naatsorsuutit
Tele-Post: - Sunniuteqarnerulluta unammillersinnaaneruvugut
Tele-Postip ukiup qiteqqunnerani angusat akileraannginnermi 2016-imi 60,5 millionit koruuninit 2017-imi 78,2 millionit koruuninut pitsanngoriartippai.
Tele-Post sunniuteqarluarnerulersimasoq aamma sullitat akiliutigisaminnit annertunerusumik pissarsiaqartartut ukiup 2017-ip qiteqqunnerani naatsorsuutit takutippaat.
Naak ilanngaaseereerluni kaaviiaartitsineq 13,1 millionit koruuninit appariarluni 418,5 millionit koruuninik annertussuseqartoq, ukiup siuliani 60,5 millionit koruuninik angusaqarluni Tele-Post ukiormanna akileraannginnermi 78,2 millionit koruuninik saqqummiussaqarpoq.
Mobiltelefoneqarnermit kaaviiaartitat appariartut
- Mobilinik atuinermit kaaviiaartitat ukiup 2017-ip affaani siullermi 2016-imut sanilliullugu 5,2 procentimik appariaateqarput. Tusass Plusip decembarimi 2016-imi killeqanngitsumik oqaluussisinnaanermik SMS-ersinnaanermillu imaqartoq atuisorpassuarnik datanik atuinikkaasunik soqutigineqarpoq. Tusass Plusip akiata aalajangiunneqarnera sullitat agguaqatigiisillugu annikinnerusumik atuinerannik nassataqarpoq, taamaalillunilu kaaviaartitat appasinnerullutik, ukiup qiteqqunnerani nalunaarusiami tamanna allaqqavoq.
Atuisut mobilitigut datamik atuinerup 2017-ip affaani siullermi 2016-imut sanilliullugu 57 procentinik qaffariangaatsiarpoq. Taama annertutigisumik qaffariartoqarnera Tusass Plusimik tunngaveqarpoq, ingammik Tusassimik atuisuusimasut datap akianik appaaffigineqangaatsiarput, annerusumillu atuinermik kinguneqarluni.
Aamma atuaruk: Mobilimik atuineq killeqanngitsoq Tele-Postip saqqummiukkaa
Periusissiaq angusaqarfiusoq
- Siulersuisuni nuannaarutigaarput iliuusissatut pilersaarutip maannakkut angusaqarnernik takutitsisinnaalernera, sullittakkanut aamma inuiaqatigiinnut kalaallinut, piginnittuusunut. Ineriartortitsineq aamma iliuutsinik nutaanik piviusunngortitsisarnerput suli naammassinngilarput, kisianni angujartorluarparput, siulersuisuni siulittaasoq Stine Bosse oqarpoq.
Tele-Postip iliuusissatut pilersaarutaani 2017-2020 pineqarpoq nioqqutinik nutaanik pilersuineq aamma sullitat pitsaanerusumik misigisaqartarnissaat, taamatuttaaq attaveqaatit pitsanngorsarnissaat tamatuminnga piviusunngortitsinissamut.
- Ukiup affaa assut ulapiffiusimavoq siunissamut pilersaarutitut anguniakkavut anguniarlugit ulapissimaqigatta. Annertuunik aningaasaliissuteqarsimavugut ilaatigut imaatigut kabelimut aamma sullitavut pitsaanerusunik nioqquteqarfigisinnaalerlugit. Tamatuma pisortaanertut tulluusimaartippaanga, Kristian Reinert Davidsen oqarpoq.