsinnik nunatsinnillu naleqartitsinermik aallaavillit pingaartitaraagut. Ukiup qanoq ilineranut naleqqussartarpugut aammalu innuttaasut nunap immikkoortuini najugaqartitertut, tikeraartuvut nunarpullumi pingaarnerpaatillugit sulivugut. Maaniippugut sumiiffiit takornariaqarnikkut siuarsaaqataaffiginiarlugit, eriagisat sumiiffinniittut ersarissisinniarlugit ammalu anguniakkatsinnik avitseqatiginnikkusuttut tamaasa suleqatigerusullugit. Anguniagarput ersarippoq: takornariaqarneq pitsaanerusoq Kalaallit Nunaannit piumasaqaatit naapertorlugit, Visit Greenland toqqagaanermut atatillugu qisuariarpoq.