Tusassip frimærkinik pilersuineq, Filatelia, Tasiilami
matullugu suliffeqarfik Sisimiunut nuuppaa.
Tusassip tamanna quppersakkami Greenland
Collectorimi, kalaallit frimærkiinik katersisunut pisartakkatut quppersakkami,
ilisimatitsissutigaat.
Tusassip frimærkinik pilersuineq, Filatelia, Tasiilami
matullugu suliffeqarfik Sisimiunut nuuppaa.
Tusassip tamanna quppersakkami Greenland
Collectorimi, kalaallit frimærkiinik katersisunut pisartakkatut quppersakkami,
ilisimatitsissutigaat.
Niuernerup ineriartornera pissutigalugu
frimærkinik pilersuineq illoqarfimmut annerusumut nuunneqartariaqartoq
namminersorlutik oqartussat suliffeqarfiutaat atuagassiap tunuani allagarsiami
allappoq.
- Tamanna suliamik naammassinninnissamut
artornarpallaarunnaassaaq, sulisummi arlallit sulinerat qulakkeerneqassammat,
Greenland Collector allappoq.
Sermitsiamiit nutaarsiassaq Tusassimit
itisiliiffigitinniaraluarparput. Tasiilami sulisut qassit matunermit
eqqugaanersut aamma Tasiilami Filateliap ineqarfia qanoq pineqassasoq ilaatigut
paaserusupparput.
Sulliaq pillugu paasissutissat annikittut
Tusass suliaq pillugu
paasissutissiingaanngilaq.
”Frimærkinut ingerlatsisorput Danmarkimi
najugaqarami nuunnermit eqqugaanngilaq.
Filatelimit suliarineqartartut Tusassimut
saaffiginnittarfinni sulisunit suliarineqartarput, maannamiillu Sisimiuni
sulisunit suliarineqartassapput.
Filatelia taamaalilluni Tusassip Sisimiuni
saaffiginnittarfianiilerpoq.” Tusassimi attaveqatigiinnermut ingerlatsisoq
Maasi Brøns Chemnitz taama naatsumik akissuteqarpoq.
Suliffeqarfik Tasiilamiittutoqaasoq
Filatelia 1989-imiilli Tasiilamiissimasoq
suliffeqarfiit illoqarfiit pingaarnersaaniittut illoqarfinnut minnerusunut
nuutsinneqarnerinut iluatsittunut assersuutitut arlaleriarluni
ersersinneqartarpoq.
Kommuneqarfik Sermersuumi borgmesterip
tulliata Justus Hansenip, namminertaaq Tasiilami najugaqartup, matusisoqarnera
akueriinnarpaa.
- Qangali naatsorsuutaareerpoq. Frimærkit
qangatulli atorneqarunnaarput. E-mailit, allaqatigiittarfiit attaveqariaatsillu
allat atorneqalermata ineriartorneq taamaappoq, taamaammat siumut isigaluta
matusineq sulik periarfissiinersoq takussavarput.
- Filateliami sulisimasut arlallit allamik
suliffittaarsimasut takusinnaavara, ajorunnanngilaq. Filateliap allaffii
illoqarfiup qeqqaniikkamik takornarialerisut arlaannit atorneqarluarsinnaapput,
taamaammat illutaa inuttaneqqissasoq qularinngilara. Tasiilamimi
takornarialerineq siunissaavoq, Justus Hansen oqarpoq.
Frimærkinik katersisut allagartaaqqat ullormi
siullermi pisiarineqarsinnaasut Sisimiut postmornuanik 3911-mik
allagartaqalersut Greenland Collectorip aamma nalunaarutigaa. Frimærkit ullormi
siullermi pisiarineqarsinnaasut siornatigut Tasiilap postnormuanik 1913-imik
allassimasoqartarsimagaluarput.
