Tasiilami saarullinnik tunisisoqarsinnaanngorpoq
Royal Greenlandip Tasiilami aalisakkanik tunitsivik ammarpaa, saarulliillu siulliit aggustip 20-ani tikiunneqarput.
Saarulliit siulliit Tasiilami tunitsivimmut nutaamut marlunngornermi aggustip 20-ani tuninineqarput.
Royal Greenland
Tasiilami aalisakkerivik nutaaq suli piariinngilaq. Saarulliilli siulliit tunineqarnissaanut inissaqarpoq, Royal Greenland nalunaarpoq.
Royal Greenlandip Tasiilami suliffissuanut saarulliit siulliit marlunngornermi aggustip 20-ani tunineqarput:
- Tunisassiorfiup pisortatigoortumik ammannginnerani aalisakkanik tigooraasinnaalernerput nuannaarutigaarput. Aallaqqaammut ullormut aalisakkanik 2-3 tonsinik tigusisinnaanissarput naatsorsuutigaarput aamma periarfissap atorluarneqarnissaa neriuutigaarput, Møller Lyberth oqarpoq.
Ukioq manna februaarimi sanaartorfik aallartinneqareerpoq, aappaaguanilu piareernissaa naatsorsuutigineqarpoq.
Royal Greenlandip Inuussutissalerinermut Aqutsisoqarfimmit utaqqiisaarutaasumik akuersissummik tigusaqarnera peqqutigalugu tunisassiorfiup nutaap sanaartorneqarnerata suli ingerlanerani tunisineq aallartinneqarsinnaalerpoq, Royal Greenland paasissutissiivoq.
Nuannaarutaaqisoq
- Najukkami aalisartut akornanni periarfissaq nuannaarutaallunilu Tasiilami tunisassiorfissaq qilanaarineqarpoq. Ilanngullugu nuannaarutigisatsinnik Kommuneqarfik Sermersuumi borgmesteri, Avaaraq Olsen, borgmesterip tullersortaa Justus Hansen kiisalu Tasiilami immikkoortumi pisortaq Hjørdis Viberg tunitsivimmut pulaarpaatigut, ingerlatseqatigiiffik allappoq.
Tunitsiviup aallartikkiartornerani tunisassiorfissap isuani iigaliisoqarpoq, tunisassiorfiullu sinnerani suli sanaartortoqarluni. Taamaalilluni tunisisoqarsinnaalluni sanaartorneq ingerlatiinnarlugu.
