Takornariaqarneq: Politikerinut innersuussutit aqqanillit

Takornarialerisut ataatsimeersuarneranni Towards More Tourismimi, Nunatsinni takornarialerinermik ingerlataqartunit 130-nit amerlanerusunit peqataaffigineqartumi, politikerinut innersuussutinik arlalinnik suliaqartoqarpoq, taakku maanna Inuussutissarsiornermut Nukissiornermullu Naalakkersuisumut Aqqalu Jerimiassenimut tunniunneqarsimalerput.

- Nuannaarutigaarput Kalaallit Nunaanni takornarialerisut sinnerlugit innersuussutit 11’t saqqummiullugillu ingerlateqqissinnaagatsigit. Innersuussutit suliarineqarsimapput pisortat suliffeqarfiutaanni, namminersortuni nunallu immikkoortuini takornariaqarnermi ataqatigiissaarisutut sulisunit. Suliarinnittut ilagivaat ullut tamarluinnaasa takornarialerinermik suliaqartut, taamaammallu innersuussutit piviusut periarfissallu aallaavigalugit suliarineqarsimallutik, Julia Pars, Visit Greenlandimi pisortaaneq tusagassiuutinut nalunaarummi oqarpoq.

Ataatsimeersuarnermi takornariaqarnerup piujuartussamik ineriartortinneqarnissaata qanoq qulakkeerneqarsinnaanera paasiniassallugu siunertarineqarpoq, tassani siuariartorneq, pilersitsineq aamma akisussaassuseqartumik takornariartitsineq ukkatarineqarlutik.

Innersuussutit:

1. Takornarialerisut innersuussutigivaat nuna tamakkerlugu nunallu immikkoortortuinitakornariaqarnerup inerisarnissaanut nukittuumik imminullu ataqatigiissumik periusissiornissaq, tamaalilluni Kalaallit Nunaata takornariartarfittut unammillersinnaanera annertusarneqassammat
2. Nunap immikkoortui aallaavigalugit ukioq kaajallallugu takornariaqartalernissaa aaqqissuussamik ingerlaavartumillu inerisaaneq sulissutigineqassaaq.
3. Sinaakkutitigut pitsaasumik nalimmassaasoqarnissaa siunertaralugu takornarialerisut susassaqartullu assigiinngitsut peqatigalugit sinaakkutit akuttunngitsumik misissorneqartassapput.
4. Meeqqat atuarfianni ilinniarfinnilu ingerlaqqiffiusuni ilinniartitsinerni piujuartitsineq piginnaasanillu pitsanngorsaaneq inuussutissarsiutip inerisarneqarnerani ilaalluinnassapput.
5. Pisortaniit qulakkeerneqassaaq nunatsinnut naleqqussakkamik pitsaassuseq, isumannaallisaaneq avatangiisinullu tunngasumik uppersaasersuineq.
6. Inatsisitigut qulakkeerlugu takornariaqarnermi sulisussanik piginnaasalinnik eqaannerusumik pissarsisinnaaneq.
7. Takornariaqarnerup ineriartornera annertunerusumik ukkatarinerani piginnaasanikinerisaaneq ilinniartitaanerlu aningaasatigut malitseqartinneqassaaq.
8. Pisortani attaveqaatersuutitigut pilersaarusiornermi nunaqartunut takornarianullu iluaqutaasinnaasut eqqarsaatigineqartassapput.
9. Nuna tamakkerlugu attaveqaatinik pilersitsisoqassaaq. Taamatut qulakkeerneqassaaq nunap immikkoortuisa akunnerminni suleqatigiinnikkut pitsaanerulerlunilu nukittunerulersillugu taamaalilluni takornarianik digitalikkut sullissineq inerisarneqassammat.
10. Kommuunit qulakkiissavaat nunap immikkoortuini avammut nittarsaanikkut suleqatigiit (DMO) takornariaqarnikkullu periusissat pilersineqarnissaat.
11. Takornariaqarnerup naleqassusiata oqariartuutigineqarnissaa, ilinniartissutigineqarnissaa najugaqartullu akuutinneqarnerunissaat pisariaqarpoq. Innersuussutigineqarpoq nuna tamakkerlugu nunallu immikkoortuini takornariaqarnikkut periusissiani pingaartillugu suliniutigineqassasoq.

Misilittakkat aallaaviussasut

- Neriuppugut innersuussutit inuussutissarsiortuusunit suliarineqarsimasut nuna tamakkerlugu takornariaqarnermi periusissiassamut ilapittuutaajumaartut. Pingaartuuvormi periusissiami takornarialerisut ilisimasaat misilittagaallu aallaaviullutik tunngavigineqarumaartut tamaalilluni inuussutissarsiummi unamminartuusinnaasut aaqqinneqarsinnaaniassammata, Air Greenlandimi niuernermut pisortaq Maliina Abelsen, taama oqarpoq.