Tapersersueriaatsit amerlanerit takornariaqarnermik annertusaassapput

Takornariaqarnermut inatsissaq oqallisigineqartoq taannaannaanngilaq, tassani pineqarpoq nutaanik misigisassarsiorfissanik ineriartortitsinermi amerlanerusunik takornariartartussanik siunissami nunatsinnukartussanik naatsorsuutigineqartunik. Taamak Naalakkersuisut inerniliipput.

- Takornarialerisut amerlisinneqarnissaat eqqarsaatigalugu takornariartitsinermut inatsit takornarialerinermi ingerlatanut piumasaqaatit nassuiaatigalugit sinaakkutissatut inatsisaammat, taassuma tamanna kisimi kivissinnaanngilaa. Taamaakkaluartoq zonenut agguaasarnermut tunngasoq, najukkami ingerlatsisut ingerlatsinerulernissaannut tapertaasinnaassaaq, taamaalillunilu najukkami ingerlatsisut amerlanerunissaannut aamma tunngavissiilluni, Jens-Frederik Nielsenimut (D) akissuteqarluni Naalakkersuisoq Naaja H. Nathanielsen oqarpoq.

Taassuma saqqummiuppaa, Inatsisartut ukiakkut ataatsimiinneranni siunnersuutissanik arlalinnik saqqummiussaqassasut, tamanna pineqarpoq Jens-Frederik Nielsenip § 37-mut apeqquteqaataani aqqutigalugit ajornartorsiutinik qaqilerineranut akissutitut.

Isumassarsianik timitaliinerit amerlanerusut

- Takornariaqameq pillugu ikaarsaarnermi periusissiaq aqqanilinnik suliniuteqartoq 2023- mi decembarimi akuersissutigineqartoq, takornarialerinermilu immikkoortumut pilersaarut ukiaru tamanut tusarniutigineqartussaq, takornarialerinermi annertunerusumik ingerlatsisoqalernissaanik pilersitsissallutik toqqaannartumik siunertaqarput. Suliamut tassunga atatillugu suliniuterpaaluit ilaatigut inatsimmik pisoqalisimasumik nutarterinermik, nutaamik inatsisiliornermik, aningaasatigut tapiissutisinissamut annertusaanermik imaluunniit pisariillisaanermik, takornarialerinitsinnilu aamma inuussutissarsiutinik ineriartortitsinitsinni ilusitsinnik isornartorsiuinernik nassataqartut ingerlanneqarput, naalakkersuisoq ilisimatitsivoq.

Naaja H. Nathanielsen oqarpoq:

- Sulinermi tassani assersuutitut, inuussutissarsiornermik siuarsaanissamut aningaasanik pisariinnerusumik pissarsisinnaanissamut siunnersuut ukiakkut ataatsimiinnermi Naalakkersuisut saqqummiuttussaavaat, soorluttaaq ingerlatsisut mikinerusut tapiissutinik pisariinnerusumik pissarsinissaannik qulakkeerinnissalluni inuussutissarsiornermik siuarsaanissamut periusissaq sulissutigineqartoq. 

Naalakkersuisullu erseqqissarpaa aallarnisaanermut periusissiaq, namminersortut suliniutaannik tapersersuissalluni aamma siunertaqartoq, Naalakkersuisut ukiaru saqqummiunniarpaat. 2024-mi Aningaasanut Inatsimmi taarsigassarsiaaqqanut aningaasat amerlanerusut immikkoortinneqareersut.