Ilulissani
takornariaqarnermik inuussutissarsiuteqarneq nunaqavissunit maannakkorniit
annertunerujussuarmik ingerlanneqartariaqartoq, taamannalu qulakkeerniarlugu
suliniutit assigiinngitsut aallartinneqassasut, Avannaata Kommuniani
kommunalbestyrelsimi Siumup Naleqqallu ukiuni tulliuttuni sisamani
suleqatigiinnissamut isumaqatigiissutaanni erserpoq.
Mittarfissaq
pisussaaffiliisoq
Ilulissani
takornariaqarnermik inuussutissarsiuteqarneq nunaqavissunit maannakkorniit
annertunerujussuarmik ingerlanneqartariaqartoq, taamannalu qulakkeerniarlugu
suliniutit assigiinngitsut aallartinneqassasut, Avannaata Kommuniani
kommunalbestyrelsimi Siumup Naleqqallu ukiuni tulliuttuni sisamani
suleqatigiinnissamut isumaqatigiissutaanni erserpoq.
Mittarfissaq
pisussaaffiliisoq
Ilulissani mittarfissuup sanaartorneqarnera takornariaqarnermik
inuussutissarsiuteqarnerup inerisaaffigineqarnissaanut annertuumik
pisussaaffiliisoq, tamannalu naammassiniarlugu suliniutit assigiinngitsut
aallartinneqassasut, Avannaata Kommuniani borgmesteri Lars Erik Gabrielsen,
Siumut, oqarpoq.
- Inuussutissarsiutinik
inerisaanissamut pisussaaffilerneqarpugut, qujanartumillu ukiut tallimat
kingulliit ingerlaneranni, takornariaqarnermik inuussutissarsiummut
alligaluttuinnartussamut innuttaasut nunaqavissut peqataanerat
annertusiartorpoq.
- Tamaammat
Avannaata Kommuniani kommunalbestyrelsimi Siumup Naleqqallu ukiuni tulliuttuni
sisamani suleqatigiinnissamut isumaqatigiissutaanni takornariaqarneq initoorujussuuvoq,
taanna oqarpoq.
Takornariaqarnermut inatsit
allanngortinneqartariaqartoq
Kalaallit
Nunaani takornariartitsisarneq pillugu inatsit siulleq ukiortaamiit
atuutilersoq, siorna novemberimi Inatsisartunit akuerineqarpoq. Akuersissummik
pissarsinissamut takornariartitsinermut suliffeqarfiit minnerpaamik 2/3-inik
najukkaneersunik piginnittoqartussaanerat pillugu piumasaqaat, inatsimmi
qitiusuni ilaatinneqartut ilagaat. Aammali suliffeqarfiit takornarianik
kiffartuussinermik suliaqartut piginnittui, ukiuni tallimani kingullerni
Kalaallit Nunaanni najugaqartussaanerat akileraartartussaanerallu inatsimmi
aamma ilaavoq. Tamanna takornariartitsinermi aningaasaqarnikkut pissarsiassat
Kalaallit Nunaanniitinneqarnerulernissaannik qulakkeerinissasoq aammalu
najukkani siuariartortitsinissamut suliffissaqartitsinissamullu tunngaviliissasoq,
taamanikkut naalakkersuisuisuusut oqaatigaat.
- Kisianni
takornariartitsinermut suliffeqarfinnik nunaqavissut 2/3-inik
piginnittoqalersinnaatitaalernerat annikippallaarpoq, kiisalu suliffeqarfiit
takornarianik kiffartuussinermik suliaqartut piginnittui, ukiuni tallimani
kingullerni Kalaallit Nunaanni najugaqartussaanerat akileraartartussaanerallu
ukiunut qulinut qaffanneqartariaqarpoq, borgmesteri isumaqarpoq.
Takornariaqarnermut
inatsit pilersinneqaraluartoq, taamaattoq pissutsit allanngorsimanngitsut,
takornarialerisunullu nunaqavissunut atugassarititaasut maannakkorniit
pitsaanerulernissaat siunertaralugu, takornariaqarnermut inatsit
allanngortinneqartariaqartoq, Lars Erik Gabrielsen aamma isumaqarpoq.
Nunaqavissut
salliutinneqassasut
- Uagut
isumarput malillugu nunaqavissut tassaapput kalaallit imaluunniit nunami
allamiut ukiorpassuarni nunatsinni ilaqutaqarlutillu najugaqarsimasut. Aningaasarsiornissarlu taamaallaat
siunertaralugu ukiut amerlanngitsuinnaat nunatsinniissimasut nunaqavissutut
isiginngilagut, Lars Erik Gabrielsen oqarpoq.
Suliffeqarfiit
angisuut nunatta avataaneersunit pigineqartut Ilulissani aningaasarpassuarnik
kaaviaartitsillutillu annissuisut, taassuma siornatigut arlaleriarluni
isornartorsiorlugu oqaatigisarpaa.
- Taakkua
akileraarutitigut kommunimut iluaqutaasumik annerusumik
tunniussaqarsinnaanngippata nunaqqatitsitut taasinnaanngilagut, kommunittalu
aningaasanik aallertarfiinnartut inissisimanera qimattariaqarparput.
- Taamaattumik
takornarialerineq nunaqavissut aallaavigalugit ineriartortinneqassaaq. Politikkikkut
siuttut inuussutissarsiortut suleqatigalugit erseqqissumik anguniagaqarlutik
siuarsaaqataassapput aammalu takornarialerinermi pisuttuaassisut
angallassisullu nunaqavissuunissaat aqqutissiuunneqassaaq, borgmesteri
naqissusiivoq.
Innuttaasut
amerlanerusut aamma imaani inuussutissarsiuteqartut takornariaqarnermut
aningaasaliinikkut peqataanerulernissaannik Avannaata Kommunianiit
kaammattorneqarput, taamaaliornikkullu nunaqavissut namminneerlutik
takornariaqarnermik kivitsisinnaanerat takutinneqartariaqartoq, taanna
oqarpoq.
Ataatsimoorneq
takornarialerinermilu ilinniarfik
Ilulissat
Excursions ApS Ilulissani takornarialerisunit qulingiluaasunit pigineqartoq
siorna pilersinneqarpoq, suliffeqarfiillu ataatsimut kattunnerisigut suliassat
amerlanerulersimasut, namminersortullu pitsaasumik atugaqarnissaat
qulakkeerniarlugu ataatsimoornissaq pingaaruteqartoq, Lars Erik Gabrielsen
isumaqarpoq.
- Takornariartitsiviit
nunaqavissunit pigineqartut namminneerlutik kivitsisinnaanerat
annertoorujussuuvoq, taamaattumik nunaqavissut takornarialerisut
ataatsimoorlutik suleqatigiinnissaat pingaaruteqarpoq
- Ilulissani
takornarialerisut amerlanerusut Ilulissat Excursionsimut piginneqataalersinnaappata
pitsaasup tungaanut alloriarnerussaaq, taanna oqarpoq.
Takornarialerinermi
suliaqartut amerlisarusullugit guidehøjskole pilersinneqassamaartoq, taassumalu
saniatigut takornarialerinermik ilinniarfiup pilersinnissaa
sulissutigineqassasoq, Avannaata Kommuniani borgmesteri erseqqissaavoq.
