Tasiilaq
Tasiilami suliffissaaleqisut atuarnissamut allannissamullu ikiorneqartut
Suliffeqanngitsut ilinniarnerup suliffeqalernissamut piareersassavai
Siorna decembarimi Tasiilami suliffissaaleqisut 16-it atuarsinnaanermik allassinnaanermillu sanngiiffeqartut piginnaanngorsarlugit ilinniartinneqarput. Suliffissaaleqisullu taakku kingullermik ilinniarsimasatik nangeqqillugit pikkorissarnermik nutaamik februaarimi ingerlatitseqqissapput, Kommuneqarfik Sermersooq ilisimatitsivoq.
Pikkorissarneq tulluarsagaq
Pikkorissartut ullut tamaasa takkukkaangamik pikkorissusertik malillugu suleqatigiikkuutaanut immikkoortiterneqariarlutik nalunaaquttap akunneri marluk pingasullu akornani ilinniartinneqassapput.
- Pikkorissartut immikkut ilinniartinneqassapput ilitsoqqussaralugulu oqaatsinik ilinniartinneqassallutik, siunertarineqarporlu inuussutissarsiuteqalernissaminnik periarfissaqalernissaat, ilinniartitsisoq Abia Abelsen oqarpoq.
Piareersarfik
Maannakkut anguniagaq siulleq tassaavoq suliffissaaleqisut tamakku Piareersarfimmit tiguneqarnissaminnut piareersimanerulernissaat.
Februaarip ulluisa sisamaanni sisamanngornermi pikkorissarneq sapaatip-akunnerinik sisaminik sivisussusilik aallartinneqarpoq. Pikkorissarneq Namminersorlutik Oqartussanit akilerneqarpoq.