Tele-Post: Nanortalimmit kujammut attaveqaatit matuneqarallarsinnaapput
Teknikkikkut ajutoortoqarnera pissutaalluni Nanortalimmit kujammut attaveqaatit matuneqarallarsinnaasut Tele-Post ilisimatitsivoq
- Nanortalik nunaqarfittaalu ullup affap ingerlanerani atassutaarussinnaapput.
Tele-Post tusagassiutinut nalunaarummi allappoq.
Nanortaliup eqqaani sakkortusaaveqarfimmi teknikkip ajoquteqalersimanera peqqutigalugu massakkumiit ullup affap ingerlanerani Nanortalimmi nunaqarfittaanilu, tassa Tasiusami, Narsaq kujallermi Aappilattumilu kiisalu Ikerassassuarmi attassuteqarneq tamarmi unissinnaasoq ilisimatitsissutigineqarpoq.
- Nunatta kujataani ulluni makkunani assut silarlummat Tele-Postip teknikerii sakkortusaavimmut anngussinnaanngikkallarput, nalunaarutigineqarpoq.
Teknikkikkut ajoqutaasup Nanortalimmiit kujammut atassuteqarneq tassa sunnersinnaavaa teknikerit sakkortusaavimmut anngutiaanngippata.
- Taamaattoq atassuteqaatit aaqqeqqinniassammata sapinngisarput tamaat maanna sulivugut, silali tassa naalagaavoq. Qanoq pisoqarneranik nittartakkatsigut, tusagassiuutitigut SMS-kkullu ataavartumik tusarliussaqartarumaarpugut, Tele-Post ilisimatitsivoq.