Tapiissutit atorfissaqarput
Aningaasaqarnermut naalakkersuisuusimasut Josef Motzfeldt (Inuit Ataqatigiit) aamma Per Berthelsen (Siumut) isumaqarput inuiatigiit ilaatigut assartuinermut attaveqarnermullu tapiiuarallartariaqartut.
Landskarsi sullissinissamik isumaqatigiissutit aqqutigalugit namminersornerullutik oqartussat suliffiutaannut suliffeqarfinnullu allanut namminersornerullutik oqartussat piginngisaannut ilaatigut tunisassiornermik, timmisartuussisarnermik, ilaasunik angallassisarnermut kiisalu nukissiornermik nioqqutissanillu pilersuinermik ingerlataqartunut ukiumut milliartit tikillugit toqqaannartumik toqqaannanngitsumillu tapiissuteqartarput.
Attaveqatigiinneq avinngarusimallunilu nunassitsitersimaneq pissutaallutik tapiisoqartuartariaqarpoq, tapeeriaatsilli sutigut allanngortinneqarsinnaanera juunip aappaanni inatsisartunut qinersisoqareerpat politikerit eqqarsaatigiumaarpaat, aningaasaqarnermut naalakkersuisuugallartoq Per Berthelsen oqarpoq.
Aningaasaqarnermut naalakkersuisutut siulerisimasaata Josef Motzfeldtip ilaatigut ilaasunik angallassinermut tapiissutaasartut ikiliserujussuarsimavai. Ullumikkullu isorliunerusuni najugalinnut angalaniarneq akisoqalunilu ajornakusoortorujussuanngorsimavoq. Tamanna Josef Motzfeldtip qanoq iliuuseqarfiginiarpaa, ilaatigut KGH-toqqap usinik ilaasunillu assartueriaaserisimasaa utersaarfigalugu.
– Tapiissutit pinngitsoorsinnaanngilagut, nutaamilli eqqarsartariaqarpugut. Ilaatigut assartugassat ilaasussallu ataatsimoortittarlugit, ilaasut usillu immikkoortittarunnaarlugit angallammili ataatsimoortittalerlugit. Innaallagissiorfinnut tapiissutit aamma nunatsinni sumiiffinni assigiinngitsuni sullissinernut naleqquttumik aaqqissuunneqartarsinnaapput.
Sermitsiaq nr. 21 atuaruk....