Taxartartut akerliussutsimik takutitsinnginneranni: Inatsisit atulerseqqinneqassasut Poulsen nalunaaruteqarpoq
Siunissami qanoq pisoqassanersoq aalajangerneqartinnagu taxanut malittarisassatoqqat atuutsinneqaqqittussanngorput, naalakkersuisoq oqarpoq. Taxartartut sisamanngornermi illoqarfinni arlalinni akerliussutsimik takutitsissapput.
- Maannakkut inatsisitoqaq tunngavigalugu inatsisitigut inissiiniarneq ingerlapparput, tamatumalu saniatigut inatsisinik nutaanik siunissamut qulakkeerinninniarluta suli sulivugut, attaveqaasersuutinut naalakkersuisoq Hans Peter Poulsen oqarpoq.
Leiff Josefsen
Illoqarfinni
arlalinni taxanik ingerlatsisut sisamanngornermi taxanik
ingerlatsinermut inatsiseqannginneranut akerliussutsimik
takutitsissapput, ullumikkut inatsiseqanngimmat kikkulluunniit
inunnik akiliisitsillutik angallassisinnaapput.
Pissutsit
taamaannerat suliaqarfimmut annertuumik ajornartorsiortitsisoq
oqaatigineqarpoq.
Attaveqaasersuutinut
naalakkersuisup Hans Peter Poulsenip (S) oqarnera naapertorlugu,
nammineq aalajangiisinnaagaluaruni taxanik angallassinermut inatsisit
atuutilerseqqinneqassagaluarput.
Inatsisit
pisoqqat tunngavigalugit
Sapaatip-akunnerani
matumani Danmarkimi angallannermut ministereqarfimmut, tamatumunnga
akisussaasumut saaffiginnippoq, inatsisinut pisoqalisimasunut
assingusunik atuutilersitsisoqarnissaa qinnuigalugulu:
-
Maannakkut inatsisitoqaq tunngavigalugu inatsisitigut inissiiniarneq
ingerlapparput, tamatumalu saniatigut inatsisinik nutaanik
siunissamut qulakkeerinninniarluta suli sulivugut, Hans Peter Poulsen
Sermitsiamut oqarpoq.
Inatsisit
pisoqqat atuutsinneqaqqilerpata, kommunit taxanik angallassisut
akuersissutinik amerlassusiinut akinullu tunngatillugu
aalajangiisinnaalissapput.
Aaqqiissuteqarniarneq
utaqqisitsisoq
Assersuutigalugu
Ilulissani taxartartut tamannarpiaq ujartorsimavaat.
Politikerit
unioqqutitsilluni taxartitsisarnermik siornatigut taaneqartunut
pinaveersaartitsisumik illersuinermik atulersitseqqinnissaat, Nuuk
Taximi pisortap, Janus Eigaardip siornatigut piumasaqaatigisimavaa.
Janus
Eigaardip oqarnera naapertorlugu taxat ingerlatseqatigiiffii
inuinnaat angallassinissamik neqeroorutiginnittartut
naligiinngitsumik unamillerpaat, amerlanertigut Facebookimi gruppini
aalajangersimasuni ussassaaruteqartoqartarluni.
Suliassaqarfik
ukiorpassuarni unammilligassartaqartoq politikkikkut
ilisimaneqarsimasoq, Naalakkersuisoq oqarpoq, aaqqiissutissarli suli
utaqqineqartoq, maannalu Angallannermut ministereqarfik suliamik
sukkanerusumik ingerlatsinissaa misilinneqarpoq.
Taxartartut
akerliussutsimik takutitsinissaat politiit ilisimatitsissutigaat
Siunissaq
ungasinnerusoq eqqarsaatigalugu inatsisit Kalaallit Nunaannit
akisussaaffigineqarnissaat, inatsisillu nutarterneqarnissaat
nunatsinnilu pissutsinut naleqqussarnissaannik Naalakkersuisut
kissaatigaat .
Ilulissani,
Sisimiuni, Nuummi Maniitsumilu taxartitsisuniit akerliussutsimik
takutitsisoqassasoq nalunaarutigineqartoq, politiit sisamanngornermi
ullaap tungaani ilisimatitsipput.
Nuummi
naatsorsuutigineqarsinnaavoq biilit angallannerat nalunaaqutaq 11:50
- 14:00 akornanni akornguserneqarsinnaammat, akerliussutsimik
takutitsisut aqquserngup eqqaaniissinnaammata, politiit Facebookimi
allapput.