Thomsen Halibut Greenlandimit tunuartoq
Niels Thomsen 2011-mili Halibut Greenland ApS-imi pisortaanerusimasoq, suliffimminit soraarniuteqarsimavoq. Siulersuisut taamatut aalajangersimaneq ajuusaarutigaat.
Inatsisartunut kingullermik qinersisoqarmat taaguunneqarluarsimasoq Niels Thomsen siorna aalajangersimavoq politikki qimanniarlugu, maannalu Halibut Greenland ApS-ip siulersuisuinut nalunaaruteqarsimavoq, aalisariutileqatigiiffimmi siuttuujunnaarusulluni.
Siulersuisuni siulittaasoq Mikael Nathanielsen siulersuisut sinnerlugit imaq oqaaseqarpoq:
Ajuusaarnartoq
- Siulersuisunit ajuusarutigalugu paasivarput, pisortatta atorfini qimanniaraa. Niels Thomsen pisortatut sulilluarsimaqaaq ingerlatseqatigiiffimmullu tunniussimalluarluni sulisimalluni. Niels Thomsen ingerlatseqatigiiffiup pilersinneqaqqammernerani pisortanngorami, ingerlatseqatigiiffiup pitsaasumik ineriartortinneqarnerani siuttuusimavoq, sulinermini pilersaaruteqartarnissaq pingaartittuarsimallugu.
- Ingerlatseqatigiiffipput nunami suliffeqarfiup annersaanit aamma pisortanit pigineqartumit ilaatigut sakkortuumik toqqaannartumillu unammillerneqartarsimammat, Niels Thomsenip suliffeqarfimmik aqutsilluarsimaneranut qujassutissaqarpugut. Niels Thomsenip ilisimasaqassusaa inuttullu sapiissuseqarlunilu unammillerusussuseqarnera maqaasissavarput.
- Siulersuisunit Niels Thomsen ukiorpassuarni suleqataasimaneranut angusaqarluartarsimaneranullu qujaffigerusupparpæut, ajunnginnerpaamillu kissaallugu, Mikael Nathanielsen tusagassiorfinnut nalunaaruteqarnermi oqarpoq.
Nutaamik pisortassarsiortut
Ilisimatitsissutigineqarpoq nutaamik pisortassarsiorluni aallartittoqarsimasoq.
- Ingerlatseqatigiiffiup patajaallisartuarneqqarnissaanik ineriartortittuarneqarnissaanillu qulakkeerinnissinnaasumik pisortassarsinissarput anguniarparput. Suliassaq tamanna peqqissaarullugu isumagissavarput, aamma Niels Thomsen pisortassamik nutaamik atorfinitsitsinissat tungaanut atorfimmik isumaginnissaaq.
Niels Thomsen aalajangersimanini pillugu imatut oqaaseqarpoq:
- Halibut Greenlandimi pisortatut periarfissinneqarsimanera qujamasuutigaara, maannalu suleqatikka suleqatigisimasakkalu tamaasa qujaffigaakka. Aamma ingerlatseqatigiiffiup qanoq ingerlanneqarsinnaaneranik qanoq anguniagaqartarnissaanik isumassarsigaangama maanna siulersuisuusut siusinnerusukkullu siulersuisuusimasut tapersersortarmannga qujaffigerusuppakka .
- Ukiut ingerlaneranni misilittagaqarlualersimavunga, ajukkullunga patajaattumillu angusaqarluartarnissaq sulissutigiuarsimavara. Suliffeqarfiup illoqarfitsinni Ilulissani pingaarutilimmik sunniutqarsimanera aamma nunami maani aalisarnermik inuussutissarsiuteqartunut tamanut pitsaasumik sunniuteqarsimanera nuannaarutigaara.