Tassanngaannaq
tikeralerput.
Takornariat, Nuummi mittarfittaaq ammarpat tikittussat.
Tassanngaannaq
tikeralerput.
Takornariat, Nuummi mittarfittaaq ammarpat tikittussat.
Timmisartorsuit New Yorkimiit, Reykjavikkimiit, Københavnimiit, Billundimiit
Aalbrorgimiillu sapaatip akunnera kingulleq tikimmata takornariarpassuit
tikerarput.
Akunnittarfinni, neriniartarfinni taxani, taamatullu
takornarialerisuni takornarialerisoqarfinnilu ulapisitserujussuarput. Karen
Foss Hansen ulapittunut ilaavoq, taassumami Aarhusimi angallatitsivimmi Ruby
Rejser-imi atuisuusut sullippai.
Karen Foss Hansen maanna Københavnimi
najugaqaraluarluni Kalaallit Nunaat ilisimasaqarfigilluarpaa, tassami
Ilulissani inunngorlunilu peroriartornikuuvoq, inunngoramilu ukiut 15-it
siulliit najugaqarfiginikuullugu. Taassumalu kingorna Nuummi ukiut qulingiluat
najugaqarnikuuvoq, tassanilu Grønlands Rejsebureauimi sulinikuulluni. Karen
Foss Hansen kalaallisut, qallunaatut, tuluttut, tyskisut franskisullu
oqalussinnaavoq.
Sapaatip
akunneranut tikeraat nutaat marluk
-
Aalborgimiit toqqaannartumik timmisartumik tikittunik sapaatip akunneranut
tikeraanik nutaanik marlunnik sullissaqartarpunga. Akunnittarfimmut
isertereeraangamik illoqarfimmi angallanneri aallartittarpakka, illoqarfiup
qeqqaniit Nuutoqqamukaattarpakka, aqqullu alla atorlugu
utimukarteqqittarlugit.
-
Tassanilu Naalakkersuisut, Inatsisartut, politeeqarfik, eqqartuussisoqarfik
Katuarlu ilaatigut aqqusaartarpagut. Angallanneranni nunarput
oqaluttuarisaanerpullu pillugit oqaluttuuttarpakka, sullitammali kissaataannut
minnerunngitsumillu apeqqutaat naapertorlugit tulluarsaasarpunga.
-
Takornariarpassuimmi alapernaattorujussuusaramik apeqqutissanik ulikkaartarput.
Amerlasuut pissutsut Danmarkimituut ittuunissaannik naatsorsuuteqartarput –
assersuutigalugu illut B-normoqartarnerat nutaarsiarisarpaat. Taamaalillunga
tamakku pillugit oqaluttuutilaartariaqartarpakka.
-
Peqqinnissaqarfik, ilinniarneq, illoqarfimmi bussit, ilaatigullu illoqarfiup
pingaarnersaani biilerpassuaqarnera pillugu aamma apeqqutissarpassuaqartarput.
Illoqarfimmiit illoqarfimmut biilertoqarsinnaanngikkaluartoq sooq taama
amerlatigisut biileqarnersut amerlasuunit paasiuminaatsinneqartarpoq. Soorunami
aamma politikki pillugu apeqqutissaqartoqartaqaaq. Tassanilu sapinngisara
tamaat akiniartarpakka, politikkimulli tunngatillugu apeqqutit sukumiisut sullissannut
oqallisigitittarpakka.
Karen
aqqutissiuisuusoq
Takornarialerisoq Karen Foss Hansen Ilulissani inunngorlunilu peroriartorpoq, Nuummilu ukiut qulingiluat najugaqarnikuulluni. Ruby Rejserimi Nuummut takornarianik angallassisartutut atorfeqarpoq.
Assi: Jesper Hansen
Aappariit
Mona aamma Peter Jensen Aalborgimeersut Karen Foss Hansenip sapaatip akunnera
kingulleq sullitaata ilagaat. Siornatigut Kalaallit Nunaanniinnikuupput,
kisianni Nuummiinnikuunatik.
-
Timmisartuussinernut siullermeertunut ilaasarneq ileqqoraarput, taamaalilluta
Nuummut tikeraarnissatsinnut periarfissaq atorluarparput, timmisartortartoq
Peter Jensen Aalborgimiit Nuummut angalanertik pillugu taama oqaaseqarpoq.
-
Nuuk pillugu tusagaqarnikooqaagut – illoqarfimmilu ilisarisimasagut amerlaqaat,
taamaakkaluartoq Danmarkimiit taama allaanerutiginera tupaallaatigeqaara, Mona
Jensenip nassuerutigaa.
-
Qujanartumik Karen aqqutissiusoraarput – pissutsillu qanoq innerannik
nassuiaalluarnissani pikkoriffigigaa isumaqarpunga.
-
Illoqarfiup qeqqani nutaanngitsumik iliveqarfeqarnera aallaqqaammut
eqqumiigisorujussuugaluarpara. Ilivillu paarilluarneqannginneri
paasiuminaatsikkaluarlugu – Karenilli ilivit inaasa peerneqartannginnerisa
ileqquunera nassuiaammagu paasisinnaanngorpara.
