Takornariaqarneq: Takornarissanik angallassisartut 17-it equngasumik unammillertoqarneraapput
Ilulissani takornarissanik angallassisartut sisamanngornermi ataatsimoorlutik imaani akerliussutsitsimik takutitsipput isumaqaramik Disko Linep Namminersorlutillu Oqartussat kiffartuussinissamut isumaqatigiissutaat aqqutigalugu equngasumik unammillertoqartoq.
Karl "Aakattak" Sandgreen, "Ilulissat Water Safari"-meersoq oqaluttuarpoq ukiorpassuanngortuni Naalakkersuisunit iliuuseqartoqarnissamik neriorsorneqartuartaraluarlutik manna tikillugu pissutsit allanngoratik ingerlaannartut, uffa massa ilaasunik angallassinermut kiffartuussinissamik isumaqatrigiissut ilaasunik nunaqavissunik sullissinissamut tunngassuteqaraluartoq:
- Kiisa ukiut taamannanngorput Naalakkersuisunit nikerartunit neriorsorneqartarluta ajornartorsiut pisarput pillugu iliuuseqartoqassasoq, mannali tikillugu ajornartorsiut iliuuseqarfigineqanngilaq, Aakattak Sandgreen Sermitsiaq.AG-mut oqarpoq.
Disko Line-p isornartorsiut tunngavissaqannginnerarnikuuaa
Siusinnerusukkut isornartorsiummik assingusumik Nick Nielsen, takornarialerinermik suliaqartartoq aamma Avannaata Kommuniani kommunaldirektøriusoq Disko Line-mut saqqummiussinikuuvoq.
Disko Linemi pisortaanerup Noelle Simoudip isornartorsiut isumaqatiginagu Sermitsiaq.AG-mut taamanikkut oqaatigaa.
- Kiffartuussinissamik isumaqatigiissut aningaasaliiissutillu illoqarfiit nunaqarfiillu Kiffartuussinissamik isumaqatigiissummi pineqartut akornanni ilaasunik angallassinissamuinnaq atugassiaapput. Kiffartuussinissamik isumaqatigiissutip naatsorsorneqarnerani, kiffartuussinissamik isumaqatigiissummut atatillugu ingerlatsinermut aningaasartuutaasussat kisimik ilanngunneqarsimapput, pisortaaneq allakkatigut akissuteqarluni oqarpoq.
Ajornartorsiut ataasiaannarluni pinngilaq
Karl "Aakattak" Sandgreen imminut assersuutigivoq. Tassami umiarsuaq takornariartaat takornarianik 1.000-it sinnerlugit ilaasulimmik Ilulissaniittoqarpoq. Taamaattorli nammineq angallassinissanik marluinnarnik iluatsitsisimavoq, uffa ullormut arfinileriarluni arfineq marlunnik ilaasoqarluni angalaassisarsinnaagaluarluni:
- Matumani pisoq taannaannaanngilaq, tassami uagut takornarissanik angallassisartugut ulluinnarsiutigaarput takornariarpassuaqaraluartoq ilaasussaaleqisarluta. Amerlasuutigut isiginnaaginnarsinnaasarparput Disko Line ulapittupilussuusoq ilaasorisinnaasaraluagut angallattaqattaarlugit, uagullu tassa allatut iliorsinnaaneq ajorluta isiginnaaginnartariaqartarluta, Aakattaq Sandgreen tikkuaavoq.
Air Greenland-ip Diskoline ikiorpaa
Aakattak Sandgreen Sermitsiaq.AG-mut oqarpoq ingerlatseqatigiiffiit taakku marluk ilaasunik angallassinissamut isumaqatigiissutit annerpaartaat pigigaluarlugit, qaavatigut ikioqatigiillutik nunaqavissut takornarianik angallassisartut unammilleraat, taamaammallu takornarianik angallassisartut nunaqavissut iliuuseqartoqarnissaanik suleqatigiillutik massakkut piumasaqalersut:
- Inuiaqatigiit akiliisarput ukiumut 200 millioner koruuningajannik angallassisut taakku marluk nunaqartunik angallassinissaannik kiffartuussinissamik isumaqatigiissutit aqqutigalugit. Isumaga malillugu tamanna naapertuilluartuliornerunngilaq imminnummi ikiorlutik takornarianik amerlanerpaanik sullissinissartik isumannaarniartarpaat, Aakattak Sandgreen tikkuaavoq.
Aakattaq Sandgreen naapertorlugu Air Greenland-ip Disko Line ilaasussaanik annertuumik ikiortarpaa "World of Greenland" aqqutigalugu, taanna ingerlatseqatigiiffik Air Greenland-ip pigivaa takornarianillu amerlanerpaanik misigisassarsiortitsisarnermik sullissisisuulluni.
Aningaasanut inatsimmi konto pingaarneq 72.20.05-mi atuarneqarsinnaavoq Qeqertarsuup tunuani ilaasunik angallassermut kiffartuussinissamut isumaqatigiissutit ataatsimut katillugit ukiumut 32,3 millioner koruuninik naleqartut.
Sermitsiaq.AG-mit sulissutigaarput isornartorsiuineq matumani pineqartoq pillugu Air Greenland-imit oqaaseqartitsiniarluta, taamatuttaaq Naalakkersuisunit oqaaseqartitsinissarput sulissutigaarput, ajornartorsiut utikattuartoq arlaatigut iliuuseqarfiginissaa pilersaaarutigineqarnersoq paasiniarlugu.