Tasiilaq: Pisiassat amigarneri innuttaasut naammagittaalliuutigaat
Tasiilami innuttaasut pisiniarfinni pisiassaaleqisinnaaneq nalunngilluarpaat. Innuttaasoq oqaluttuarpoq pisiassanik amigaateqarneq ukioq manna ukiut siuliinit annertunerusoq. Air Greenlandip assartuinissamik ajornartorsiortoqarsimanera ilalerpaa, assartugassallu sapaatip akunnerata naanerani apuunneqassasut ilisimatitsissutigalugu.
Immussuit, qallersuutissat, naatitat naatsiiallu. Neqit aalisakkallu aserortikkat nakorsaatillu pisiniarfinni pisiarineqarsinnaasut. Pisiassat tamakku ilagiinnarpaat Tasiilami KNI Pilersuisumi amigaatigineqartut.
Kurt Rokholm Pedersenip Tasiilami pilersuiniarnerup ajornartorsiutaanera qatsulluinnarpaa, assartuisussaatitaasunullu, Air Greenlandimut assartugassat tikinniaaluusaartarneri pillugit marloriarluni naammagittaalliuuteqarsimalerpoq. Air Greenland ilisimatitsivoq innuttaasup allagaa tallimanngornermi akineqarsimasoq.
- Pisiassanik amigaateqarneq ukioq manna ukiut siuliinit annertunerusutut maluginiarpara. Oqarusuppungaluunniit Air Greenlandip tunumik kiffartuussinissaminik naammassinnissinnaanngitsoq, Kurt Rokholm Pedersen Sermitsiaq.AG-mut oqarpoq.
Taanna Tasiilami ukiuni 30-ni najugaqarsimavoq.
Air Greenlandimut allagaqarnermini ilaatigut naammagittaalliuutigaa nakorsaatit pisiniarfinni pisiassaasartut amigaataaneri. Tasiilami covid-19 ukiup aallartinnerani tuniluutingaatsiarpoq. Maannali nualluutit nuffasernerillu aamma tuniluupput, nipaallisaatilli pisiniarfinni nungussimallutik.
- Pissutsit isornarluinnarput. Illoqarfitsinni soorunami oqaloqatigiittarpugut, isummernikkalu illoqarfeqatinnit isumaqatigineqarluinnarput, Sermitsiaq.AG-mut oqarpoq.
Qerinnarsinnaanera aarlerinartoqartartoq
Air Greenland Sermitsiaq.AG-mut ilisimatitsivoq Kulusummut assartuiniarnerit unammillernarsimasut. Nuummiit Kulusummut angalanissat 34-iusuni 27-it piffissami kingullermi naammassineqarsimapput. Timmisartuussinissat 38-iusuni 30-t kinguaattoorfiusarsimapput. Tamanna isumaqarpoq timmisartuussinissat allanngortinneqarsimatillutik aamma kinguaattooqqittariaqartarsimasut naammassineqannginnerini.
Angalatitsinissamut taamaatitsisoqarneranut ilaatigut tunngavilersuutigineqarpoq Kulusummi timmisartup suluusaanik aasussiissuteqartoqanngimmat, taamaattumillu timmisartoq Kulusummut missinnaagaluarluniluunniit aallaqqissinnaajunnaaratarsinnaanera aarlerinarsinnaasoq.
Taassuma saniatigut timmisartup aquttua saqisullu suliffissaat qasuersaarfissaallu najoqqutaralugit angalatitsinissat pilersaarusiorniarneqartarput.
Assartungassat 3 tonsit tikisinneqalersut
Air Greenlandimi attaveqatigiinnermi immikkoortortaqarfiup ilisimatitsissutigaa Kulusummut assartungassat 3.100 kilot tallimanngornermi ullaakkut aallartussatut uninngasimasut.
- Tunumut angalatitsinissat assartuinissallu taamaatinneqartarsimanerat Air Greenlandip soorunami ajuusaarutigaa. Angalanerup kipisaqattaalerneranik tamanna kinguneqarpoq, angalasussallu assartungassaniit siulliuttariaqarsimavagut, inissaqartillugulu assartungassat aamma ilannguttarlugit.
- Assartungassat 3.100 kilot tallimanngornermi ullaakkut Nuummiipput. Tallimanngornermili 22. april 2022 assartungassat 1.600 kilot Kulusummut apuunneqarput. Assartungassat sinneri arfininngornermi 23. april 2022 assartuunneqarnissaat naatsorsuutigaarput, Air Greenlandimi avammut attaveqaatilerisoq, Inga-Dora Markussen Sermitsiaq.AG-mut ilisimatitsivoq.
Nuumiit Kulusummut sapaatip akunneranut marloriarluni Air Greenland timmisartuussisartussatut ukioq kaajallallugu pilersaaruteqarpoq.