Inatsisartuni
Aalisarnermut Piniarnermut Nunalerinermullu Ataatsimiititaliami ilaasortat
juulip naajartornerani aggustillu aallartinnerani Tunumi paasisassarsiorlutik
angalapput, tassani Tasiilaq, Isortoq, Tiilerilaaq, Sermiligaaq, Kulusuk aamma
Kuummiut tikinneqarlutik.
Angalanermi aalisartut piniartullu peqatigiiffii,
Royal Greenland aamma Arctic Prime Fisheries pissarsiaqaataalluartumik
ataatsimeeqatigineqarsimasut, Inatsisartunut ilaasortaq aamma Aalisarnermut
Piniarnermut Nunalerinermullu Ataatsimiititaliami siulittaasoq Lars Poulsen,
Siumut, oqarpoq.
Inatsisartuni
Aalisarnermut Piniarnermut Nunalerinermullu Ataatsimiititaliami ilaasortat
juulip naajartornerani aggustillu aallartinnerani Tunumi paasisassarsiorlutik
angalapput, tassani Tasiilaq, Isortoq, Tiilerilaaq, Sermiligaaq, Kulusuk aamma
Kuummiut tikinneqarlutik.
Angalanermi aalisartut piniartullu peqatigiiffii,
Royal Greenland aamma Arctic Prime Fisheries pissarsiaqaataalluartumik
ataatsimeeqatigineqarsimasut, Inatsisartunut ilaasortaq aamma Aalisarnermut
Piniarnermut Nunalerinermullu Ataatsimiititaliami siulittaasoq Lars Poulsen,
Siumut, oqarpoq.
Isorliunerusuni
inuussutissarsiorneq
Nunatsinni
isorliunerusuni nunaqarfinnilu inuussutissarsiorneq pillugu ilisimasat
annertunerulernissaat siunertaralugu, ataatsimiititaliami ilaasortat
paasisassarsiorlutik angalasariaqartut aalajangiunneqarsimavoq, tamatumalu
kingunerisaanik Tasiilaq eqqaanilu nunaqarfiit tallimaasut juulip aggustillu
ingerlanerani tikinneqarput.
- Isorliunerusuni
aalisarnermik piniarnermillu inuussutissarsiuteqarnerup
inerisaaffigineqarnissaanut periarfissat qanimut tikillugit
paasisassarsiorfiginissaat, minnerunngitsumillu tamaani innuttaasut kissaataat
suunersut paasinissaat pingaartipparput.
- Ukiuni
kingullerni Tunumi piniartuunermiit aalisartuunermut ikaarsaarneq annertuumik
sukkasuumillu ingerlanneqarpoq, taamaattumillu tassunga tunngatillugu
innuttaasut isumaat tusarusussimavarput, Lars Poulsen Kulusumminngaanneersoq
maannakkulli Nuummi najugaqartoq oqarpoq.
Innuttaasut
piniarneq toqqaraat
Tasiilap
eqqaani angalanermi Isortoq 60-it ataallugit inoqartoq siullerpaatillugu
tikinneqarpoq. Nunaqarfimmi aalisakkanut tunitsiveqanngilaq piniarnerlu
pingaarnertut inuussutissarsiutaavoq.
- Nunaqarfimmi
aalisakkeriveqanngilaq aalisartullu ikittuinnaapput. Akerlianilli piniarnermik
inuussutissarsiuteqarnerup maannakkornit annertunerusumik
ineriartortinneqarnissaa innuttaasut kissaatigaat, Lars Poulsen oqarpoq.
Isortumi
puisit amii tunisaapput, tamannalu annerusumik inerisaaffigineqassappat puisit
amiinut qassaavimmik pisaarnissaq, taassumalu saniatigut piniakkanut
killilersukkanut, soorlu nannunut qilalukkanullu pisassiissutit
amerlineqarnissaat innuttaasut kissaatigaat.
- Isortumi
aalisarnermik inuussutissarsiuteqarnermut ikaarsaarnissaq
siunnerfigineqanngitsoq ersarippoq. Nunaqarfiup eqqaani puiseqarluarpoq,
taamaattumik puisip amiinik tunitsiveqarnikkut inerisaanissaq pisariaqarpoq,
taanna oqarpoq.
Tiilerilaaq
aalisagaqarluartoq
Tiilerilaaq
90-it ataatilaarlugit inoqarpoq, nunaqarfiullu eqqaani saarulliit, suluppaakkat
qalerallillu eqqarsaatigalugit peqarluarpoq.
- Tiilerilaap
eqqaani aalisagaqarluarpoq nunaqarfimmili aalisakkeriveqanngimmat aalisarnermik
inuussutissarsiuteqarneq killilimmik ingerlanneqarpoq.
- Ukiut
siuliini saarulliit ikaanut nivinngartorlugit panertinneqartarsimagaluarput,
tamatumalu aallarteqqinneqarnissaa kissaatigineqartunut ilaavoq.
- Taamaattumik
Royal Greenlandip imaluunniit Arctic Prime Fisheriesip nunaqarfimmi
aalisakkeriviliorsinnaanerannut periarfissat misissorneqarnissaat innuttaasut
kissaatigaat, taanna oqarpoq.
Puisip
amii tunisaapput nunaqarfiullu eqqaani nanorpassuaqartarpoq, tamaanilu
nannuttassat amerlineqarnissaat kissaatigineqarpoq.
Nunaqarfik
aalisartoqarfiusoq
Sermiligaaq
200-t sinnilaarlugit inoqarpoq ukiualunnguillu ingerlanerinnaani
piniartuunermiit aalisartuunermut ikaarsarneq iluatsilluartumik ingerlasimavoq.
- Sermiligaap
eqqaani qaleraleqarluarpoq umiatsiaararsortullu amerlanerpaat aalisarnermik
inuussutissarsiuteqarput, taamaakkaluartoq nunaqarfimmi aalisakkanut
tunitsiveqanngilaq.
- Sermiligaami
aalisartut Kuummiuni Arctic Prime Fisheries aalisakkanut suliffissuaataanut
tunisiartortarput, kisiannilu nunaqarfimmi aalisarnermik pilersitsisoqarnissaa
innuttaasut ersarissumik kissaatigaat, Lars Poulsen oqarpoq.
Sermiligaami
aalisartut taamaallaat aasakkut ukiakkullu Kuummiunut tunisiartorsinnaapput,
nunaqarfimmili aalisakkerivimmik ammaasoqartuuppat aalisarneq ukioq
kaajallallugu ingerlanneqarsinnaagaluartoq, tunitsiviullu imermik
pilersorneqarnissaa qulakkeerneqassappat imaq tarajuiagaq atorneqartariaqartoq
taassuma oqaatigaa.
Aalisarnermut
siunnersortit amigaataasut
Tasiilap
eqqaani nunaqarfinni Kuummiut kisiartaalluni Arctic Prime Fisheriesimit
pigineqartumik aalisakkanut suliffissuaqarpoq. Royal Greenlandip Tasiilami
aalisakkanut suliffissuaataanut aamma Arctic Prime Fisheriesip Kuummiuni
aalisakkanut suliffissuaataanut qaleralinnut tunisinermi akigitinneqartut
qaffanneqaqqammerput, tamannalu aalisartunit assut qujamasuutigineqartoq,
Aalisarnermut Piniarnermut Nunalerinermullu Ataatsimiititaliap siulittaasua
oqarpoq.
- Kuummiuni
aalisarnermik inuussutissarsiuteqarneq annertusiartorpoq, tamannalu ilutigalugu
aalisarnermik siunnersortit amigaatigineqartut aalisartut oqaatigaat.
- Taamatuma
saniatigut saarulleqarluarpoq taakkulu aalisartut aningaasaqarnerannut
annertuumik iluaqutaapput, Lars Poulsen oqarpoq.
Aammali
piniarnermik inuussutissarsiuteqarneq suli annertuumik ingerlanneqarmat
qilalukkanut pisassiissutit amerlineqarnissaat innuttaasunit
kissaatigineqarpoq.
Kulusummi
tunitsiviliortoqartariaqartoq
Royal
Greenlandip Tasiilami aalisakkanut suliffissualiornissaa aalajangiunneqarmat,
tamanna Kulusummi nunaqarfimmi aqutsisunit akerlilerneqarpoq, tassani Kulusummi
aalisarnikkut ineriartortitsinissamut periarfissat Tasiilamut naleqqiullugit
pitsaaneruneri tunngavilersuutigineqarluni. Taamaattumik Kulusummi aalisakkanut
tunitsiviliortoqarnissaa suli kissaatigineqartoq, Lars Poulsen oqarpoq.
- Kulusuup
eqqaa saarulleqarfissuuvoq, taassumalu saniatigut qaleralinniarneq aamma
annertuumik ingerlanneqarpoq. Tasiilami Royal Greenlandip aalisakkanut
suliffissuaataanut tunisat annertoorujussuit Kulusumminngaanneersuupput,
taamaattumik nunaqarfimmi tunitsiviliortoqarnissaa kissaatigineqarpoq,
tamannalu tusaaniarneqartariaqarpoq, taanna oqarpoq.
Kulusummi
aalisakkanik tunitsiviliornissaq pillugu suliniutit assigiinngitsut
ingerlanneqartarsimapput, taakkuli maannamut kinguneqarsimanngillat.
Pilersaarutillu piviusunngortinneqassappata pisortaniit tapersersorneqarnissaq
pisariaqartinneqartoq, Lars Poulsen erseqqissaavoq.
Inatsisartuni
Aalisarnermut Piniarnermut Nunalerinermullu Ataatsimiititaliap Tasiilap
nunaqarfiini tallimaasuni angalanera paasissutissanik pingaarutilinnik
pissarsiffiusoq, tamakkulu piffissami aggersumi nalilersuiffigineqarumaartut
ataatsimiititaliap siulittaasuata erseqqissaatigaa.
