Taxaatileqatigiiffiit akerliussutsimik takutitsisut

Taxartitsisut suliassaqarfimminni inatsiseqannginnera naammaginnginnertik takutinniarlugu ullumikkut sisamanngornermi apriilip 25-anni akerliussutsimik takutitsipput. Inatsiseqannginnerani inuit ataasiakkaat akiliisitsillutik ilaasoqarsinnaasarput, tamannalu taxartitsisunut allagartalinnut isertitanik annaasaqarnermik kinguneqartarpoq.

LÆS OGSÅ

Styrelse: Husk lige skatten - også ved taxakørsel

Ilulissani, Sisimiuni Nuummi Maniitsumilu taxartartut tamarmik akerliussutsimik takutitsinermut peqataapput. Nuummi taxartartut Kommuneqarfik Sermersuumut ingerlaqqipput, kingornalu Namminersorlutik Oqartussanut, tassanilu politikerinut allagaqarsimapput, maleruagassat atuutsinneqaqqilernissaat sulissutigeqqullugu.

- Ulloq manna tikillugu taxartartut tamarmik ukiumut millionilinnik akileraarutinik akiliisarsimagaluarput. Tassa imaappoq taxartartut inatsisitigut akuerisaasut malittarisassanillu maleruaasut taxartartunik malittarisassanik maleruaanngitsunik, akileraaruserusunngitsunik aqunneqartunik taarserneqartussaasut – taakkualu taxartitsisarnerup ingerlaannarnissaanut tapersersuiumanngilluinnarput, taxaatileqatigiiffiit oqariartuuteqarput.

Isertitassanik annaasaqartut

2023-mi ukiakkut taxartartut Nuummi unioqqutitsillutik akiliisitsillutik ingerlatsisartut pillugit politiinut arlaleriarlutik nalunaaruteqarsimapput. Kalaallit Nunaannili Politiit angallassisartunik eqqartuussivimmut suliassanngortitsinissamut inatsisitigut tunngavissaqanngillat, Akileraartarnermullu Aqutsisoqarfik innuttaasunut taamaallaat isertitanut tamanut akileraartarnissamut kajumissaarisinnaavoq.

Nuummi taxanik ingerlatseqatigiiffiit missingerpaat sapaatip akunnerata naanerani akiliisitsillutik angallassisartunik 20-25-t missaanniittunik angalasoqartartoq. Ajornartorsiut tamanna Sisimiuni taxamik ingerlatitsisup Pele Nathansenip ilisarisinnaalluarpaa. Taassuma Sisimiuni akerliussutsimik takutitsinermut Sermitsiap aallartitaanut oqaluttuaraa taxanik angallassisut biilinik attartortut sullitaannik tigusineri pissutigalugit isertitat malunnaatilimmik annaasaqartoqartartoq:

- Sisimiut eqqarsaatigalugu taxanik angallassisartut arlallit atuisartutsinnik tigusisarnerat maluginiarparput. Tassa taxanik angallassisartut peqquserluttarnerisigut isertitakka affaannanngorsimapput. Maannakkut ineqarnermut, nerisassanut akiligassanullu allanut akissaqarpallaarunnaarpunga. Tamanna akuerineqarsinnaanngilluinnarpoq, Sisimiuni taxartartoq Pele Nathansen Sermitsiamut oqarpoq.

Angallannermut ministereqarfik suliaqassaaq

LÆS OGSÅ

Før taxa-demonstrationer: Poulsen varsler genindførelse af regler

- Tassani Ineqarnermut Attaveqaqatigiinnermullu Naalakkersuisoqarfik piaarnerpaamik Danmarkimi Angallannermut Ministereqarfik attavigeqqullugu taxartartut kajumissaarpaat, Kalaallit Nunaanni angallannermut inatsimmi tunngavigisaat atorlugu Kalaallit Nunaanni biilinik attartortitsisarneq pillugu malittarisassalioqqullugit, taxat ingerlatseqatigiiffii allapput.

Attaveqaasersuutinut naalakkersuisup Hans Peter Poulsenip (S) Sermitsiamut ilisimatitsissutigaa Naalakkersuisut danskit naalakkersuisuinut saaffiginnissimasut, aamma Naalakkersuisut taxanik angallassinermut malittarisassat atuutsinneqaqqilernissaat sulissutigigaat.