Tasiilami aalisakkerivik atorluarneqartoq

Naalakkersuisut Kommuneqarfik Sermersuullu suleqatigiillutik Tunumi aalisarnermik inuussutissarsiuteqarnerup inerisaaffigineqarnissaa pillugu politikkikkut sukumiisumik ukiuni kingullerni suliaqarnerat maannakkumut iluatsilluartoq, Inatsisartuni Aalisarnermut Piniarnermut Nunalerinermullu Ataatsimiititaliap siulittaasua Lars Poulsen, Siumut, aggustip arferngani Tasiilami Royal Greenlandip aalisakkanut suliffissuata ammarneqarneranut tunngatillugu taama oqarpoq. Tunisinissamullu periarfissaq atorluarneqalereertoq aalisakkanut suliffissuup pisortaa Frede Kilimi aalisartullu oqaatigaat.

Suliniut iluatsilluartoq 

Tunumi aalisarnerup inerisaaffigineqarnissaa kiisalu suliffissanik ataavartunik pilersitsinissaq qulakkeerniarlugu, ukiuni kingullerni amerlasuuni Tasiilami aalisakkanut suliffissualiortoqarnissaa kissaatigineqartarsimavoq. 2016-imi Kommuneqarfik Sermersuumi kommunalbestyrelsip aalajangiineratigut Tasiilami aalisakkeriviliornissamut inissamik pilersitsisoqarpoq, tamatumalu kingorna piniartuunermiit aalisartuunermut ikaarsaartitsinissaq siunertaralugu, ilaatigut aalisarneq pillugu isumasioqatigiissitsinerit ingerlanneqartarsimapput, kiisalu aalisarnermut atortunik umiatsiaaqqanillu aalisartut tapiiffigineqartarsimallutik. Suliniutit tamakku Tasiilami nunaqarfiinilu umiatsiaararsortunit tigulluarneqarsimapput, ukiullu ikittuinnaat ingerlaneranni amerlasuut piniartuunermiit aalisartuunermut iluatsilluartumik ikaarsaarsimasut, tamannalu umiatsiaararsortut ilaqutaasalu inuuniarnikkut aningaasaqarnikkullu atugarissaarnerulernerannik kinguneqartoq, aalisartut piniartullu peqatigiiffiisa Sermitsiamut siornatigut oqaatigisarpaat.

Atorluarneqartoq 

Tasiilami aalisakkerivimmi aalisakkat qerisut 500 tonsit uninngasuutigineqarsinnaapput ullormullu saarulliit qalerallillu tulaanneqarsinnaallutik. Periarfissarlu atorluarneqartoq aalisakkeriviup pisortaa Frede Kilimi oqarpoq.

- Tasiilami nunaqarfinnilu aalisartut Tasiilami tunisinissamut periarfissaq atorluarpaat. Maannakkuugallartumut saarulliit qalerallillu tigoorarallarpagut, tunisinerlu ingerlalluarmat aalisakkerivimmi sulisut arfineq pingasuusut suliassaqarluarput, taanna oqarpoq.

Mikael Christensen Tasilaami aalisartuuvoq, taannalu piffissami matumani saarullinniarpoq.

- Tasiilami aalisakkanut tunitsiveqalernissaa ukiuni amerlasuuni kissaatigisarsimasarput kiisami piviusunngorpoq, tamannalu nuannaarutigaarput.

- Siornatigut Kulusummi Arctic Prime Fisheriesip aalisakkanut suliffissuaataanut tunisinissaq kisimi periarfissaanikuugaluarpoq, maannali Tasiilami ammaasoqarneratigut unammilleqatigiinneq aallartinneqarpoq, tamannalu Tunumi aalisarnermut iluaqutaanissaa qularutissaanngilaq, taanna oqarpoq.

Tasiilap eqqaani saarulleqarluartoq maannakkullu umiatsiaararsortut amerlasuut aalisartuunermut ikaarsaarsimalertut, taassuma oqaatigaa.

Royal Greenlandip paasissutissaatai naapertorlugit qaleralinnik tunisinermi kilomut akigitinneqartoq 28 koruuniuvoq. Saarulliup niaqua atatillugu kilomut 13 koruuneqarpoq niaquerlugulu 17 koruuneqarluni.

Suli suliassaqartoq 

Inatsisartuni Aalisarnermut Piniarnermut Nunalerinermullu Ataatsimiititaliap siulittaasua Lars Poulsen, Siumut, Kuummiuninngaanneersuuvoq Tunumilu piniarnermik aalisarnermillu inuussutissarsiuteqarneq ilisimalluarlugu.

- Siornatigut piniarnerinnarmik inuussutissarsiuteqarsimasut amerlasuut aalisartuunermut ikaarsimapput, tamanna soorunami nuannaarutissaavoq.

- Taamaakkaluartoq suli suliassaqarpugut, tassami aalisarnermut atortut, soorlu bundgarnit, umiatsiaaqqat nutaat aalisarnermullu atortut allat maannakkornit pitsaanerusut suli pisariaqartinneqartut aalisartut oqariartuutigaat taakkulu kissaataat Aalisarnermut Ataatsimiititaliamiit ingerlateqqissavagut, taanna oqapoq.

Aalisarnermik inuussutissarsiuteqarnerup inerisaaffigineqarnera Tasiilami eqqaanilu inuuniarnikkut atugarissaarnerulernermik kinguneqarnissaa neriuutigigini, taassuma naggasiullugu oqaatigaa.